ఫ్లైట్ ద్వారా దోమల ఎంట్రీ?మలేరియా అలర్ట్!

విమానంలో ప్రయాణించి వచ్చిన ఒక దోమ మనిషి ప్రాణాలను తీసిన విచిత్రమైన, ఘోర సంఘటన జర్మనీలో వెలుగు చూసింది. ఫ్రాంక్‌ఫర్డ్ అంతర్జాతీయ విమానాశ్రయంలో పనిచేసే ఆరుగురు సిబ్బంది ఇటీవల మలేరియా బారిన పడగా, అందులో ఒక ఉద్యోగి దారుణంగా ప్రాణాలు కోల్పోయారు. వేరే మలేరియా ప్రభావిత దేశం నుంచి ఫ్లైట్ ద్వారా వచ్చిన దోమల వల్లే ఈ ఇన్‌ఫెక్షన్ వ్యాపించిందని అనుమానిస్తున్నారు. దాంతో విమానాశ్రయంలో అధికారులు హై అలర్ట్ ప్రకటించి దోమలను పట్టుకునేందుకు ప్రత్యేక చర్యలు చేపట్టారు.

ఫ్రాంక్‌ఫర్డ్ ఎయిర్‌పోర్ట్‌లో విచిత్ర ఘటన – మలేరియాతో ఉద్యోగి మృతి:

జర్మనీలోనే అత్యంత రద్దీగా ఉండే ఫ్రాంక్‌ఫర్ట్ విమానాశ్రయంలో మలేరియా కలకలం రేపింది. ఎయిర్‌పోర్ట్‌లో పనిచేస్తున్న ఆరుగురు సిబ్బంది అకస్మాత్తుగా తీవ్ర అనారోగ్యానికి గురయ్యారు. ఇక వైద్య పరీక్షల్లో వారికి మలేరియా సోకినట్లు నిర్ధారణ కాగా, చికిత్స పొందుతూ ఒక ఉద్యోగి మరణించారు. మిగిలిన ఐదుగురు ప్రస్తుతం ఆస్పత్రిలో చికిత్స పొందుతున్నారు. ఇక ఏలినాటి ప్రయాణ చరిత్ర లేని స్థానిక ఉద్యోగులకు మలేరియా సోకడం, అందులోనూ ఒకరు చనిపోవడం అధికారులను తీవ్ర దిగ్భ్రాంతికి గురిచేసింది.

ఫ్లైట్‌లో దోమల ఎంట్రీ – అధికారుల అనుమానం:

జర్మనీలో సాధారణంగా తక్కువ ఉష్ణోగ్రతలు ఉండటం వల్ల అక్కడ మలేరియా సోకడం, వ్యాప్తి చెందడం చాలా అరుదు. అయితే మలేరియా ఎక్కువగా ఉన్న ఉష్ణమండల ప్రాంతాల నుంచి వచ్చిన ఏదో ఒక విమానంలో ఈ ప్రమాదకర దోమలు ఎయిర్‌పోర్ట్‌లోకి ప్రవేశించి ఉంటాయని ప్రజారోగ్య అధికారులు భావిస్తున్నారు. ఇక గతంలో జూలై నెలలో కూడా ఇలాగే నలుగురు ఉద్యోగులు మలేరియా బారిన పడ్డారని, అప్పట్లోనూ విమానం ద్వారానే దోమలు వచ్చాయని రాబర్ట్ కోచ్ ఇన్స్టిట్యూట్ నివేదించింది.వివరాల్లోకి వెళితే ..

దోమల వేట – ఎయిర్‌పోర్ట్‌లో ప్రత్యేక ట్రాప్‌లు:

ఈ ఘటనతో అప్రమత్తమైన ఎయిర్‌పోర్ట్ నిర్వహణ సంస్థ ఫ్రాపోర్ట్ విమానాశ్రయ ఆవరణలో ప్రత్యేక దోమల ఉచ్చులను (ట్రాప్స్) ఏర్పాటు చేసింది. ఈ ఉచ్చుల్లో పట్టుబడిన దోమలను వెంటనే పరిశోధనా ల్యాబ్‌కు పంపనున్నారు. ఇక అక్కడ వాటి జాతి ఏమిటి, అవి ఏ దేశం నుంచి లేదా ఏ విమానం ద్వారా వచ్చాయో శాస్త్రవేత్తలు విశ్లేషించనున్నారు. ఎయిర్‌పోర్ట్ సిబ్బంది ఎవరికైనా జ్వరం లేదా ఇతర లక్షణాలు కనిపిస్తే వెంటనే వైద్యులను సంప్రదించాలని హెచ్చరికలు జారీ చేశారు.

ఆలస్యమైన గుర్తింపు – పెరిగిన ప్రమాదం:

సాధారణంగా జర్మనీ ప్రజలు ఇతర దేశాలకు ప్రయాణించినప్పుడే మలేరియా బారిన పడుతుంటారు. కానీ ప్రయాణ చరిత్ర లేని ఎయిర్‌పోర్ట్ సిబ్బందికి మలేరియా రావడంతో వ్యాధిని ప్రారంభంలో గుర్తించడం ఆలస్యమైంది. ఇక వ్యాధి నిర్ధారణ ఆలస్యం కావడం వల్లే ఇన్ఫెక్షన్ తీవ్రమై ఒక ఉద్యోగి ప్రాణాలు కోల్పోవాల్సి వచ్చిందని నిపుణులు చెబుతున్నారు. ప్రపంచ ఆరోగ్య సంస్థ ప్రకారం కొన్ని రకాల దోమలు కుట్టడం వల్ల మాత్రమే ఈ ప్రమాదకర మలేరియా ఒకరి నుంచి మరొకరికి వ్యాపిస్తుంది.

విమానాల ద్వారా ప్రమాదకర క్రిములు, దోమలు ఇతర దేశాలకు సంక్రమించడం ప్రజారోగ్యానికి పెద్ద సవాలుగా మారింది. జర్మనీ లాంటి అభివృద్ధి చెందిన దేశంలోనే ఫ్లైట్ ద్వారా వచ్చిన దోమ ఒకరి ప్రాణం తీయడం గమనార్హం. ఇక అంతర్జాతీయ విమానాశ్రయాల్లో విమానాలను సరిగ్గా డిసిన్ఫెక్ట్ చేయడం, దోమల నివారణ చర్యలు కఠినంగా అమలు చేయడం ఎంత ముఖ్యమో ఈ ఘటన నిరూపిస్తోంది. ఇకపై ప్రతి విమానాశ్రయం ఈ తరహా ముప్పుపై నిరంతరం అప్రమత్తంగా ఉండాల్సిన అవసరం ఎంతైనా ఉంది.