ప్రపంచ ఫుట్‌బాల్ సమరానికి తెరలేపిన ఫిఫా వరల్డ్ కప్

ప్రపంచవ్యాప్తంగా కోట్లాది మంది అభిమానులు ఆసక్తిగా ఎదురుచూస్తున్న ఫిఫా వరల్డ్ కప్–2026 రేపటి నుంచి జూన్ 11 ప్రారంభం కానుంది. జులై 19 వరకు సాగే ఈ మెగా టోర్నమెంట్ ఫుట్‌బాల్ ప్రేమికులకు నెలకుపైగా వినోదాన్ని పంచనుంది. ఈసారి అమెరికా సంయుక్త రాష్ట్రాలు, మెక్సికో, కెనడా సంయుక్తంగా ఆతిథ్యం ఇస్తుండటం విశేషం. మూడు దేశాలు కలిసి నిర్వహిస్తున్న తొలి వరల్డ్ కప్ ఇదే కావడం ప్రత్యేక ఆకర్షణగా మారింది.

ఈ టోర్నమెంట్ చరిత్రలోనే అతిపెద్దదిగా నిలవనుంది. గతంలో 32 జట్లతో నిర్వహించిన ప్రపంచకప్‌లో ఈసారి 48 జట్లు బరిలోకి దిగుతున్నాయి. దీంతో మొత్తం మ్యాచ్‌ల సంఖ్య కూడా 64 నుంచి 104కు పెరిగింది. అమెరికా, మెక్సికో, కెనడాలోని 16 వేదికల్లో మ్యాచ్‌లు జరగనున్నాయి. ప్రారంభ మ్యాచ్ మెక్సికో సిటీలోని ప్రసిద్ధ ఎస్టాడియో అజ్టెకా స్టేడియంలో జరగగా.. ఫైనల్ పోరు జులై 19న న్యూయార్క్ సమీపంలోని మెట్‌లైఫ్ స్టేడియంలో నిర్వహించనున్నారు.

కొత్త ఫార్మాట్‌తో మరింత ఉత్కంఠ

48 జట్లను 12 గ్రూపులుగా విభజించారు. ప్రతి గ్రూపులో నాలుగు జట్లు ఉంటాయి. గ్రూప్ దశలో ప్రతి జట్టు మూడు మ్యాచ్‌లు ఆడుతుంది. ప్రతి గ్రూపు నుంచి తొలి రెండు స్థానాల్లో నిలిచిన జట్లతో పాటు, అన్ని గ్రూపుల్లో అత్యుత్తమంగా నిలిచిన ఎనిమిది మూడో స్థాన జట్లు కూడా నాకౌట్ దశకు అర్హత సాధిస్తాయి. దీంతో మొత్తం 32 జట్లు రౌండ్ ఆఫ్ 32లో పోటీపడతాయి. ఈ కొత్త ఫార్మాట్ కారణంగా పోటీ మరింత ఆసక్తికరంగా మారనుంది.

ఫేవరెట్లుగా స్పెయిన్, ఫ్రాన్స్, ఇంగ్లాండ్

ప్రస్తుత ఫామ్, జట్ల బలం, యువ ఆటగాళ్ల ప్రతిభ ఆధారంగా స్పెయిన్‌ను ఈసారి టోర్నీకి ప్రధాన ఫేవరెట్‌గా విశ్లేషకులు పేర్కొంటున్నారు. ఫ్రాన్స్, ఇంగ్లాండ్ జట్లు కూడా టైటిల్ రేసులో బలంగా కనిపిస్తున్నాయి. అదేవిధంగా బ్రెజిల్, పోర్చుగల్, డిఫెండింగ్ చాంపియన్ అర్జెంటీనా జట్లను కూడా విస్మరించలేమని క్రీడా నిపుణులు చెబుతున్నారు.

భారత్‌కు మరోసారి నిరాశ

ఈసారి కూడా భారత జట్టు వరల్డ్ కప్‌కు అర్హత సాధించలేకపోయింది. ఆసియా క్వాలిఫయర్స్‌లోనే భారత జట్టు పోటీ నుంచి నిష్క్రమించింది. అయినప్పటికీ దేశంలోని ఫుట్‌బాల్ అభిమానులు టోర్నీని ఆసక్తిగా వీక్షించేందుకు సిద్ధమవుతున్నారు.

48 జట్లు, మూడు దేశాల ఆతిథ్యం, 104 మ్యాచ్‌లు, సరికొత్త ఫార్మాట్‌తో ఫిఫా వరల్డ్ కప్–2026 ప్రపంచ ఫుట్‌బాల్ చరిత్రలో మరో మైలురాయిగా నిలవనుంది. రాబోయే 39 రోజుల పాటు ఫుట్‌బాల్ ప్రపంచం మొత్తం ఈ మహాసమరంపైనే దృష్టి సారించనుంది.