కోహ్లీతో షేక్‌హ్యాండ్ వివాదం.. రే*ప్ చేస్తామని హెడ్ భార్యకు బెదిరింపులు

ఐపీఎల్ 2026 సీజన్ చరమాంకానికి చేరుకుంటున్న వేళ.. రాయల్ ఛాలెంజర్స్ బెంగళూరు (ఆర్సీబీ), సన్‌రైజర్స్ హైదరాబాద్ (ఎస్.ఆర్.హెచ్) జట్ల మధ్య జరిగిన మ్యాచ్ సరికొత్త వివాదానికి తెరలేపింది. మైదానంలో విరాట్ కోహ్లీ, ట్రావిస్ హెడ్ మధ్య జరిగిన మాటల యుద్ధం.. ఇప్పుడు సోషల్ మీడియాలో అత్యంత వికృత రూపం దాల్చింది. ఆటగాళ్ల మధ్య గొడవను వారి కుటుంబాల వరకు తీసుకెళ్తూ కొందరు నెటిజన్లు హద్దులు దాటడం తీవ్ర విమర్శలకు దారి తీస్తోంది.

మైదానంలో ఏం జరిగింది? 'ఇంపాక్ట్ ప్లేయర్' వర్సెస్ 'ఆఫ్ స్పిన్'

ఉప్పల్ వేదికగా జరిగిన ఈ హై-వోల్టేజ్ మ్యాచ్‌లో విరాట్ కోహ్లీ 11 బంతుల్లో 15 పరుగులు మాత్రమే చేసి నిరాశపరిచాడు. కోహ్లీ అవుటైన సమయంలో ట్రావిస్ హెడ్ అతడిని ఉద్దేశించి.. “మైదానంలో భారీ షాట్లు కొట్టు” అంటూ స్లెడ్జింగ్ చేశాడు. దీనికి కింగ్ కోహ్లీ కూడా తనదైన శైలిలో ఘాటుగానే సమాధానమిచ్చాడు. “నువ్వే వచ్చి ఆఫ్ స్పిన్ బౌలింగ్ వేయ్.. అప్పుడు చూపిస్తా భారీ షాట్లు ఎలా కొడతారో! అయినా నువ్వు ఎప్పుడూ ఇంపాక్ట్ ప్లేయర్‌గానే వస్తావు కదా..” అంటూ సెటైర్ వేశాడు.

షేక్‌హ్యాండ్ వివాదం.. మంటలు రేపిన వీడియో!

మ్యాచ్ ముగిసిన అనంతరం ఆటగాళ్లు ఒకరికొకరు కరచాలనం చేసుకునే సమయంలో కోహ్లీ.. హెడ్‌కు షేక్‌హ్యాండ్ ఇవ్వకుండా ముందుకు వెళ్ళిపోయినట్లు కొన్ని వీడియోలు సోషల్ మీడియాలో హల్‌చల్ చేశాయి. దీంతో ఇరు జట్ల అభిమానులు సోషల్ మీడియాలో రెండు వర్గాలుగా విడిపోయి వార్‌కు దిగారు.

ట్రావిస్ హెడ్ భార్యపై సోషల్ మీడియా వేధింపులు!

మైదానంలో ఆటగాళ్ల మధ్య జరిగే స్లెడ్జింగ్ సహజమే అయినా కొందరు అభిమానులు మాత్రం ట్రావిస్ హెడ్ భార్య జెస్సికా ఇన్స్టాగ్రామ్ ఖాతాను టార్గెట్ చేస్తూ అసభ్యకరమైన కామెంట్లు, ట్రోలింగ్స్ చేయడం మొదలుపెట్టారు. ఈ దారుణమైన ప్రవర్తనపై జెస్సికా సోషల్ మీడియా వేదికగా తీవ్ర ఆవేదన వ్యక్తం చేశారు.

"2023 వన్డే వరల్డ్ కప్ తర్వాత ఎదురైన భయంకరమైన పరిస్థితులు మళ్లీ గుర్తొస్తున్నాయి. మ్యాచ్ ముగిసిన మరుసటి రోజు నుంచే నా సోషల్ మీడియా ఖాతాలు అసభ్యకర వ్యాఖ్యలతో నిండిపోయాయి. నన్నే కాకుండా నా కుటుంబ సభ్యులు, స్నేహితులను కూడా టార్గెట్ చేస్తున్నారు. అభిమానానికి హద్దులు ఉండాలి. క్రీడాకారుల కుటుంబాలు కూడా మనుషులేనని, వారికి కూడా మనోభావాలు ఉంటాయని గుర్తుంచుకోవాలి" ట్రావిస్ హెడ్ భార్య జెస్సికా ఆవేదన వ్యక్తం చేశారు.

'ఇది అభిమానం కాదు.. ఉన్మాదం!'.. మండిపడుతున్న మాజీలు

ఈ ఘటనపై తీవ్ర స్పందన వస్తోంది. క్రీడా స్ఫూర్తిని మంటగలిపేలా, ఆటగాళ్ల కుటుంబ సభ్యులను వేధించడంపై మాజీ క్రికెటర్లు, నిజమైన క్రికెట్ ప్రేమికులు ఆగ్రహం వ్యక్తం చేస్తున్నారు. మైదానంలోని గొడవలను మైదానంతోనే వదిలేయాలని, సోషల్ మీడియా వేదికగా మహిళలపై, కుటుంబాలపై ఇటువంటి దాడులు చేయడం ముమ్మాటికీ అంగీకరించలేని విషయమని నెటిజన్లు సైతం హితవు పలుకుతున్నారు.

నెక్స్ట్ మ్యాచ్‌పై పెరిగిన హైప్!

ఇప్పటికే బెంగళూరు, హైదరాబాద్ జట్లు ప్లే ఆఫ్స్‌కు అర్హత సాధించాయి. తాజా వివాదం నేపథ్యంలో.. ఈ రెండు జట్లు మరోసారి తలపడితే మైదానంలో వాతావరణం మరింత హీటెక్కడం ఖాయంగా కనిపిస్తోంది. కోహ్లీ-హెడ్ మధ్య తదుపరి పోరు ఎలా ఉండబోతుందోనని క్రికెట్ లోకం ఆసక్తిగా ఎదురుచూస్తోంది.