హమ్మయ్య.. గొయెంకా నవ్వాడు.. పంత్ ఊపిరి పీల్చుకున్నాడు..

రిషభ్ పంత్.. ఈ పేరు వింటేనే మైదానంలో విధ్వంసం గుర్తొస్తుంది. అయితే గత రెండేళ్లుగా ఈ స్టార్ క్రికెటర్ కెరీర్ ఒక రోలర్ కోస్టర్ రైడ్‌లా సాగింది. తాజాగా ఐపీఎల్ 2026లో సన్‌రైజర్స్ హైదరాబాద్‌తో జరిగిన మ్యాచ్‌లో పంత్ ఆడిన ఇన్నింగ్స్ కేవలం ఒక మ్యాచ్ విజయం మాత్రమే కాదు.. అది ఒక వీరుడి పునరాగమనం. ఈ విజయం తర్వాత లక్నో సూపర్ జెయింట్స్ యజమాని సంజీవ్ గోయెంకా ముఖంలో కనిపించిన చిరునవ్వు కళ్ళలో మెరిసిన ఆనంద బాష్పాలు ఇప్పుడు సోషల్ మీడియాలో హాట్ టాపిక్ అయ్యాయి.

అంచనాల భారానికి అందని ఆట.. 2025 ఒక పీడకల

2022లో జరిగిన ఘోర కారు ప్రమాదం నుండి ప్రాణాలతో బయటపడటమే ఒక అద్భుతం అని అందరూ భావించారు. అలాంటి స్థితి నుండి పంత్ మళ్ళీ బ్యాట్ పట్టుకోవడం గొప్ప విషయమే అయినా మైదానంలో పాత పంత్‌ను చూడాలని అభిమానులు తహతహలాడారు. 2025 ఐపీఎల్ వేలంలో ₹27 కోట్లకు పైగా రికార్డు ధర వెచ్చించి లక్నో అతన్ని సొంతం చేసుకున్నప్పుడు విమర్శలు వెల్లువెత్తాయి. గత సీజన్‌లో పంత్ అటు బ్యాటింగ్‌లోనూ ఇటు కెప్టెన్సీలోనూ ఆశించిన స్థాయిలో రాణించలేకపోయాడు. దీంతో యజమాని గోయెంకా అసహనం వ్యక్తం చేయడం.. పంత్ తీవ్ర ఒత్తిడికి లోనవ్వడం వంటివి జట్టు వాతావరణాన్ని దెబ్బతీశాయి.

హైదరాబాద్‌పై విరుచుకుపడ్డ పంత్.. మళ్లీ ఆ పాత రౌద్రం

అయితే 2026 సీజన్ పంత్ పాలిట ఒక ఆశావహ దృక్పథాన్ని మోసుకొచ్చింది. సన్‌రైజర్స్ హైదరాబాద్‌తో జరిగిన కీలక మ్యాచ్‌లో లక్నో జట్టు తక్కువ స్కోరుకే కీలక వికెట్లు కోల్పోయి పీకల్లోతు కష్టాల్లో పడింది. ఆ సమయంలో క్రీజులోకి వచ్చిన పంత్ ఆరంభంలో ఆచితూచి ఆడినా సెటిల్ అయ్యాక తన మార్కు సిగ్నేచర్ షాట్లతో విరుచుకుపడ్డాడు. ముఖ్యంగా స్పిన్నర్లపై అతను ఆడిన 'రివర్స్ స్వీప్' షాట్లు స్టేడియాన్ని హోరెత్తించాయి.

42 బంతుల్లో 63 పరుగులు చేసిన పంత్ మ్యాచ్‌ను చివరి వరకు ఉత్కంఠభరితంగా తీసుకెళ్లి లక్నోకు అద్భుత విజయాన్ని అందించాడు. కేవలం పరుగులు చేయడమే కాదు.. క్లిష్ట పరిస్థితుల్లో జట్టును ఎలా గెలిపించాలో చూపిస్తూ ఒక మెచ్యూర్డ్ కెప్టెన్‌గా తనను తాను నిరూపించుకున్నాడు.

గోయెంకా కళ్లలో నీళ్లు.. నెటిజన్ల కామెంట్లు

పంత్ విన్నింగ్ షాట్ కొట్టిన వెంటనే కెమెరాలు లక్నో ఓనర్ సంజీవ్ గోయెంకా వైపు మళ్లాయి. గతంలో గంభీరంగా అసహనంగా కనిపించే గోయెంకా, ఈసారి భావోద్వేగానికి లోనయ్యారు. చేతులు జోడించి దేవుడికి మొక్కుతూ కళ్లలో నీళ్లు తిరుగుతుండగా పంత్‌ను చూసి చప్పట్లు కొట్టడం అందరినీ ఆకట్టుకుంది. "గోయెంకా నవ్వాడు.. పంత్ భయ్యా నీ కష్టం పగోడికి కూడా రావద్దు" అంటూ అభిమానులు సోషల్ మీడియాలో పోస్టులు పెడుతున్నారు. గత సీజన్‌లో పంత్‌ను ట్రోల్ చేసిన వారే ఇప్పుడు అతనికి సలాం కొడుతున్నారు.

టీమ్ ఇండియాకు శుభసూచకం

పంత్ మళ్ళీ ఫామ్‌లోకి రావడం కేవలం లక్నో జట్టుకే కాదు.. భారత క్రికెట్‌కు కూడా పెద్ద ఊరట. రాబోయే అంతర్జాతీయ టోర్నీల దృష్ట్యా పంత్ వంటి మ్యాచ్ విన్నర్ తిరిగి లయ అందుకోవడం చాలా ముఖ్యం. 2025లో ఎదుర్కొన్న విమర్శలు, ట్రోల్స్, అవమానాలను తన బ్యాట్‌తోనే తుడిచిపెట్టిన పంత్ తన సెకండ్ ఇన్నింగ్స్‌ను ఘనంగా ప్రారంభించాడు. పంత్ మళ్లీ నవ్వాడు.. క్రికెట్ ప్రపంచాన్ని నవ్వించాడు!