ఫంకీ: ఈసారి అనుదీప్ ని నమ్ముతారా?

టాలీవుడ్‌లో వెరైటీ కామెడీతో తనకంటూ ఒక ప్రత్యేకమైన క్రేజ్ అందుకున్నాడు దర్శకుడు అనుదీప్ కేవీ. 'జాతి రత్నాలు' సినిమాతో ఓవర్ నైట్ సెన్సేషన్ క్రియేట్ చేసిన ఈ దర్శకుడికి ఒక సెపరేట్ ఫ్యాన్ బేస్ ఉంది. ముఖ్యంగా సినిమా కంటే ముందు వచ్చే ఇంటర్వ్యూలు, అందులో పేలే పంచులు ప్రేక్షకులకు భలే ఫన్ ఇస్తాయి. ఇప్పుడు విశ్వక్ సేన్ హీరోగా రాబోతున్న 'ఫంకీ' సినిమా విషయంలో కూడా దర్శకుడు తన మార్క్ ప్రమోషన్లతో నెట్టింట సందడి చేస్తున్నారు.

సితార ఎంటర్‌టైన్‌మెంట్స్ బ్యానర్‌లో వస్తున్న ఈ సినిమా ఫిబ్రవరి 13న రిలీజ్‌కు సిద్ధమవుతోంది. సాధారణంగా ఈ బ్యానర్ నుంచి వచ్చే సినిమాలకు ఉండే ప్రమోషనల్ హైప్ ఈసారి ఎందుకో తక్కువగానే కనిపిస్తోంది. ఇప్పటికే విడుదలైన టీజర్ కూడా ఆడియన్స్‌లో పెద్దగా బజ్ క్రియేట్ చేయలేకపోయింది. రొటీన్ కామెడీ సీన్లతో సాగిపోయిన ఆ టీజర్ చూసిన తర్వాత కథలో కొత్తదనం ఏమైనా ఉంటుందా అనే సందేహాలు మొదలయ్యాయి.

అసలు పాయింట్ ఏంటంటే.. కేవలం దర్శకుడి ఇంటర్వ్యూలను నమ్ముకుని జనం థియేటర్లకు వస్తారా అనేది ఇప్పుడు హాట్ టాపిక్‌గా మారింది. గతంలో 'ప్రిన్స్' సినిమా సమయంలో కూడా అనుదీప్ ఇలాగే ఇంటర్వ్యూలతో తెగ నవ్వించారు. కానీ థియేటర్లో కంటెంట్ రొటీన్‌గా ఉండటంతో రిజల్ట్ తారుమారైంది. ఇప్పుడు 'ఫంకీ' విషయంలో కూడా ప్రమోషన్ల బాధ్యత మొత్తం దర్శకుడు తన భుజాలపై వేసుకున్నట్లు అనిపిస్తోంది.

ఈ మధ్యే సుమతో కలిసి చేసిన ఇంటర్వ్యూ బిట్స్ వైరల్ అవుతున్నా, అది వసూళ్లపై ఎంతవరకు ప్రభావం చూపుతుందో చూడాలి. మరోవైపు మ్యూజిక్ పరంగా కూడా ఈ సినిమాకు పెద్దగా కలిసి రావడం లేదనే చెప్పాలి. ప్రస్తుతం ఫుల్ ఫామ్‌లో ఉన్న భీమ్స్ సిసిరోలియో సంగీతం అందిస్తున్నా, ఆడియన్స్‌ను ఊపేసే ఒక్క పాట కూడా ఇప్పటివరకు రాలేదు. ఒక సాంగ్ రిలీజ్ చేసినా అది పెద్దగా క్లిక్ కాలేదు.

ఒక మాస్ హీరో, క్రేజీ మ్యూజిక్ డైరెక్టర్ ఉన్నప్పుడు ఉండాల్సిన సౌండ్ సోషల్ మీడియాలో ఎక్కడా వినిపించడం లేదు. కేవలం అనుదీప్ మేనరిజమ్స్ మీదనే ఈ సినిమా బిజినెస్ అంతా ఆధారపడి ఉన్నట్లు కనిపిస్తోంది. విశ్వక్ సేన్ లాంటి ఎనర్జిటిక్ హీరో ఉన్నప్పుడు ప్రమోషన్లు మరింత స్పీడ్‌గా ఉండాలి. కానీ సితార టీమ్ ఈసారి ఎందుకో సైలెంట్‌గా ఉంది. బాక్సాఫీస్ దగ్గర నిలబడాలంటే కేవలం నవ్వులే సరిపోవు, కథలో కూడా బలం ఉండాలి.

అనుదీప్ తన పాత ఫార్ములానే మళ్ళీ వాడారా లేక ఏమైనా కొత్తగా ట్రై చేశారా అనేది ఇప్పుడు సస్పెన్స్‌గా మారింది. పక్కా కంటెంట్ ఉంటే తప్ప నేటి జనరేషన్ ఆడియన్స్‌ను మెప్పించడం అంత ఈజీ కాదు. మొత్తానికి 'ఫంకీ' ఫలితం పూర్తిగా అనుదీప్ క్రియేట్ చేసే ఫన్ మీదే ఆధారపడి ఉంది. ఫిబ్రవరి 13న థియేటర్లకు వచ్చే ఈ సినిమా పోయిన నమ్మకాన్ని మళ్ళీ తెచ్చిపెడుతుందో లేదో చూడాలి.