ఫ్రాన్స్‌లో ధరల భారం.. హింసాత్మకంగా మారిన నిరసనలు.. 143 ఏళ్ల చారిత్రక టౌన్ హాల్‌కు నిప్పు!
ఈ ఆందోళనల సమయంలో కొన్ని విలాసవంతమైన దుకాణాలు, సూపర్ మార్కెట్లలో దోపిడీలు జరిగినట్లు నివేదికలు తెలిపాయి. పలు ప్రభుత్వ భవనాలు కూడా దాడులకు గురయ్యాయి.
ఫ్రాన్స్‌లో నిత్యావసర వస్తువుల ధరలు పెరగడం, తక్కువ వేతనాలు, ఆర్థిక ఇబ్బందులకు వ్యతిరేకంగా మొదలైన నిరసనలు శనివారం హింసాత్మకంగా మారాయి. పారిస్, లియోన్, మార్సెయి సహా పలు నగరాల్లో దాదాపు 8 లక్షల మంది రోడ్లపైకి వచ్చి తమ నిరసనను వ్యక్తం చేసినట్లు నివేదికలు వెల్లడించాయి.
మొదట ప్రశాంతంగా సాగిన ఈ ఆందోళనలు కొన్ని ప్రాంతాల్లో ఉద్రిక్తతలకు దారితీశాయి. కొందరు నిరసనకారులు రాళ్లు రువ్వడం, భవనాలకు నిప్పంటించడం, ప్రభుత్వ ఆస్తులను ధ్వంసం చేయడం వంటి ఘటనలకు పాల్పడినట్లు సమాచారం. సోషల్ మీడియాలో వచ్చిన పిలుపుల నేపథ్యంలో ఎల్లో వెస్ట్ ఉద్యమానికి మద్దతుగా విద్యార్థులు, కార్మిక సంఘాలు కూడా నిరసనల్లో పాల్గొన్నాయి.
ఈ ఆందోళనల సమయంలో కొన్ని విలాసవంతమైన దుకాణాలు, సూపర్ మార్కెట్లలో దోపిడీలు జరిగినట్లు నివేదికలు తెలిపాయి. పలు ప్రభుత్వ భవనాలు కూడా దాడులకు గురయ్యాయి.
లిమోజెస్ నగరంలో సుమారు 143 ఏళ్ల చరిత్ర కలిగిన టౌన్ హాల్‌కు నిప్పంటించడం తీవ్ర కలకలం రేపింది. మంటల కారణంగా భవనం పైకప్పులోని కొన్ని భాగాలు కూలిపోయినట్లు సమాచారం. మార్సెయి సహా ఇతర నగరాల్లోనూ ప్రభుత్వ భవనాలు దెబ్బతిన్నాయి.
పరిస్థితిని అదుపులోకి తీసుకురావడానికి పోలీసులు టియర్ గ్యాస్, వాటర్ క్యానన్లను ఉపయోగించారు. దేశవ్యాప్తంగా సుమారు 1,200 మంది నిరసనకారులను అదుపులోకి తీసుకున్నట్లు వార్తలు వచ్చాయి. ఘర్షణల్లో పలువురు పోలీసులు, పౌరులు గాయపడినట్లు సమాచారం.
హింస, ప్రభుత్వ ఆస్తుల ధ్వంసంపై ఫ్రాన్స్ అధ్యక్షుడు ఇమ్మాన్యుయేల్ మాక్రాన్ తీవ్రంగా స్పందించారు. దోపిడీలు, నిప్పంటించడం, పోలీసులపై దాడులకు పాల్పడిన వారిపై కఠిన చర్యలు తీసుకుంటామని హెచ్చరించారు.
పెరుగుతున్న జీవన వ్యయంతో సామాన్య ప్రజలు ఎదుర్కొంటున్న ఇబ్బందులు ఈ నిరసనలతో మరోసారి చర్చకు వచ్చాయి.