Gen Z హాబిట్స్ మారాయి… మద్యం మార్కెట్‌కు భారీ దెబ్బ!

ఈతరం జెన్ జీ ఆలోచనలు, అలవాట్లు పూర్తిగా మారుతున్నాయి. ముఖ్యంగా మద్యం తాగే విషయంలో వారు మునుపటిలా ఆసక్తి చూపించడం లేదు. ఆరోగ్యంపై శ్రద్ధ పెరగడం, సరికొత్త లైఫ్‌స్టైల్ ట్రెండ్స్ ఫాలో అవ్వడం వల్ల ఆల్కహాల్‌కు దూరంగా ఉంటున్నారు. దీని ప్రభావం గ్లోబల్ లిక్కర్ మార్కెట్‌పై తీవ్రంగా పడింది. కేవలం నాలుగేళ్లలోనే ప్రపంచంలోని టాప్ మద్యం కంపెనీలు ఏకంగా 830 బిలియన్ల డాలర్స్ మార్కెట్ విలువను కోల్పోయాయి. ఆ వివరాలు చూద్దాం..

కంపెనీల మార్కెట్ వాల్యూ అతలాకుతలం:

బ్లూమ్‌బెర్గ్ రిపోర్ట్ ప్రకారం.. ప్రపంచవ్యాప్తంగా ఉన్న దాదాపు 50 ప్రధాన మద్యం కంపెనీల షేర్లు ఘోరంగా పడిపోయాయి. ఇక జూన్ 2021 నాటి పీక్ స్టేజ్‌తో పోలిస్తే ఇప్పుడు ఈ కంపెనీల మార్కెట్ వాల్యూ 46% మేర పతనమైంది. జనాలు మద్యం తాగడం తగ్గించడమే ఇందుకు ప్రధాన కారణమని మార్కెట్ నిపుణులు చెబుతున్నారు.

బ్రాండెడ్ కంపెనీల షేర్లలో భారీ క్షీణత:

మనం రెగ్యులర్‌గా వినే డియాజియో, పెర్నోడ్ రికార్డ్, జాక్ డానియెల్స్ లాంటి పెద్ద పెద్ద ఇంటర్నేషనల్ బ్రాండ్ల షేర్లు గత పదేళ్లలో ఎన్నడూ లేనంత కనిష్ట స్థాయికి పడిపోయాయి. ఇక చైనాకు చెందిన ఫేమస్ బ్రాండ్ 'క్వైచో ముతాయ్' షేర్లు కూడా 2021తో పోలిస్తే 40% పైగా నష్టపోయాయి.

మారిన కుర్రాళ్ల ట్రెండ్.. సెలబ్రిటీల ప్రభావం:

ఇప్పుడున్న యూత్ ఆల్కహాల్‌ను ఒక క్రేజీ విషయంగా చూడటం లేదు. హాలీవుడ్ స్టార్స్ టామ్ హాలండ్, కేటీ పెర్రీ లాంటి సెలబ్రిటీలు తాము మద్యానికి దూరంగా ఉంటున్నామని ప్రకటించడం కూడా కుర్రాళ్లపై బాగా ప్రభావం చూపించింది. ఇక 'నో-ఆల్కహాల్' లేదా 'ఆల్కహాల్ ఫ్రీ' లైఫ్‌స్టైల్‌ వైపు యువత మొగ్గు చూపుతోంది.

బరువు తగ్గే మందులు, ఇతర కారణాలు:

ఆరోగ్య సంస్థల హెచ్చరికల వల్ల కూడా జనాలు అలవాట్లు మార్చుకుంటున్నారు. దీనికి తోడు బరువు తగ్గే మందులు వాడుతున్న వారు కూడా మద్యానికి దూరంగా ఉంటున్నారు. అలాగే అమెరికా లాంటి దేశాల్లో గంజాయి ప్రత్యామ్నాయంగా మారడం, చైనాలో ప్రభుత్వ ఫంక్షన్లలో మద్యంపై నిషేధం విధించడం కూడా మార్కెట్‌ను దెబ్బతీశాయి.

ఆర్థిక సంక్షోభం కంటే పెద్ద దెబ్బ:

గతంలో వచ్చిన తీవ్రమైన ఆర్థిక సంక్షోభం కంటే ఇప్పుడు మద్యం అమ్మకాలపై పడిన దెబ్బ నాలుగు రెట్లు పెద్దదని బార్‌క్లేస్ విశ్లేషకులు చెబుతున్నారు. ఇక భవిష్యత్తులో కూడా మద్యం మార్కెట్ మునుపటిలా లాభాల బాట పట్టడం కష్టమేనని, ఈ మార్పు తాత్కాలికం కాదని వారు స్పష్టం చేస్తున్నారు.

ఆరోగ్యమే మహాభాగ్యం అనే సూత్రాన్ని నేటి తరం యువత గట్టిగా నమ్ముతోంది. విలాసాల కంటే ఫిట్‌నెస్‌కే ప్రాధాన్యత ఇస్తుండటంతో శతాబ్దాలుగా రాజ్యమేలుతున్న మద్యం సామ్రాజ్యం ఇప్పుడు ఊహించని నష్టాల్లో మునిగిపోయింది. ఇక ఈ ట్రెండ్ ఇలాగే కొనసాగితే మద్యం కంపెనీలు తమ బిజినెస్ మోడల్‌ను మార్చుకోక తప్పదు అంటున్నారు నిపుణులు.