డైరెక్టర్ పీటర్ హెయిన్.. హీరో అతనా?

తండ్రిది వియ‌త్నాం. త‌ల్లిది పుదుచ్చేరి. ఎక్కువ పేరు తెచ్చిందేమో తెలుగు సినిమాలు. ఫైట్ మాస్ట‌ర్ పీట‌ర్ హెయిన్ నేప‌థ్య‌మిది. పుట్టింది ఇండియాలోనే అయినా.. తండ్రి దేశ‌మైన వియ‌త్నాంకు వెళ్లి మార్ష‌ల్ ఆర్ట్స్ స‌హా అనేక ఫైట్ల‌లో ఆరితేరి.. ఆ నైపుణ్యాన్నంతా ఇండియ‌న్ సినిమాల్లో చూపిస్తూ శ‌ర‌వేగంగా ఎదిగాడు పీట‌ర్. బాహుబ‌లి - మ‌న్యంపులి - రోబో - మ‌గ‌ధీర‌ - అప‌రిచితుడు.. ఇలా ఎన్నో భారీ చిత్రాల్లో అద్భుత‌మైన యాక్ష‌న్ ఘ‌ట్టాల్ని తీర్చిదిద్ది లెజెండ‌రీ స్టేట‌స్ సంపాదించాడ‌త‌ను. జాతీయ అవార్డుల్లో రెండేళ్ల కింద‌ట తొలిసారి ప్ర‌వేశ‌పెట్టిన ఉత్త‌మ యాక్ష‌న్ కొరియోగ్రాఫ‌ర్ పుర‌స్కారాన్ని మొద‌ట‌గా అందుకున్న‌ది పీట‌రే. ఇప్పుడ‌త‌ను ద‌ర్శ‌క‌త్వం చేయ‌బోతున్నట్లు ఇటీవలే ప్రకటన వచ్చిన సంగతి తెలిసిందే. టాలీవుడ్ నిర్మాత న‌ల్ల‌మ‌లుపు శ్రీనివాస్ (బుజ్జి) పీట‌ర్‌ ను ద‌ర్శ‌కుడిగా ప‌రిచ‌యం చేయ‌నున్నాడు.

కొన్ని రోజుల గురించి ఈ ప్రాజెక్టు గురించి బుజ్జి వెల్లడించాడు. ఐతే అప్పుడు హీరో ఎవరు అన్నది మాత్రం వెల్లడించలేదు. ఫైట్ మాస్టర్‌ గా పీటర్ స్థాయే వేరు. బాహుబలి - రోబో లాంటి సినిమాలకు పని చేసిన ఘనుడు. దేశంలో అతనే నంబర్ వన్ యాక్షన్ కొరియోగ్రాఫర్. అలాంటి టెక్నీషియన్.. దర్శకుడిగా మారుతూ పెద్ద స్టార్‌ తోనే సినిమా తీస్తాడని అనుకున్నారు. కానీ ఆశ్చర్యకరంగా బెల్లంకొండ శ్రీనివాస్ లాంటి చిన్న హీరోతో తన డెబ్యూ మూవీ తీయబోతున్నాడట పీటర్. ఆయన రేంజికి ఈయన హీరో ఏంటి అనే సందేహం కలగడం ఖాయం. కానీ పీటర్‌ ను దర్శకుడిగా పరిచయం చేయనున్న బుజ్జికి బెల్లంకొండ కుటుంబంతో మంచి అనుబంధం ఉంది. శ్రీనివాస్ తొలి సినిమాలో బుజ్జికి కూడా భాగస్వామ్యం ఉంది. ఆయన శ్రీనివాస్‌ తో సినిమా తీయడానికైతే తాను రెడీ అన్నాడట. మరి డబ్బులు పెట్టి సినిమా తీసే నిర్మాత అలా కోరుకున్నపుడు పీటర్ ఏం చేస్తాడు మరి. సర్దుకుపోతున్నట్లున్నాడు. త్వరలోనే ఈ ప్రాజెక్టు గురించి అధికారిక ప్రకటన రానుంది.