73 ఏళ్ల వృద్ధ పంజాబీ మహిళ.. మానవత్వం మరిచిన అమెరికా చర్య

పంజాబ్‌కు చెందిన 73 ఏళ్ల హర్జీత్ కౌర్‌ అమెరికాలో మూడు దశాబ్దాలపాటు జీవనం గడిపి చివరికి ఊహించని పరిస్థితుల్లో స్వదేశానికి చేరుకోవాల్సి వచ్చింది. కాలిఫోర్నియాలో తన ఇద్దరు కుమారులతో కలిసి 1992 నుంచి ఈస్ట్ బే ప్రాంతంలో స్థిరపడిన ఆమెను, ఇమ్మిగ్రేషన్ అండ్ కస్టమ్స్ ఎన్ఫోర్స్మెంట్‌ (ICE) అధికారులు ఆకస్మికంగా అదుపులోకి తీసుకుని డిపోర్ట్ చేశారు.

నేలపై నిద్రించాల్సి వచ్చిన వృద్ధురాలు

ఆమె న్యాయవాది దీపక్ అహ్లువాలియా తెలిపిన వివరాల ప్రకారం.. డిపోర్ట్ చేసే విమానంలో హర్జీత్ కౌర్‌తో పాటు మరో 131 మందిని చిన్న చార్టర్డ్ ఎయిర్‌క్రాఫ్ట్‌లో తరలించారు. ఈ ప్రయాణంలో మౌలిక సదుపాయాలు లేకపోవడంతో, శస్త్రచికిత్సలు చేయించుకున్న ఆమె మోకాళ్ల నొప్పితోనే నేలపై నిద్రించాల్సి వచ్చిందని తెలిపారు. అంతేకాకుండా, షవర్ సౌకర్యం కూడా ఇవ్వలేదని ఆరోపించారు. ఒక దశలో అధికారులు ఆమెను బంధించాలని ప్రయత్నించగా, వయసు దృష్ట్యా మరొక అధికారి ఆ నిర్ణయాన్ని అడ్డుకున్నారని న్యాయవాది వెల్లడించారు.

నిబంధనలు పాటించినా.. మానవత్వం లేకుండా వ్యవహారం

హర్జీత్ కౌర్‌ 2012లో ఆశ్రయం కోసం దరఖాస్తు చేసినా తిరస్కరించబడింది. అయినప్పటికీ, ఆమె ఎప్పుడూ ICE అధికారుల వద్దకు ఆరు నెలలకు ఒకసారి విధిగా హాజరయ్యేది. 13 ఏళ్లుగా ఈ నియమాన్ని కచ్చితంగా పాటించిందని ఆమె కోడలు మంజీ కౌర్ తెలిపారు. “ఆమె వర్క్ పర్మిట్ కోసం ఎప్పుడూ దరఖాస్తు చేసేది.. ప్రతి సంవత్సరం పన్నులు కూడా క్రమం తప్పకుండా చెల్లించేది. చిన్న డ్రైవింగ్ వైలేషన్ కూడా లేదు” అని మంజీ పేర్కొన్నారు.

రాజకీయ నాయకుల విమర్శలు

ఈ ఘటనపై అమెరికా కాంగ్రెస్ సభ్యులు కూడా ఆగ్రహం వ్యక్తం చేశారు. కాలిఫోర్నియాకు చెందిన డెమొక్రటిక్ నాయకుడు జాన్ గారమండీ మాట్లాడుతూ “ఒక 73 ఏళ్ల మహిళను, అదీ నేరచరిత్ర లేని వ్యక్తిని ఇలా బలవంతంగా డిపోర్ట్ చేయడం సరైంది కాదు” అని ట్రంప్ ప్రభుత్వాన్ని తీవ్రంగా విమర్శించారు.

మళ్లీ చర్చల్లోకి ఇమ్మిగ్రేషన్ విధానాలు

హర్జీత్ కౌర్‌ వంటి వృద్ధ మహిళపై జరిగిన ఈ సంఘటన అమెరికా ఇమ్మిగ్రేషన్ విధానాలపై మరోసారి చర్చలు చెలరేగేలా చేసింది. న్యాయపరంగా కట్టుబడి ఉన్న వలసదారులపై ఇలాంటి కఠిన చర్యలు తీసుకోవడం, మానవత్వం లేకుండా వ్యవహరించడం తీవ్ర ఆగ్రహానికి దారితీస్తోంది. ఈ కేసు వలస విధానాల అమలులో సంస్కరణల అవసరాన్ని మరింతగా వెలుగులోకి తెచ్చింది.

73 ఏళ్ల వృద్ధురాలి డిపోర్టేషన్ కథనం ఇప్పుడు అమెరికాలో వలస విధానాల మానవీయ కోణంపై పెద్ద ప్రశ్నలు లేవనెత్తుతోంది.