విమానంలో అల్లరి చేస్తే "నో ఫ్లై".. DGCA కఠిన రూల్స్!
ఇకపై విమానంలో మీ ఇష్టం వచ్చినట్టు ప్రవర్తిస్తే ఊరుకునే ప్రసక్తే లేదు, తోటి ప్రయాణికులను ఇబ్బంది పెట్టినా, సిబ్బందితో గొడవ పడినా 'నో ఫ్లై' లిస్ట్లో చేరిపోతారు.;
ఇకపై విమానంలో మీ ఇష్టం వచ్చినట్టు ప్రవర్తిస్తే ఊరుకునే ప్రసక్తే లేదు, తోటి ప్రయాణికులను ఇబ్బంది పెట్టినా, సిబ్బందితో గొడవ పడినా 'నో ఫ్లై' లిస్ట్లో చేరిపోతారు. తాగి హంగామా చేసినా, స్మోకింగ్ చేసినా 30 రోజుల నిషేధం పక్కా. ఒకవేళ అతిక్రమించి కాక్పిట్లోకి వెళ్లాలని చూస్తే రెండేళ్ల వరకు విమానం ఎక్కనివ్వరు. DGCA తెచ్చిన ఈ కొత్త రూల్స్తో వికృత చేష్టలకు చెక్ పడనుంది. ప్రయాణం ప్రశాంతంగా సాగాలంటే రూల్స్ పాటించాల్సిందే..ఆ వివరాలు చూద్దాం..
అతి చేస్తే అన్ఫ్రెండ్.. విమాన ప్రయాణంలో కొత్త రూల్స్:
విమానం ఎక్కామంటే చాలు కొందరు తామే రాజులమన్నట్లు ప్రవర్తిస్తుంటారు. తోటి ప్రయాణికులకు చికాకు కలిగించడం, ఎయిర్ హోస్టెస్లతో దురుసుగా మాట్లాడటం వంటి ఘటనలు ఈ మధ్య ఎక్కువయ్యాయి. వీటన్నింటికీ ఫుల్ స్టాప్ పెట్టేందుకు డైరెక్టరేట్ జనరల్ ఆఫ్ సివిల్ ఏవియేషన్ నడుం బిగించింది. కొత్త ప్రతిపాదనల ప్రకారం, విమానంలో ఎవరైనా క్రమశిక్షణ తప్పితే వారిని 'Disruptive' (అల్లరి చేసేవారు) కేటగిరీ కింద చేరుస్తారు. ఇక గతంలో ఇలాంటి చర్యల కోసం సుదీర్ఘ ప్రక్రియ ఉండేది, కానీ ఇప్పుడు ఎయిర్లైన్స్ సంస్థలే నేరుగా నిర్ణయం తీసుకునే అధికారాన్ని పొందుతున్నాయి. అంటే, మీ ప్రవర్తన బాగోలేకపోతే విమానం దిగగానే మీ పేరు బ్లాక్ లిస్ట్లోకి వెళ్ళిపోతుందన్నమాట!
స్మోకింగ్ చేస్తే ఒకలా.. కాక్పిట్లోకి వెళ్తే మరోలా:
తప్పు తీవ్రతను బట్టి శిక్షలు కూడా కఠినంగా ఉండబోతున్నాయి. విమానంలో స్మోకింగ్ చేయడం, మద్యం సేవించి వాగ్వాదానికి దిగడం లేదా సిబ్బంది సూచనలను బేఖాతరు చేయడం వంటి పనులు చేస్తే కనీసం 30 రోజుల పాటు విమాన ప్రయాణం చేయకుండా నిషేధం విధిస్తారు. ఇక ఒకవేళ పరిస్థితి ఇంకా దారుణంగా ఉండి, భౌతిక దాడులకు దిగినా లేదా విమాన భద్రతకు ముప్పు కలిగించేలా కాక్పిట్లోకి చొరబడాలని ప్రయత్నించినా నిషేధం రెండేళ్లకు పైగా ఉంటుంది. కొన్ని సందర్భాల్లో జీవితకాలం పాటు విమానం ఎక్కకుండా నిషేధించే అధికారం కూడా ఎయిర్లైన్స్కు ఉంటుంది. ఈ నిర్ణయాల వల్ల సామాన్య ప్రయాణికులకు భద్రతతో పాటు ప్రశాంతమైన ప్రయాణం దొరుకుతుందని అధికారులు భావిస్తున్నారు.
ఎయిర్లైన్స్కు పవర్.. ప్రయాణికులకు హెచ్చరిక:
ఈ కొత్త నిబంధనల వెనుక ఉన్న ప్రధాన ఉద్దేశ్యం విమాన సిబ్బందికి రక్షణ కల్పించడం. తరచుగా ఎయిర్ హోస్టెస్లు, పైలెట్ లు ప్రయాణికుల నుంచి ఎదురవుతున్న వేధింపుల వల్ల తీవ్ర ఒత్తిడికి లోనవుతున్నారు. ఇప్పుడు DGCA ఇచ్చిన పవర్తో ఎయిర్లైన్స్ తక్షణమే యాక్షన్ తీసుకోవచ్చు. ఒక ఎయిర్లైన్ ఒక వ్యక్తిని బ్యాన్ చేస్తే, ఆ సమాచారం ఇతర విమానయాన సంస్థలకు కూడా చేరుతుంది, తద్వారా అతను ఏ విమానం ఎక్కకుండా అడ్డుకోవచ్చు. ఇక అందుకే విమానం ఎక్కేటప్పుడు సరదాగా అల్లరి చేద్దాం అనుకునే వారు ఒక్క నిమిషం ఆలోచించుకోవాలి. మీ ఒక్క నిమిషం కోపం లేదా విలాసం మీ ట్రావెల్ హిస్టరీని శాశ్వతంగా దెబ్బతీసే ప్రమాదం ఉంది.