అమెరికా వ్యాక్సిన్ చీఫ్‌గా వినాయక్

యునైటెడ్ స్టేట్స్ ఫుడ్ అండ్ డ్రగ్ అడ్మినిస్ట్రేషన్ (FDA)లోని సెంటర్ ఫర్ బయోలాజిక్స్ ఎవాల్యుయేషన్ అండ్ రీసెర్చ్ (CBER) కు కొత్త డైరెక్టర్‌గా భారతీయ-అమెరికన్ ఆంకాలజిస్ట్-హెమటాలజిస్ట్ డాక్టర్ వినాయక్ ప్రసాద్ నియమితులయ్యారు. ఇది అమెరికాలోని ఒక కీలక నియంత్రణ సంస్థలో భారతీయ సంతతికి చెందిన వ్యక్తికి దక్కిన ముఖ్యమైన , స్వతంత్ర నాయకత్వ స్థానంగా పరిగణిస్తున్నారు. ఈ పదవిలో డాక్టర్ వినాయక్ ప్రసాద్ వ్యాక్సిన్లు, రక్త ఉత్పత్తులు, జెనెటిక్ థెరపీలతో సహా వివిధ బయోలాజికల్ ఉత్పత్తుల నియంత్రణను పర్యవేక్షించే బాధ్యతలు నిర్వర్తిస్తారు.

ప్రజారోగ్య విధానాలపై తన అభిప్రాయాలు.. పదునైన విమర్శలకు డాక్టర్ వినాయక్ ప్రసాద్ పేరుగాంచారు. ఎఫ్‌డిఎ సంస్థ తీవ్ర పరిశీలనను ఎదుర్కొంటున్న కీలక సమయంలో ఆయన ఈ బాధ్యతలు స్వీకరించడం గమనార్హం. ఎఫ్‌డిఎ కమిషనర్ మార్టిన్ మకారీ, డాక్టర్ ప్రసాద్ శాస్త్రీయ పటిమ, స్వయంప్రతిపత్తి, పారదర్శకతను కొనియాడుతూ ఆయన నాయకత్వం సిబిఇఆర్ పనితీరుకు అత్యంత అవసరమైన సంస్కరణలు.. పారదర్శకతను తీసుకువస్తుందని ఆశాభావం వ్యక్తం చేశారు.

కోవిడ్-19 మహమ్మారి సమయంలో మాస్క్ ఆదేశాలు.. పిల్లలకు వ్యాక్సిన్లు వంటి కొన్ని విధానాలపై డాక్టర్ వినాయక్ వైఖరి దేశవ్యాప్తంగా ఆసక్తిని రేకెత్తించింది. తన వైద్య వృత్తిలో విశేష అనుభవంతో పాటు, ఆయన ఒక ప్రముఖ ప్రజా మేధావిగా కూడా గుర్తింపు పొందారు. తన సుబ్‌స్టాక్ న్యూస్‌లెటర్ ‘సెన్సిబుల్ మెడిసిన్’ , పాడ్‌కాస్ట్ ‘ది ప్లీనరీ సెషన్’ల ద్వారా వ్యాక్సిన్ ఆరోగ్య సంరక్షణ విధానాలపై తన అభిప్రాయాలను తరచుగా తెలియజేస్తారు. ఆయన రాసిన 'మాలినెంట్' , 'ఎండింగ్ మెడికల్ రివర్సల్' వంటి పుస్తకాలలో లోపభూయిష్టమైన వైద్య పద్ధతులను నిర్మొహమాటంగా విమర్శించి, ఎవిడెన్స్-బేస్డ్ హెల్త్‌కేర్ సంస్కరణలకు తన మద్దతును స్పష్టం చేశారు.

ఓహియో , చికాగోలో భారతీయ వలస తల్లిదండ్రుల పెంపకంలో పెరిగిన డాక్టర్ వినాయక్ ప్రసాద్, మిచిగాన్ స్టేట్ యూనివర్శిటీలో హెల్త్‌కేర్ ఎథిక్స్ , ఫిజియాలజీలో గ్రాడ్యుయేషన్ పూర్తి చేశారు. అనంతరం ప్రముఖ యు.ఎస్. సంస్థలలో తన వైద్య విద్య, శిక్షణను పొందారు. ప్రస్తుతం ఆయన యూనివర్శిటీ ఆఫ్ కాలిఫోర్నియా, శాన్ ఫ్రాన్సిస్కో (UCSF)లో ప్రొఫెసర్‌గా పనిచేస్తున్నారు. అమెరికా వైద్య రంగంలో ముఖ్యంగా నియంత్రణ విధానాల రూపకల్పనలో ఆయన అనుభవం, నిష్పాక్షికత ఈ కీలక పదవికి వన్నె తెస్తాయని భావిస్తున్నారు.