భారతీయులకు రొమేనియా రెడ్ కార్పెట్.. ఏటా ఎంత మంది వెళ్తున్నారంటే?

ఒక్క ట్రంప్ పంపించినంత మాత్రాన ప్రపంచంలో ఏ ఇతర దేశాలు లేవా? ఏంటి భారతీయులంటే పనిలో చిచ్చరపిడుగులని ప్రపంచం మొత్తం తెలుసు కాబట్టి ఇతర దేశాలు భారతీయులకు రెడ్ కార్పెట్ పరుస్తుంది. భారత్, రొమేనియా మధ్య తాజాగా జరిగిన ద్వైపాక్షిక సమావేశం కేవలం ఆర్థిక చర్చ కాదు.. కొత్త అవకాశాలకు నాందీ. బుకారెస్ట్‌లో భారత వాణిజ్య, పరిశ్రమల కేంద్ర మంత్రి జితిన్ ప్రసాద్, రొమేనియా కార్మిక, సామాజిక రక్షణ మంత్రి పెట్రె ఫ్లోరిన్ మనోల్ మధ్య జరిగిన సమావేశం రెండు దేశాల సహకారానికి కొత్త దిశను చూపించింది. ఈ చర్చల ఫలితంగా రొమేనియా ప్రభుత్వం ప్రతి సంవత్సరం 30 వేల మంది భారతీయులకు ఉపాధి అవకాశాలు కల్పించేందుకు అంగీకరించింది.

సహకారానికి కొత్త పునాది..

ఈ ఒప్పందం భారత-రొమేనియా సంబంధాల్లో ఒక కీలక మలుపు.

రొమేనియా ప్రస్తుతం యూరోప్‌లో వేగంగా ఎదుగుతున్న ఆర్థిక వ్యవస్థల్లో ఒకటి. కాని ఆ దేశంలో నైపుణ్య కార్మికుల కొరత తీవ్రంగా ఉంది.

ప్రత్యేకంగా కన్‌స్ట్రక్షన్‌, ఐటీ, పోస్టల్‌, లాజిస్టిక్స్‌ రంగాల్లో అనేక ఉద్యోగాలు ఖాళీగా ఉన్నాయి. పరిష్కారంగా, రొమేనియా ప్రభుత్వం నాన్-యూరోపియన్‌ దేశాల నుంచి స్కిల్డ్ వర్కర్లను తీసుకురావాలని నిర్ణయించింది. ఆలోచనలోనే కాకుండా, ఆచరణలోనూ భారత నిపుణులకే ప్రాధాన్యం ఇవ్వాలని రొమేనియా స్పష్టంచేసింది. జితిన్ ప్రసాద్ మాట్లాడుతూ.. ‘ఇది భారత యువతకు కొత్త ద్వారం. నైపుణ్యం ఉన్న ప్రతి భారతీయుడు ఇప్పుడు యూరోపియన్ మార్కెట్‌లో తన స్థానం సంపాదించగలడు’ అని అన్నారు.

వృత్తి, భాషా శిక్షణకు ప్రత్యేక మార్గం..

ఈ ఒప్పందం కేవలం ఉద్యోగ అవకాశాలకే పరిమితం కాదు.. నైపుణ్యాభివృద్ధి కూడా కేంద్రం. రొమేనియా, భారత్‌ కలిసి ఒక ‘భారతీయ వృత్తి మార్గం (Employment Pathway)’ సృష్టించబోతున్నాయి.

దీని కింద భారతీయ కార్మికులకు భాషా శిక్షణ, సాంస్కృతిక పరిచయం, వృత్తి ప్రామాణికత పరీక్షలు వంటి అంశాలు ఉంటాయి. ఉద్యోగ భద్రత, వేతన హామీలు, సామాజిక రక్షణ వంటి అంశాలపై రెండు దేశాలు ప్రత్యేక చట్టపరమైన అవగాహన కుదుర్చుకుంటున్నాయి. ఈ విధంగా, భారతీయులు రొమేనియాలో స్థిరమైన, న్యాయపరమైన ఉపాధి అవకాశాలను పొందగలరని అధికారులు స్పష్టం చేశారు.

ఆర్థిక ప్రాధాన్యం..

ఈ ఒప్పందం రొమేనియాకు అవసరం అయినంతగానే, భారతదేశానికి లాభదాయకం. దేశంలో పెరుగుతున్న నైపుణ్య యువశక్తికి ఇది ఒక అంతర్జాతీయ వేదిక. అదే సమయంలో విదేశీ మారకద్రవ్య ప్రవాహం పెరగడం.. భారత్‌–యూరోప్‌ సంబంధాలు బలోపేతం కావడం వంటి ప్రయోజనాలు కూడా ఉన్నాయి. ఇది ‘మేక్ ఇన్ ఇండియా’ భావనను ‘వర్క్ ఫర్ ది వరల్డ్‌’ దిశలోకి తీసుకువెళ్లే అడుగు. భారత ప్రభుత్వ అంచనా ప్రకారం.. 2025 చివరినాటికి రొమేనియాలో పని చేసే భారతీయుల సంఖ్య లక్ష దాటే అవకాశం ఉంది.

సాంస్కృతిక సమన్వయానికి కొత్త దారులు..

రొమేనియా యూరోపియన్ యూనియన్‌లో భాగమైన దేశం. అక్కడ పనిచేసే భారతీయులకు ఇది కొత్త సాంస్కృతిక అనుభవం. ఇది కేవలం ఆర్థిక భాగస్వామ్యం కాదు. రెండు దేశాల మధ్య సాంస్కృతిక, విద్యా, టెక్నాలజీ మార్పిడులకు కూడా మార్గం సుగమం చేస్తుంది. రొమేనియా ప్రభుత్వం కూడా భారతీయ కార్మికుల క్రమశిక్షణ, నైపుణ్యాన్ని ప్రశంసిస్తూ ‘India is a reliable partner in building modern Romania’ అని వ్యాఖ్యానించింది.

ఈ ఒప్పందం వెనుక ఉన్న అసలు భావం నైపుణ్యమే సరిహద్దులను దాటించే శక్తి. భారత యువతకు ఇది ఒక గౌరవప్రదమైన అవకాశం, రొమేనియాకు ఇది స్థిర అభివృద్ధికి వనరు. ఇలాంటి ద్వైపాక్షిక ఒప్పందాలు మన దేశం ప్రపంచంలో ‘మానవ వనరుల శక్తి కేంద్రం’గా నిలబడుతున్నదని సాక్ష్యంగా నిలుస్తాయి.