వర్క్ ఫ్రమ్ హోమ్ చేస్తే అప్రైజల్ కట్? టీసీఎస్ కఠిన నిర్ణయం!

ఐటీ రంగంలో 'వర్క్ ఫ్రమ్ హోమ్' యుగం ముగిసిపోతోందా? ఉద్యోగులు ఆఫీసులకు రాకపోతే జీతాల పెంపుపై వేటు పడనుందా? అంటే అవుననే అంటున్నాయి తాజా పరిణామాలు. దేశీయ ఐటీ దిగ్గజం టాటా కన్సల్టెన్సీ సర్వీసెస్ (టీసీఎస్) తీసుకున్న ఒక సంచలన నిర్ణయం ఇప్పుడు సాఫ్ట్‌వేర్ ఉద్యోగుల్లో వణుకు పుట్టిస్తోంది.

ఆఫీసుకు వస్తేనే అప్రైజల్!

కోవిడ్ తర్వాత కూడా ఇంటి నుంచే పని చేసేందుకు మొగ్గు చూపుతున్న ఉద్యోగులకు టీసీఎస్ గట్టి షాక్ ఇచ్చింది. వారానికి 5 రోజులు కచ్చితంగా ఆఫీసుకు రావాలని గతంలోనే ఆదేశించిన కంపెనీ ఇప్పుడు ఆ నిబంధనను అమలు చేయడంలో మరింత కఠినంగా వ్యవహరిస్తోంది. ఆఫీస్ నుంచి పని చేయని వర్క్ ఫ్రం హోం చేసే ఉద్యోగులకు ఈ ఏడాది వార్షిక అప్రైజల్స్‌ను నిలిపివేసినట్లు సమాచారం.

కంపెనీ కఠిన వైఖరికి కారణాలివే

టీసీఎస్ తన కొత్త నిబంధనల్లో కొన్ని కీలక అంశాలను ప్రామాణికంగా తీసుకుంటోంది. ఉద్యోగి వారానికి ఎన్ని రోజులు ఆఫీసుకు వస్తున్నారు? ఆఫీసులో గడిపే పని గంటలు లెక్కించబడుతున్నాయి.

కంపెనీ నిబంధనలను పాటించని వారికి ప్రమోషన్లు, వేతన పెంపుల్లో ప్రాధాన్యత తగ్గించడం చేస్తున్నారు. ఈ నిబంధనల ప్రకారం ఆఫీస్ అటెండెన్స్ తక్కువగా ఉన్న చాలా మంది ఉద్యోగులకు తాజాగా అందాల్సిన అప్రైజల్ మెయిల్స్ అందలేదని తెలుస్తోంది.

ఉద్యోగుల్లో వ్యక్తమవుతున్న ఆందోళన

కంపెనీ తీసుకున్న ఈ ఆకస్మిక నిర్ణయంపై ఉద్యోగులు ఆందోళన చెందుతున్నారు. వ్యక్తిగత కారణాలు ఆరోగ్య సమస్యలు లేదా సుదూర ప్రాంతాల నుంచి ప్రయాణం చేయాల్సి రావడం వల్ల పూర్తిస్థాయిలో ఆఫీసుకు రాలేకపోతున్నామని కొందరు వాపోతున్నారు. అయితే ఉత్పాదకత పెంచేందుకే ఈ నిర్ణయం తీసుకున్నామని కంపెనీ వర్గాలు స్పష్టం చేస్తున్నాయి.

ఐటీ రంగంపై దీని ప్రభావం ఎలా ఉంటుంది?

టీసీఎస్ తీసుకున్న ఈ నిర్ణయం కేవలం ఆ కంపెనీకే పరిమితం కాకపోవచ్చు. ఇతర ఐటీ దిగ్గజాలు కూడా ఇదే బాటలో నడిచే అవకాశం ఉందని విశ్లేషకులు భావిస్తున్నారు. ఇకపై పూర్తిస్థాయి ఆఫీస్ కల్చర్ వైపు కంపెనీలు అడుగులు వేయనున్నాయి. కేవలం చేసే పని మాత్రమే కాకుండా ఆఫీసులో ఉండే ఉనికిని కూడా పనితీరులో భాగంగా పరిగణించనున్నారు.

మొత్తానికి ఐటీ ఉద్యోగులకు కార్యాలయ హాజరు అనేది ఇకపై కేవలం నిబంధన మాత్రమే కాదు, వారి కెరీర్ ప్రగతికి జీతాల పెంపునకు కీలక ఆధారంగా మారనుంది.