ఫస్ట్ లుక్: బంగార్రాజు ఇంట్లోకి నాగలక్ష్మి గా అడుగుపెట్టిన యంగ్ బ్యూటీ..!

కింగ్ అక్కినేని నాగార్జున - యువసామ్రాట్ అక్కినేని నాగచైతన్య కలిసి నటిస్తున్న తాజా చిత్రం ''బంగార్రాజు''. 'సోగ్గాడు మళ్ళీ వచ్చాడు' అనేది దీనికి ఉపశీర్షిక. కల్యాణ్ కృష్ణ కురసాల దర్శకత్వంలో రూపొందుతున్న ఈ సినిమా ‘సోగ్గాడే చిన్ని నాయనా’ కు సీక్వెల్. ఐదేళ్ల క్రితం బంగార్రాజుగా సందడి చేసిన నాగ్.. ఈసారి తనయుడు చైతూ తో కలిసి సినీ ప్రియుల్ని అలరించడానికి వస్తున్నారు. ఇందులో సీనియర్ నటి రమ్యకృష్ణ తో పాటుగా యంగ్ బ్యూటీ కృతి శెట్టి హీరోయిన్ గా నటిస్తున్న సంగతి తెలిసిందే.

ప్రస్తుతం వరుస ప్రాజెక్ట్స్ తో బిజీగా ఉన్న కృతి శెట్టి 'బంగార్రాజు' చిత్రంలో నాగచైతన్య కు జోడీగా కనిపించనుంది. ఆమె పాత్రకు సంబంధించిన ఫస్ట్ లుక్ ని చిత్ర బృందం ఈరోజు గురువారం విడుదల చేసింది. ఇందులో నాగలక్ష్మి అనే పాత్రను కృతి పోషిస్తోంది. తాజాగా రిలీజ్ చేసిన పోస్టర్ లో లంగావోణీలో చేతిలో కళ్ళద్దాలు పట్టుకొని కృతి బ్యూటిఫుల్ గా ఉంది. గ్రామ ప్రజలు మెడలో పూలమాల వేసి ఊరేగిస్తుండగా.. అందరికీ అభివాదం చేస్తూ కనిపిస్తోంది. మరి కృతి ఏమి సాధిస్తే జనాలు ఇలా ఆమెను మోస్తున్నారో తెలియాలంటే ఇంకొన్నాళ్లు ఆగాల్సిందే.

కాగా, 'బంగార్రాజు' చిత్రాన్ని జీ స్టూడియోస్ సమర్పణలో అన్నపూర్ణ స్టూడియోస్ బ్యానర్ పై అక్కినేని నాగార్జున నిర్మిస్తున్నారు. సత్యానంద్ స్క్రీన్ ప్లే అందిస్తున్న ఈ సినిమాకి అనూప్ రూబెన్స్ సంగీతం సమకూరుస్తున్నారు. యువరాజ్ సినిమాటోగ్రఫీ అందిస్తుండగా.. బ్రహ్మ కడలి ఆర్ట్ డైరెక్టర్ గా వ్యవహరిస్తున్నారు. ఇప్పటికే విడుదలైన నాగార్జున - రమ్యకృష్ణ పోస్టర్ మరియు 'లడ్డుండా' సాంగ్ విశేష స్పందన తెచ్చుకున్నాయి. ఈ క్రమంలో నాగలక్ష్మి గా వచ్చిన కృతి శెట్టి ఆకట్టుకుంటోంది. బంగార్రాజు కు సంబంధించిన మరిన్ని అప్డేట్స్ రాబోతున్నట్లు చైతన్య తెలిపారు. ఈ చిత్రాన్ని సంక్రాంతి బరిలో నిలిపే అవకాశం ఉందని టాక్ వినిపిస్తోంది. త్వరలోనే ఈ సినిమా విడుదల తేదీని ప్రకటిస్తారేమో చూడాలి.