ల‌బ్ డ‌బ్ ల‌బ్ డ‌బ్: గుండె జ‌బ్బులు ఉంటే చూడొద్దంటున్నారు!

ద‌క్షిణాది చిత్ర‌సీమ‌లో వైవిధ్యమైన చిత్రాలకు కేరాఫ్ అడ్రస్‌గా నిలుస్తున్న స్టార్ డైరెక్టర్ ప్రశాంత్ నీల్ సమర్పిస్తున్న తాజా సస్పెన్స్ హారర్ థ్రిల్లర్ 418. కన్నడ, తెలుగు భాషల్లో పాన్-ఇండియా స్థాయిలో పెద్ద ఎత్తున విడుదల చేసేందుకు మేకర్స్ ప్లాన్ చేసినా.. కొన్ని కారణాల వల్ల ప్రస్తుతానికి ఈ సినిమా విడుదల తేదీ వాయిదా పడింది. అయినా.. ఈ సినిమాకు సంబంధించిన సెన్సార్ ముచ్చట్లు, హెచ్చరికలు ప్రస్తుతం సినీ వర్గాల్లో తీవ్ర చర్చనీయాంశంగా మారాయి.

ఈ సినిమా కథ విషయానికి వస్తే.. దాదాపు 15 ఏళ్ల క్రితం కొన్ని అనుమానాస్పద పరిస్థితుల వల్ల మూసివేసిన‌ ఓ పురాతన మెడికల్ కాలేజీ భవనం చుట్టూ ఈ కథ తిరుగుతుంది. ప్రధాన పాత్రధారి వివేక్ (చరణ్ లక్కరాజు)ను కొన్ని ఆత్మలు వెంటాడటంతో అతడు మానసికంగా తీవ్ర సమస్యలు ఎదుర్కొంటారు. ఈ క్రమంలో ఆ భవనంలోని ఎవరికీ అంతుచిక్కని 418 గదిని తెరుస్తారు. అప్పుడే ప్రెగ్నెంట్ దేవిక (చైత్ర జే ఆచార్), చారులత అనే ఇద్దరు మహిళలు ఆత్మలుగా మారారనే దిగ్భ్రాంతికరమైన నిజాలు వెలుగులోకి వస్తాయి. ఆ గది తలుపుల వెనుక ఉన్న మిస్టరీని ఇద్దరు అబ్బాయిలు, ఓ అమ్మాయి కలిసి ఎలా చేధించారనేదే ఈ సినిమా ప్రధాన కథాంశం.

సినిమాలోని హత్యలు, హింస, రక్తపాతం, హారర్ ఎలిమెంట్స్ మోతాదు ఎక్కువగా ఉండటంతో సెంట్రల్ బోర్డ్ ఆఫ్ ఫిలిం సర్టిఫికేషన్ (CBFC) అధికారులు ఈ చిత్రానికి కఠినమైన `ఏ` సర్టిఫికేట్ జారీ చేశారు. చిత్రంలోని ఇంటెన్సిటీ తగ్గకూడదనే ఉద్దేశంతో మేకర్స్ కొన్ని స్వల్ప మార్పులతోనే సెన్సార్ క్లియరెన్స్ పొందారు. సినిమా నిడివిని కూడా కరెక్ట్‌గా బ్యాలెన్స్ చేస్తూ ఈ సినిమా రన్ టైమ్‌ను 2 గంటల 28 నిమిషాలు (148 నిమిషాలు)గా ఖరారు చేశారు.

ఈ చిత్రంలో దినేష్ దివాకరణ్ సినిమాటోగ్రఫీ, వెంకీ జీజీ సంగీతం ప్రత్యేక ఆకర్షణగా నిలవనున్నాయి. చైత్ర జే ఆచార్, ప్రీతీ పగడాల, సూర్య రాజ్ వీరబత్తిని తదితరులు కీలక పాత్రల్లో నటిస్తున్నారు. డార్క్ అండ్ సైకాలజికల్ హారర్ థ్రిల్లర్‌గా రూపొందిన ఈ చిత్రంలో ఆత్మల కంటే మనుషుల అనుమానాలే ఎక్కువగా భయపెడతాయనే సరికొత్త పాయింట్‌ను దర్శకుడు ఆవిష్కరించే ప్రయత్నం చేశారు.

అయితే ఈ సినిమా కంటెంట్ ఇంటెన్సిటీ రీత్యా మేకర్స్ విడుదల చేసిన హెచ్చరికలు ఇప్పుడు అందరినీ విస్మయానికి గురిచేస్తున్నాయి. 18 ఏళ్లకు పైబడిన మానసికంగా పరిణతి ఉన్న ప్రేక్షకులు మాత్రమే ఈ సినిమా చూడాలని.. ముఖ్యంగా గర్భిణీలు, గుండె సంబంధిత సమస్యలు లేదా మానసిక రుగ్మతలతో బాధపడేవారు ఈ సినిమాకు పూర్తిగా దూరంగా ఉండాలని హెచ్చరిక జారీ చేశారు. హారర్, సైకాలజికల్ డ్రామా కారణంగా డిస్టర్బ్ అయ్యే వారు ఈ సినిమాను చూడటానికి వీలులేదని స్పష్టం చేయడం విశేషం.

సైకాలజికల్ హారర్ సినిమాలకు `ఏ` సర్టిఫికేట్ కేటాయించడంతో పాటు గర్భిణీలు, గుండె జబ్బులు ఉన్నవారు దూరంగా ఉండాలని మేకర్స్ హెచ్చరికలు జారీ చేయడం కేవలం ఆరోగ్య భద్రతను కోరుకోవడమే కాకుండా.. ప్రేక్షకుల్లో సినిమాపై విపరీతమైన క్యూరియాసిటీని పెంచే ఒక చక్కటి పబ్లిసిటీ స్ట్రాటజీగా కూడా మారుతుంది. సాధారణంగా ఇలాంటి వార్తలు, హెచ్చరికలు చూసినప్పుడు ప్రేక్షకులలో సినిమాలోని భయానక సన్నివేశాలపై, డార్క్ కంటెంట్‌పై ఆసక్తి మరింత పెరుగుతుంది. ఇది సోషల్ మీడియాలో పెద్ద ఎత్తున చర్చకు దారితీసి సినిమాకు కావాల్సినంత బజ్- హైప్‌ను క్రియేట్ చేయడంలో కీలక పాత్ర పోషిస్తుంది.

మరోవైపు, స్టార్ డైరెక్టర్ ప్రశాంత్ నీల్ బ్రాండ్ ఇమేజ్ ఈ చిత్రానికి ప్రధాన ఆకర్షణ అయినా కేవలం 18 ఏళ్లకు పైబడిన వారికి మాత్రమే పరిమితమయ్యే ఇలాంటి డార్క్ థ్రిల్లర్లు బాక్సాఫీస్ వద్ద కొన్ని సవాళ్లను ఎదుర్కొనే అవకాశం ఉంది. ఫ్యామిలీ ఆడియెన్స్, చిన్నపిల్లలు థియేటర్లకు దూరమయ్యే ప్రమాదం ఉంది. అయితే బలమైన కంటెంట్, ఇంటెన్స్ హారర్ ఎలిమెంట్స్.. వైవిధ్యమైన సినిమాలను కోరుకునే యూత్ ఆడియెన్స్‌ను ఈ జోనర్ విపరీతంగా ఆకట్టుకుంటుంది. సరైన మౌత్ టాక్ కనుక వస్తే ఈ తరహా చిత్రాలు కూడా బాక్సాఫీస్ వద్ద ఊహించని స్థాయిలో సంచలన విజయాలను సాధించే సత్తా కలిగి ఉంటాయి.