టీ20ల్లో డబుల్ సెంచరీ లక్ష్యం.. వైభవ్ సూర్యవంశీ భారీ ధీమా

భారత క్రికెట్ చరిత్రలో ఎంతోమంది ప్రతిభావంతులైన ఆటగాళ్లు చిన్న వయసులోనే వెలుగులోకి వచ్చారు. అయితే ప్రస్తుత తరం యువ ఆటగాళ్లలో కనిపిస్తున్న ఆత్మవిశ్వాసం, దూకుడు మునుపెన్నడూ లేని విధంగా ఉన్నాయి. ఈ కోవకు చెందినవారే 13 ఏళ్ల ప్రాయంలోనే ఫస్ట్-క్లాస్ క్రికెట్ ఆడి రికార్డు సృష్టించిన బీహార్ యువ బ్యాటర్ వైభవ్ సూర్యవంశీ. ఇటీవల జరిగిన ఐపీఎల్ మెగా వేలంలో అత్యంత పిన్న వయస్కుడిగా రికార్డు సృష్టించి వార్తల్లో నిలిచిన ఈ యంగ్ సెన్సేషన్.. ఇప్పుడు అంతర్జాతీయ క్రికెట్ ప్రపంచాన్నే ఆశ్చర్యపరిచే వ్యాఖ్యలు చేశాడు. టీ20 క్రికెట్‌లో ఇప్పటివరకు ఎవరికీ సాధ్యంకాని ‘డబుల్ సెంచరీ’ సాధించడమే తన లక్ష్యమని ప్రకటించి సంచలనం సృష్టించాడు. ఇంగ్లండ్ మాజీ లెజెండరీ క్రికెటర్ కెవిన్ పీటర్సన్ తో జరిగిన ఒక ప్రత్యేక ఇంటర్వ్యూలో వైభవ్ తన భవిష్యత్తు ప్రణాళికలు, లక్ష్యాలను స్పష్టంగా వెల్లడించాడు.

క్రిస్ గేల్ వరల్డ్ రికార్డుపై కన్ను!

ప్రస్తుతం టీ20 ఫార్మాట్‌లో అత్యధిక వ్యక్తిగత స్కోరు రికార్డు వెస్టిండీస్ ‘యూనివర్స్ బాస్’ క్రిస్ గేల్ పేరిట ఉందనే సంగతి తెలిసిందే. 2013 ఐపీఎల్ సీజన్‌లో రాయల్ ఛాలెంజర్స్ బెంగళూరు తరఫున ఆడిన గేల్.. పూణే వారియర్స్ జట్టుపై కేవలం 66 బంతుల్లోనే 175 పరుగులు చేసి నాటౌట్‌గా నిలిచాడు. గత 13 ఏళ్లుగా ఈ రికార్డును ఎవరూ బద్దలు కొట్టలేకపోయారు. అయితే ఈ చారిత్రాత్మక రికార్డును బద్దలు కొట్టడమే కాకుండా టీ20ల్లో తొలి డబుల్ సెంచరీ సాధించాలనే సంకల్పంతో ఉన్నానని వైభవ్ చెప్పడం ఇప్పుడు క్రికెట్ వర్గాల్లో హాట్ టాపిక్‌గా మారింది. ఇంటర్వ్యూలో వైభవ్ మాట్లాడుతూ "నాకు క్రిస్ గేల్ నెలకొల్పిన 175 పరుగుల రికార్డ్‌ను బ్రేక్ చేయాలని ఉంది. ఒక మ్యాచ్‌లో నాకు పూర్తి 20 ఓవర్లు బ్యాటింగ్ చేసే అవకాశం వస్తే.. నేను కచ్చితంగా 200 పరుగులు (డబుల్ సెంచరీ) చేసి చూపిస్తా." అని ధీమా వ్యక్తం చేశాడు. అతని ముఖంలో కనిపించిన ఆత్మవిశ్వాసం, మాట్లాడిన తీరు చూసి స్వయంగా కెవిన్ పీటర్సన్ సైతం ఫిదా అయ్యాడు.

టీ20ల్లో డబుల్ సెంచరీ సాధ్యమేనా?

ఒకప్పుడు వన్డేల్లో డబుల్ సెంచరీ అనేది అసాధ్యంగా భావించేవారు. కానీ సచిన్ టెండూల్కర్ ఆ మార్కును అందుకున్నాక ఇప్పుడు వన్డేల్లో రోహిత్ శర్మ ఏకంగా మూడు డబుల్ సెంచరీలు బాదాడు. అదే విధంగా ఇప్పుడు టీ20ల్లో కూడా డబుల్ సెంచరీ సాధ్యమే అనే చర్చ మొదలైంది. ప్రస్తుతం క్రికెట్‌లో మారిన నిబంధనలు, బ్యాటర్ల దూకుడు వైభవ్ నమ్మకానికి బలాన్ని ఇస్తున్నాయి.

డబుల్ సెంచరీకి అనుకూలించే ప్రధానాంశాలు

మొదటి 6 ఓవర్లలో ఫీల్డింగ్ పరిమితులను వాడుకుంటూ బౌండరీల వర్షం కురిపించడం మొదటి టార్గెట్.. ప్రస్తుత ఆధునిక క్రికెట్‌లో బ్యాటింగ్‌కు అనుకూలించే వికెట్లు, చిన్న బౌండరీలు బ్యాటర్లకు వరంగా మారాయి. ఇంపాక్ట్ ప్లేయర్ రూల్ నిబంధన వల్ల బ్యాటర్లు వికెట్లు పడతాయనే భయం లేకుండా మొదటి బంతి నుంచే భారీ షాట్లకు వెళ్తున్నారు. 360 డిగ్రీల యాంగిల్‌లో ఆడే స్కూప్, రివర్స్ స్వీప్, రాంప్ షాట్ల వల్ల రన్ రేట్ ఊహించని విధంగా పెరుగుతోంది. ఈ పరిస్థితుల్లో ఒక ఓపెనర్ క్రీజులో సెట్ అయి, దాదాపు 65-70 బంతులు ఎదుర్కొంటే 200 పరుగులు చేయడం అసాధ్యమేమీ కాదనేది కొందరి విశ్లేషకుల అభిప్రాయం.

టీమ్ విజయమే ముఖ్యం.. వైభవ్ మెచ్యూరిటీ

చిన్న వయసే అయినా వైభవ్ ఆలోచనా విధానం ఎంతో పరిణతితో కూడి ఉంది. ఇంటర్వ్యూలో పీటర్సన్ అతడిని.. "నీకు మొదట బ్యాటింగ్ చేయడం ఇష్టమా? లేదా ఛేజింగ్ చేయడం ఇష్టమా?" అని ప్రశ్నించగా.. వైభవ్ ఎంతో లౌక్యంగా సమాధానమిచ్చాడు. "నాకు ఫస్ట్ బ్యాటింగ్, ఛేజింగ్ అనే తేడాలు లేవు. ఏ పరిస్థితుల్లోనైనా, ఏ పొజిషన్ లోనైనా ఆడేందుకు నేను ఎప్పుడూ సిద్ధమే. జట్టుకు ఆ సమయంలో ఏది అవసరమో, కెప్టెన్ నన్ను ఏం ఆశిస్తున్నాడో అదే నాకు ముఖ్యం. నా వ్యక్తిగత రికార్డుల కంటే జట్టు విజయానికే నేను ఎప్పుడూ మొదటి ప్రాధాన్యత ఇస్తాను" అని వైభవ్ స్పష్టం చేశాడు.

సోషల్ మీడియాలో వైరల్.. అభిమానుల హర్షం

వైభవ్ సూర్యవంశీ మాట్లాడిన ఈ ఇంటర్వ్యూ క్లిప్స్ ఇప్పుడు సోషల్ మీడియా ప్లాట్‌ఫారమ్స్ అయిన ఎక్స్ , ఇన్‌స్టాగ్రామ్‌లలో విపరీతంగా వైరల్ అవుతున్నాయి. భారత క్రికెట్ అభిమానులు ఈ యువ ప్లేయర్ ధైర్యాన్ని, సవాల్ చేసే తత్వాన్ని మెచ్చుకుంటున్నారు. "భవిష్యత్తు భారత క్రికెట్ సూపర్ స్టార్ దొరికేశాడు ఈ అబ్బాయిలో వీరేంద్ర సెహ్వాగ్, రిషబ్ పంత్ ల దూకుడు కనిపిస్తోంది" అంటూ నెటిజన్లు కామెంట్లు పెడుతున్నారు.

అయితే కొందరు మాజీ క్రికెటర్లు మాత్రం.. అంతర్జాతీయ స్థాయిలో సుదీర్ఘ కాలం రాణించాలంటే కేవలం దూకుడే సరిపోదని, టెక్నిక్, నిలకడ కూడా ముఖ్యమని హితవు పలుకుతున్నారు. ఏదేమైనా ఇంత చిన్న వయసులోనే ప్రపంచ రికార్డులపై కన్నేసిన వైభవ్ సూర్యవంశీ భవిష్యత్తులో ఎలాంటి సంచలనాలు సృష్టిస్తాడో చూడాలి!