సత్యదేవ్ కి కాలం కలిసొచ్చినట్టే!

టాలీవుడ్ కి 'మిస్టర్ పర్ఫెక్ట్' సినిమాతో సత్యదేవ్ పరిచయమయ్యాడు. చిన్నచిన్న పాత్రలతో కెరియర్ ను మొదలుపెట్టిన ఆయన, ఇప్పుడిప్పుడే హీరోగా కుదురుకుంటున్నాడు. సత్యదేవ్ ఇటీవల చేసిన 'తిమ్మరుసు' .. 'స్కైలాబ్' సినిమాలు రెండూ కూడా ఆశించిన స్థాయిలో రెస్పాన్స్ ను రాబట్టలేకపోయాయి. సత్యదేవ్ చేసిన సినిమాలు ఆశించిన స్థాయిలో ఆడకపోయినా, ఆయన నటనకి వంకబెట్టలేం. పాత్ర ఏదైనా దానికి పూర్తిన్యాయం చేస్తుంటాడు. అందువల్లనే అవకాశాలు ఆయనను వెతుక్కుంటూ వస్తూనే ఉన్నాయి.

చిరంజీవి తన 'గాడ్ ఫాదర్' సినిమాలో అత్యంత కీలకమైన పాత్రకి సత్యదేవ్ పేరును సిఫార్స్ చేయడం, ఆయన టాలెంట్ కి నిదర్శనం. అలాంటి సత్యదేవ్ తెలుగుతో పాటు హిందీ సినిమాలు కూడా చేస్తున్నాడు. అక్కడ ఆయన చేసిన 'రామ్ సేతు' సినిమా షూటింగు నిన్ననే పూర్తయింది. 'రామ్ సేతు' అనే పేరు వినగానే ఇది రామాయణంతో ముడిపడిన కథ అనే విషయం అర్థమైపోయి ఉంటుంది .. నిజంగానే కాన్సెప్ట్ అదే. గ్రాఫిక్స్ కూడా భారీ స్థాయిలో ఉండనున్నాయి. అక్షయ్ కుమార్ ప్రధానమైన పాత్రను పోషించిన ఈ సినిమాలో ఆయన సరసన జాక్విలిన్ కనిపించనుంది.

ఈ సినిమా షూటింగు పూర్తయినట్టుగా అక్షయ్ కుమార్ అధికారికంగా వెల్లడించారు. బడా నిర్మాణ సంస్థలు నిర్మించిన ఈ సినిమాకి అభిషేక్ శర్మ దర్శకత్వం వహించాడు. ఈ సినిమాలో సత్యదేవ్ ఒక కీలకమైన రోల్ చేశాడు. అక్షయ్ కుమార్ మూవీలో ఈ రోల్ చేసే అవకాశం లభించడం ఆనందంగా ఉందనీ, ఈ సినిమా షూటింగు పూర్తయిందని సత్యదేవ్ కూడా చెప్పాడు. ఈ పాత్ర తన కెరియర్ కి చాలా హెల్ప్ అవుతుందని అన్నాడు. ఈ సినిమా తప్పకుండా పెద్ద హిట్ అవుతుందనే నమ్మకం ఉందని చెప్పుకొచ్చాడు.

ఒక రకంగా చెప్పాలంటే చాలా తక్కువ సమయంలోనే సత్యదేవ్ బాలీవుడ్ వారి దృష్టిలో పడ్డాడని చెప్పచ్చు. ఈ సినిమా హిట్ అయితే ఆయనకి అక్కడి నుంచి మరిన్ని ఆఫర్లు వచ్చే అవకాశాలు ఉన్నాయి. ఇక తెలుగు సినిమాల విషయానికి వస్తే, ఇప్పటివరకూ ఆయన చేసిన సినిమాలు వేరు .. ఇప్పుడు చేస్తున్న సినిమాలు వేరు అనే అభిప్రాయాలు వ్యక్తమవుతున్నాయి. ప్రస్తుతం ఆయన చేస్తున్న 'గాడ్ ఫాదర్' .. 'గాడ్సే' సినిమాలు ఆయన గ్రాఫ్ ను సక్సెస్ దిశగా పెరిగెత్తించడం ఖాయమని అంటున్నారు. చూడబోతే సత్యదేవ్ కి కాలం కలిసొచ్చినట్టే కనిపిస్తోంది.