అమెరికాలో భార్యతో గొడవ పడి ఎనిమిది మంది చిన్నారులను పొట్టనబెట్టుకున్న మాజీ సైనికుడు

అమెరికాలోని లూసియానా రాష్ట్రంలో చోటుచేసుకున్న ఒక అత్యంత క్రూరమైన సామూహిక కాల్పుల ఘటన ప్రపంచాన్ని దిగ్భ్రాంతికి గురిచేసింది. కన్నతండ్రే కాలయముడిగా మారి తన స్వంత పిల్లలపైనే తూటాల వర్షం కురిపించిన ఈ ఉదంతం.. మానవ సంబంధాలలోని వికృత రూపానికి అద్దం పడుతోంది. ష్రెవ్‌పోర్ట్ నగరంలో జరిగిన ఈ దారుణం అమెరికా సమాజంలో తుపాకీ సంస్కృతి, గృహహింసపై జరుగుతున్న చర్చను మళ్లీ మొదటికి తెచ్చింది.

నిద్రలోనే చిన్నారుల బలి

ప్రాథమిక విచారణ ప్రకారం.. 31 ఏళ్ల షమార్ ఎల్కిన్స్ అనే వ్యక్తి ఈ ఘోరానికి ఒడిగట్టాడు. అమెరికా కాలమానం ప్రకారం ఆదివారం తెల్లవారుజామున సుమారు 6 గంటల సమయంలో అందరూ గాఢనిద్రలో ఉన్న వేళ ఈ మారణకాండ మొదలైంది. తన భార్యతో ఏర్పడిన తీవ్ర వాగ్వాదం చివరకు ఎనిమిది మంది చిన్నారుల ప్రాణాలు తీసే వరకు వెళ్ళింది. మరణించిన వారిలో ఏడుగురు ఎల్కిన్స్ స్వంత సంతానం కావడం గమనార్హం. మృతుల వయస్సు కేవలం 3 నుండి 11 ఏళ్ల మధ్య ఉండటం ఈ ఘటనలోని తీవ్రతను, విషాదాన్ని రెట్టింపు చేస్తోంది.

పోలీసుల కథనం ప్రకారం.. ఎల్కిన్స్ చిన్నారులు నిద్రిస్తున్న సమయంలోనే వారి తలలపై కాల్పులు జరిపాడు. ఇంట్లోని ఏడుగురు పిల్లల మృతదేహాలు ఒకేచోట లభించగా, మరో చిన్నారి ప్రాణభయంతో బయటకు పారిపోతుండగా వెంబడించి మరీ కాల్చి చంపినట్లు సమాచారం. ఈ దాడి నుండి ఒక బాలుడు మాత్రం గోడ దూకి తప్పించుకోగలిగాడు, అయితే ఆ ప్రయత్నంలో తీవ్రంగా గాయపడి ప్రస్తుతం ఆసుపత్రిలో మృత్యువుతో పోరాడుతున్నాడు.

విచ్ఛిన్నమైన బంధాలు.. గృహహింస

ఈ దారుణానికి ప్రధాన కారణం గృహహింస.. దంపతుల మధ్య ఉన్న విభేదాలని పోలీసులు అనుమానిస్తున్నారు. ఎల్కిన్స్ తన భార్య నుండి విడిపోవడానికి సిద్ధమవుతున్నాడని.. ఆ వివాదంపై సోమవారం కోర్టులో హాజరుకావాల్సి ఉందని తెలుస్తోంది. ఆ కోపంతోనే మొదట తన భార్యపై కాల్పులు జరిపి గాయపరిచాడు. ఆమె ప్రస్తుతం ప్రాణాపాయ స్థితిలో ఆసుపత్రిలో చికిత్స పొందుతోంది.

ఎల్కిన్స్ గత చరిత్రను పరిశీలిస్తే అతను లూసియానా ఆర్మీ నేషనల్ గార్డ్‌లో పనిచేసినట్లు తెలిసింది. 2019లో అక్రమంగా ఆయుధాలు కలిగి ఉన్న కేసులో అరెస్ట్ అయినట్లు రికార్డులు చెబుతున్నాయి. ఆర్మీలో శిక్షణ పొందిన వ్యక్తి కావడంతో తుపాకీ వాడకంలో అతనికి ఉన్న నైపుణ్యం ఈ మారణకాండకు మరింత దోహదం చేసింది.

ముగిసిన నిందితుడి అధ్యాయం

ఘటన గురించి సమాచారం అందిన వెంటనే రంగంలోకి దిగిన పోలీసులు నిందితుడిని పట్టుకునే ప్రయత్నం చేశారు. అయితే ఎల్కిన్స్ లొంగిపోవడానికి నిరాకరించి పోలీసులపైకి తిరగబడటంతో ఆత్మరక్షణ కోసం పోలీసులు జరిపిన కాల్పుల్లో అతను అక్కడికక్కడే మరణించాడు.

అమెరికాలో పెరుగుతున్న తుపాకీ సంస్కృతి

గత రెండేళ్లలో అమెరికాలో జరిగిన అత్యంత భయానక సామూహిక కాల్పుల ఘటనల్లో ఇది ఒకటిగా నిలిచిపోతుంది.

ఈ ఘటన తర్వాత అమెరికాలో తుపాకీ నియంత్రణ చట్టాల పై మళ్లీ డిమాండ్లు వెల్లువెత్తుతున్నాయి. గృహహింస ,తీవ్రమైన మానసిక ఒత్తిడిలో ఉన్న వ్యక్తుల చేతికి ఆయుధాలు అందడం ఎంత ప్రమాదకరమో ఈ ఉదంతం నిరూపించింది.

ఒకే కుటుంబానికి చెందిన ఎనిమిది మంది చిన్నారులు కన్నతండ్రి చేతిలోనే బలవ్వడం లూసియానా ప్రజలను కన్నీటి పర్యంతం చేస్తోంది. ఈ ఘోరకలిపై విచారణ కొనసాగుతోంది, అయితే అభం శుభం తెలియని ఆ పసిపాపల ప్రాణాలు మాత్రం తిరిగిరాని లోకాలకు వెళ్లిపోయాయి.