మనుషుల్లో 'సిక్స్త్ సెన్స్' నిజమే.. శాస్త్రవేత్తల పరిశోధనల్లో తేలిన ఆసక్తికర నిజాలు

మనుషులకు సాధారణంగా ఐదు ఇంద్రియాలు చూపు, వినికిడి, స్పర్శ, రుచి, వాసన ఉంటాయని మనకు తెలుసు. వీటి ద్వారానే బాహ్య ప్రపంచాన్ని మనం గ్రహిస్తాం. అయితే వీటన్నింటికీ మించి మనిషికి 'సిక్స్త్ సెన్స్' కూడా ఉంటుందని శాస్త్రవేత్తలు చెబుతున్నారు. సినిమాల్లో చూపించేలా ఇది భవిష్యత్తును ముందే ఊహించే శక్తో, లేదా దయ్యాలు, భూతాలను చూసే అద్భుత సామర్థ్యమో కాదు. ఇది మన శరీరానికి సంబంధించిన ఒక అద్భుతమైన జీవసంబంధ వ్యవస్థ. శాస్త్రీయ పరిభాషలో దీనిని "ఇంటెరోసెప్షన్" అని పిలుస్తారు. తాజా పరిశోధనల ప్రకారం ఈ అంతర్గత జ్ఞానమే మనల్ని శారీరకంగా, మానసికంగా ఆరోగ్యంగా ఉంచడంలో కీలక పాత్ర పోషిస్తోంది.

అసలు 'ఇంటెరోసెప్షన్' అంటే ఏమిటి?

బాహ్య ప్రపంచంలో జరిగే మార్పులను గ్రహించడానికి ఐదు ఇంద్రియాలు తోడ్పడితే.. మన శరీరంలోపల జరిగే మార్పులను గ్రహించి, మెదడుకు చేరవేసే వ్యవస్థనే ఇంటెరోసెప్షన్ అంటారు.

ఆకలి, దాహం వేయడం..శరీరానికి ఇంధనం, నీరు అవసరమని గుర్తించడం... గుండె చప్పుడు, శ్వాసలో మార్పులు.. ఆందోళన లేదా శారీరక శ్రమ పెరిగినప్పుడు గుండె వేగం పెరగడాన్ని గమనించడం... చలి లేదా వేడిని లోపలి నుంచి గ్రహించడం... శరీరానికి విశ్రాంతి కావాలని లేదా ఎక్కడైనా గాయం జరిగిందని మెదడు అలర్ట్ చేయడం... ఈ సంకేతాలన్నీ ఇంటెరోసెప్షన్‌లో భాగమే. మన అంతర్గత అవయవాల నుంచి నిరంతరం మెదడుకు అందుతున్న ఈ సమాచారమే మన జీవక్రియను సమతుల్యంగా ఉంచుతుంది.

మానసిక ఆరోగ్యానికి రక్షణ కవచం

పరిశోధకుల అభిప్రాయం ప్రకారం.. ఈ ‘సిక్స్త్ సెన్స్’ కేవలం శారీరక అవసరాలకే పరిమితం కాదు, మన ఎమోషనల్ హెల్త్ ను కూడా శాసిస్తుంది. ఎవరైతే తమ శరీర అంతర్గత సంకేతాలను వేగంగా, స్పష్టంగా గుర్తించగలరో వారు తమ భావోద్వేగాలను చాలా బాగా నియంత్రించగలరు. కోపం, భయం, ఆందోళన వంటివి మొదలవుతున్నప్పుడే వారి శరీరం పంపే సంకేతాలను బట్టి వారు త్వరగా కోలుకుంటారు. దీనికి విరుద్ధంగా.. ఈ సామర్థ్యం బలహీనంగా ఉన్నవారిలో మానసిక సమస్యలు తలెత్తే అవకాశం ఎక్కువ. శరీరం పంపే ఒత్తిడి సంకేతాలను సరిగ్గా గుర్తించలేకపోవడం వల్ల ఆందోళన , డిప్రెషన్ , ఈటింగ్ డిజార్డర్స్ వంటి సమస్యల బారిన పడే ప్రమాదం ఉందని శాస్త్రవేత్తలు హెచ్చరిస్తున్నారు.

మీ 'సిక్స్త్ సెన్స్'ను పెంచుకోవడం ఎలా?

మంచి విషయమేమిటంటే ఈ అంతర్గత గ్రహణ శక్తిని మనం నిరంతర సాధన ద్వారా మెరుగుపరుచుకోవచ్చు. రోజులో కొంత సమయం ఏకాగ్రతతో ధ్యానం చేయడం వల్ల శరీరంలో జరిగే సూక్ష్మ మార్పులను గమనించే శక్తి పెరుగుతుంది. లోతైన శ్వాస తీసుకోవడం, వదలడం ద్వారా హృదయ స్పందనల రేటును గమనించవచ్చు. తల నుండి కాళ్ల వేళ్ల వరకు శరీరం ఎలా ఉందో ప్రతి భాగాన్ని మానసికంగా గమనించే ప్రక్రియ ఇంటెరోసెప్షన్‌ను అద్భుతంగా పెంచుతుంది. సరైన నిద్ర, శారీరక వ్యాయామం ద్వారా మెదడు-శరీరం మధ్య కమ్యూనికేషన్ మెరుగవుతుంది.

మొత్తంగా చూస్తే.. శాస్త్రవేత్తలు నిరూపించిన 'సిక్స్త్ సెన్స్' అనేది ఎలాంటి అతీంద్రియ మాయాజాలం కాదు. అది మన శరీరంలోనే దాగి ఉన్న ఒక అద్భుతమైన రక్షణ వ్యవస్థ. మన శరీరం మనతో ఏం మాట్లాడటానికి ప్రయత్నిస్తుందో నిశితంగా గమనించడం, దానికి తగినట్లుగా స్పందించడం అలవాటు చేసుకుంటే.. శారీరక దృఢత్వంతో పాటు అపారమైన మానసిక ప్రశాంతతను సొంతం చేసుకోవచ్చు. శరీరం పంపే సంకేతాలను నిర్లక్ష్యం చేయకుండా, వాటిని గౌరవించడమే నిజమైన ఆరోగ్యం.