డల్లాస్ ‘డప్పుల’ దెబ్బ.. అమెరికన్ల నిద్రకు ‘శుభం కార్డు’ వేస్తున్న దేశీ వెడ్డింగ్స్!

మన ఊర్లో పెళ్లి అంటే పది ఊర్లకి తెలియాలి.. కానీ అమెరికాలో మన పెళ్లి అంటే పక్క వీధిలో ఉండే అమెరికన్‌కి 'హార్ట్ ఎటాక్' రావాలి అన్నట్లుగా తయారైంది పరిస్థితి. డల్లాస్ శివారు ప్రాంతాల్లో అర్థరాత్రి దాటిన తర్వాత కూడా మోగుతున్న మన డీజేల దెబ్బకు.. స్థానిక రాంచ్ నివాసితులు ఇప్పుడు తమ పశువుల కంటే ఎక్కువగా భారతీయుల 'బారాత్'లకే భయపడిపోతున్నారు.

అక్కడక్కడ గుర్రాల మీద పెళ్లికొడుకు ఊరేగింపులు చూసి మురిసిపోయిన అమెరికన్లు, ఇప్పుడు రాత్రి 11 గంటల తర్వాత వినబడుతున్న "బుల్లెట్టు బండి" పాటల హోరుకు.. తమ కౌబాయ్ హ్యాట్లను పక్కన పడేసి పోలీసులకు ఫోన్లు చేస్తున్నారు. "సంప్రదాయం" పేరుతో స్పీకర్లను చించివేస్తున్న మన ఉత్సాహం చూస్తుంటే త్వరలో డల్లాస్ వీధుల్లో పోలీసులు 'నాటు నాటు' స్టెప్పులకు బదులు 'లాఠీ చార్జ్' స్టెప్పులు వేయించేలా ఉన్నారని స్థానికులు గుసగుసలాడుకుంటున్నారు. ఆనందం హద్దులు దాటి పొరుగువారి బెడ్ రూమ్ కిటికీలను వణికిస్తుంటే అది సంస్కృతి అనిపించుకుంటుందో లేక 'ధ్వని కాలుష్యం' అనిపించుకుంటుందో నిర్వాహకులే ఆలోచించుకోవాలి!

అమెరికాలోని టెక్సాస్ రాష్ట్రం.. ముఖ్యంగా డల్లాస్-ఫోర్ట్ వర్త్ మెట్రోప్లెక్స్ ప్రాంతం గత దశాబ్ద కాలంలో భారతీయ అమెరికన్లకు ప్రధాన నిలయంగా మారింది. ఇక్కడి భారతీయ సమాజం ఆర్థికంగా సామాజికంగా ఎంతో ఎత్తుకు ఎదిగింది. అయితే అదే స్థాయిలో పెరుగుతున్న భారతీయ వివాహాలు, ప్రైవేట్ వేడుకలు ప్రస్తుతం స్థానిక నివాసితులకు, ప్రత్యేకించి అమెరికన్ రాంచ్ కమ్యూనిటీలకు కంటిమీద కునుకు లేకుండా చేస్తున్నాయి. ఇటీవల కాలంలో డల్లాస్ శివారు ప్రాంతాల్లో జరుగుతున్న వేడుకలపై స్థానికుల నుంచి పెద్ద ఎత్తున ఫిర్యాదులు వెల్లువెత్తుతున్నాయి.

అసలు సమస్య ఏమిటి?

డల్లాస్ పరిసరాల్లోని వివాహ వేదికలు, ఫామ్ హౌస్‌లు, రాంచ్‌లలో నిర్వహించే వివాహ వేడుకలు భారతీయ సంప్రదాయం ప్రకారం ఎంతో వైభవంగా జరుగుతున్నాయి. అయితే ఈ ఆనందం పరిధి దాటి ఇతరులకు ఇబ్బందిగా మారుతోందని విమర్శలు వస్తున్నాయి. రాత్రి 11 గంటలు దాటిన తర్వాత కూడా భారీ శబ్దంతో కూడిన డీజే సంగీతం వినిపించడం స్థానికులను ఆగ్రహానికి గురి చేస్తోంది. నివాస ప్రాంతాలకు దగ్గరగా ఉండే బహిరంగ ప్రదేశాల్లో గట్టిగా అరుపులు, బాణసంచా కాల్చడం వల్ల ప్రశాంతంగా ఉండాలనుకునే రాంచ్ నివాసితులకు తీవ్ర అసౌకర్యం కలుగుతోంది. పరిమితికి మించి అతిథులు రావడం, రోడ్ల పక్కన అస్తవ్యస్తంగా వాహనాలు నిలపడం వల్ల స్థానిక రవాణాకు ఆటంకం ఏర్పడుతోంది.

చట్టపరమైన చిక్కులు.. పెరుగుతున్న ఆందోళన

ఈ వ్యవహారంపై ఇప్పటికే కొన్ని కౌంటీల్లో నివాసితులు.. రాంచ్ ఓనర్స్ అసోసియేషన్లు ఏకమవుతున్నాయి. స్థానిక పోలీసులకు, సిటీ కౌన్సిల్ అధికారులకు అధికారికంగా ఫిర్యాదులు చేసేందుకు వారు సిద్ధమవుతున్నారు. అమెరికాలోని చట్టాల ప్రకారం 'నాయిస్ ఆర్డినెన్స్' నిబంధనలు చాలా కఠినంగా ఉంటాయి. నిబంధనలు ఉల్లంఘిస్తే వేదిక యజమానులతో పాటు ఈవెంట్ నిర్వాహకులపై కూడా భారీగా ఫైన్లు పడే అవకాశం ఉంది. నిరంతరం ఫిర్యాదులు అందే ఈవెంట్ సెంటర్ల లైసెన్స్‌లను అధికారులు రద్దు చేసే ప్రమాదం ఉంది. వేడుక మధ్యలోనే పోలీసులు వచ్చి సంగీతాన్ని నిలిపివేయడం వల్ల శుభకార్యాల్లో అపశ్రుతి చోటు చేసుకునే అవకాశం ఉంది.

భారతీయ సమాజ ప్రతిష్టపై ప్రభావం

డల్లాస్‌లో భారతీయులు అత్యంత విద్యావంతులుగా సంస్కారవంతులుగా పేరు తెచ్చుకున్నారు. కానీ కొందరి బాధ్యతారాహిత్యం వల్ల మొత్తం భారతీయ కమ్యూనిటీపై ప్రతికూల ముద్ర పడే ప్రమాదం ఉందని సామాజిక విశ్లేషకులు ఆందోళన వ్యక్తం చేస్తున్నారు. "మన సంస్కృతిని, వేడుకలను ప్రదర్శించుకోవడం తప్పు కాదు.. కానీ అది పొరుగువారి శాంతిని హరించకూడదు" అని స్థానిక తెలుగు సంఘాల నాయకులు అభిప్రాయపడుతున్నారు.

నిర్వాహకులకు సూచనలు

భవిష్యత్తులో ఇబ్బందులు కలగకుండా ఉండాలంటే భారతీయ సమాజ పెద్దలు, ఈవెంట్ ప్లానర్లు కొన్ని కీలక జాగ్రత్తలు తీసుకోవాలని కోరుతున్నారు. రాత్రి 10 లేదా 11 గంటల తర్వాత సంగీతాన్ని పూర్తిగా నిలిపివేయడం లేదా ఇండోర్ మాత్రమే పరిమితం చేయడం ఉత్తమం. వేడుక జరిగే ప్రాంతంలోని పొరుగువారికి ముందుగానే సమాచారం ఇచ్చి వారికి ఇబ్బంది కలగకుండా చూస్తామని హామీ ఇవ్వడం మంచి పద్ధతి. వెన్యూ యజమానులు విధించే షరతులను అతిథులు కూడా పాటించేలా నిర్వాహకులు పర్యవేక్షించాలి. పార్కింగ్ , బాణసంచా విషయంలో స్థానిక నిబంధనలను తూచా తప్పకుండా పాటించాలి.

సెలబ్రేషన్స్ అనేవి మధుర జ్ఞాపకాలుగా మిగిలిపోవాలి తప్ప ఇతరులకు చేదు అనుభవాలను మిగల్చకూడదు. అమెరికా వంటి దేశాల్లో వ్యక్తిగత స్వేచ్ఛతో పాటు పొరుగువారి ప్రశాంతతకు కూడా సమాన ప్రాధాన్యత ఉంటుంది. కాబట్టి డల్లాస్ భారతీయులు తమ సంప్రదాయాలను గౌరవిస్తూనే స్థానిక చట్టాలను, ప్రజల ప్రశాంతతను గౌరవించి 'సభ్య సమాజానికి' ఆదర్శంగా నిలవాల్సిన అవసరం ఎంతైనా ఉంది.