ఉపేంద్ర 2.. నేను కాదు నువ్వు
16 ఏళ్ల కిందట వచ్చిన ఉపేంద్ర సినిమా కన్నడలోనే కాదు.. తెలుగులోనూ ఓ పెద్ద సంచలనం. అప్పటిదాకా సౌత్ ఇండియాలోనే కాదు, ఇండియాలోనే అలాంటి ఓ హీరో క్యారెక్టరైజేషన్ తో ఎవ్వరూ సినిమా తీసింది లేదు. హీరో హిపోక్రసీకి తావివ్వకుండా ప్రేమ కోసం ఒకరు, డబ్బు కోసం ఒకరు, సుఖం కోసం ఇంకొకరిని ప్రేమించాలనుకోవడం.. ఈ కాన్సెప్ట్ అప్పట్లో జనాల మతి పోగొట్టింది. నిజానికి ఇప్పుడొచ్చినా ఫ్రెష్ గా కాంటెంపరరీగా అనిపించే కాన్సెప్ట్ ఉపేంద్ర సినిమాది. ఆ సినిమాలో హీరో పాత్ర పేరే ‘నేను’ అన్నది గుర్తుండే ఉంటుంది. సినిమాలో ఆ క్యారెక్టర్ చూసి చాలామంది అదే తరహాలో నిజజీవితంలో ప్రవర్తించారంటే అందులో అతిశయోక్తి ఏమీ లేదు. మగాడిలోని ఇగోను సంతృప్తి పరిచే ఆ సినిమా అప్పల్లో మగమహారాజులకు భలేగా నచ్చేసింది. తెలుగు ప్రేక్షకులు కూడా ఎగబడి చూశారా సినిమాను.
ఇన్నేళ్ల తర్వాత ఉపేంద్ర సినిమాకు సీక్వెల్ గా ఉపేంద్ర-2 తీశాడు ఉప్పి. కన్నడ లో ఉప్పి-2గా ఈ నెల 14న రిలీజవబోతోంది. తెలుగులో కూడా అదే రోజు విడుదల చేయనున్నారు. ఈ సందర్భంగా ఆదివారం ఆడియో ఫంక్షన్ చేసి.. ట్రైలర్ రిలీజ్ చేశారు. చాలా సంక్షిప్తంగా ఉన్న ట్రైలర్ అది. మహా అయితే అర నిమిషం ఉంటుంది. కానీ ఆ అర నిమిషంలోనే ఎంత ఆసక్తి రేపాలో అంతా రేపాడు ఉప్పి. ఉపేంద్ర లో ‘నేను’ అనే పాత్ర వేస్తే.. ఇందులో ‘నువ్వు’ అనే క్యారెక్టర్ చేశాడు. అంటే ఉపేంద్ర ‘నా’ అనే కోణంలో సాగితే.. ఇది ‘నీ’ అనే యాంగిల్లో ఉంటుందన్నమాట. క్యాప్షన్ కూడా ‘నేను కాదు నువ్వు’ అని పెట్టాడు ఉపేంద్ర. ట్రైలర్ లో అతడి లుక్ కూడా చూపించలేదు. ఏదో అఘోరా పాత్ర వేసినట్లు మాత్రం స్పష్టమవుతోంది. మరో సెన్సేషనల్ కాన్సెప్ట్ తోనే ఉప్పి బాక్సాఫీస్ దండయాత్రకు వస్తున్నట్లున్నాడు. అతడి ఫ్యాన్స్ కు మరోసారి పండగేనన్నమాటే.