పాక్ ‘అణ్వాయుధ’ కుట్ర .. డొనాల్డ్ ట్రంప్ సంచలన వ్యాఖ్యలు

అమెరికా అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలతో ప్రపంచాన్ని కుదిపేశారు. అణ్వాయుధాల పరీక్షలపై అంతర్జాతీయంగా చర్చ జరుగుతున్న వేళ, పాకిస్థాన్‌తో పాటు మరికొన్ని దేశాలు రహస్యంగా అణు పరీక్షలు నిర్వహిస్తున్నాయని ఆయన బాంబు పేల్చారు. అమెరికా కూడా ఇకపై అణు పరీక్షలను మళ్లీ ప్రారంభిస్తుందనే ట్రంప్ ప్రకటన ప్రపంచ రాజకీయ సమీకరణాలను మార్చేసేలా ఉంది.

*పాక్ ‘అణ్వాయుధ’ కుట్ర బట్టబయలు

సీబీఎస్ న్యూస్‌కు ఇచ్చిన ఇంటర్వ్యూలో ట్రంప్ మాట్లాడుతూ రష్యా, చైనా, ఉత్తర కొరియా, పాకిస్థాన్‌ వంటి దేశాలు రహస్యంగా అణు పరీక్షలు నిర్వహిస్తున్నాయని, కానీ ఈ విషయాన్ని బహిరంగంగా అంగీకరించడం లేదని తెలిపారు. ముఖ్యంగా పాకిస్థాన్‌ ప్రస్తుతం అణ్వాయుధ పరీక్షలను నిర్వహిస్తోందని ట్రంప్ స్పష్టంగా పేర్కొనడం అంతర్జాతీయ స్థాయిలో కలకలం రేపింది. పాక్ అణు కార్యకలాపాలపై ఆందోళనలు ఉన్నప్పటికీ, ఒక అమెరికా నాయకుడు ఇలాంటి బహిరంగ ఆరోపణలు చేయడం ఇదే మొదటిసారి. ట్రంప్ ధృవీకరణతో పాక్ అణు కార్యక్రమం మరోసారి ప్రపంచ దృష్టిని ఆకర్షించింది.

* అమెరికా కూడా అణు పరీక్షలకు సిద్ధం!

అమెరికా ఎప్పుడూ పారదర్శకంగా వ్యవహరిస్తుందని పేర్కొన్న ట్రంప్, ఇకపై తాము కూడా ఈ దేశాల మాదిరిగానే అణ్వాయుధ పరీక్షలను మళ్లీ ప్రారంభిస్తామని ప్రకటించారు. మూడు దశాబ్దాల తర్వాత అణు పరీక్షలను పునఃప్రారంభించాలనే ట్రంప్ నిర్ణయం ప్రపంచానికి కొత్త సవాలుగా మారింది.రష్యా, చైనా తమ అణు సామర్థ్యాలను పెంచుకుంటున్నాయని, ఐదేళ్లలో ఈ మూడు దేశాలు సమాన స్థాయికి చేరుకుంటాయని ఆయన పేర్కొన్నారు. అందుకే అమెరికా తన అణు బలాన్ని నిలుపుకోవడానికి పరీక్షలు తప్పవని ట్రంప్ వాదించారు. "రష్యా, చైనా వద్ద కూడా భారీ స్థాయిలో అణ్వాయుధాలు ఉన్నాయి, కానీ మావద్ద ఉన్న అణ్వాయుధాలతో ఈ ప్రపంచాన్ని 150 సార్లు పేల్చేయగల శక్తి ఉంది" అని ట్రంప్ తన అణు బలాన్ని గురించి అతిశయంగా చెప్పుకొచ్చారు.

* శాంతి ఒప్పందాలపై నీలినీడలు: కొత్త శీతల యుద్ధమా?

దక్షిణ కొరియాలోని బుసాన్‌లో జిన్‌పింగ్‌తో భేటీకి ముందు తన 'ట్రూత్ సోషల్‌'లో కూడా ట్రంప్ ఇదే అంశాన్ని ప్రస్తావించారు. అణ్వాయుధాల విధ్వంసక శక్తి కారణంగా గతంలో పరీక్షలు చేయకూడదని నిర్ణయించుకున్నప్పటికీ, ప్రపంచ పరిస్థితులు మారిపోయాయి అని ఆయన తెలిపారు.

నిపుణుల అభిప్రాయం ప్రకారం, అమెరికా అణు పరీక్షలను మళ్లీ ప్రారంభిస్తే, అంతకుముందు కుదుర్చుకున్న శాంతి ఒప్పందాలు, నిరాయుధీకరణ ఒప్పందాలన్నీ ప్రశ్నార్థకం అయ్యే అవకాశం ఉంది. ఈ పరిణామం అణ్వాయుధాల పోటీని మళ్లీ వేడెక్కించి, ప్రపంచాన్ని మరోసారి అణు యుగంలోకి నెట్టే సంకేతాలు పంపుతోంది.

ట్రంప్ వ్యాఖ్యలతో కొత్త కోల్డ్ వార్ మొదలవుతుందా? అనేది ఇప్పుడు అంతర్జాతీయ విశ్లేషకుల చర్చకు కేంద్ర బిందువుగా మారింది. ప్రపంచ నాయకులు దీనిపై ఎలా స్పందిస్తారనేది వేచి చూడాలి.

* చైనా & రష్యా ప్రతిస్పందన

అణు పరీక్షలు నిర్వహించకుండా సంయమనం పాటించాలని చైనా విదేశాంగ శాఖ అమెరికాను కోరింది. అంతర్జాతీయ స్థిరత్వాన్ని కాపాడాలని విజ్ఞప్తి చేసింది. అణు పరీక్షలపై ప్రపంచ నిషేధం ఇప్పటికీ అమలులో ఉందని రష్యా గుర్తుచేసింది. అయితే, మరేదైనా దేశం అణు పరీక్షలను తిరిగి ప్రారంభిస్తే తాము కూడా అనుసరిస్తామని రష్యా తీవ్రంగా హెచ్చరించింది. రష్యా, చైనాలు రహస్యంగా భూగర్భ అణు పరీక్షలు నిర్వహిస్తున్నాయనే ట్రంప్ ఆరోపణలు ప్రపంచ ఆయుధాల పోటీని మరింత పెంచే విధంగా ఉన్నాయి.

పాక్ అణు కార్యకలాపాలపై ట్రంప్ చేసిన వ్యాఖ్యలు దక్షిణాసియాలో అస్థిరత మరియు అణు ఆందోళనలను మరింత పెంచే అవకాశం ఉందని అంతర్జాతీయ విశ్లేషకులు అభిప్రాయపడుతున్నారు. ట్రంప్ ప్రకటన కొత్త అణు ఆయుధాల పోటీకి దారి తీస్తుందా లేదా అనేది ఇప్పుడు ప్రపంచ దేశాల మధ్య ప్రధాన చర్చనీయాంశంగా ఉంది.