అంబటి వ్యాఖ్యలు.. ఇంటిపై దాడులు.. అంటుకున్న మంటలు..

ఆంధ్రప్రదేశ్ రాజకీయాల్లో విమర్శలు, ప్రతివిమర్శలు హద్దులు దాటి భౌతిక దాడుల వరకు వెళ్లడం ఆందోళనకరం. గుంటూరులో మాజీ మంత్రి అంబటి రాంబాబు నివాసంపై జరిగిన దాడి ఘటన రాష్ట్రంలో మారుతున్న రాజకీయ సంస్కృతికి అద్దం పడుతోంది. తిరుమల లడ్డూ ప్రసాదం చుట్టూ అలుముకున్న వివాదం చివరకు వీధి పోరాటాలకు, ఆస్తుల ధ్వంసానికి దారితీయడం ప్రజాస్వామ్యవాదులు గమనించాల్సిన విషయం.

చంద్రబాబుపై నోరుజారిన అంబటి

శనివారం ఉదయం గుంటూరులో జరిగిన ఉద్రిక్త పరిస్థితుల మధ్య, అంబటి రాంబాబు ముఖ్యమంత్రి చంద్రబాబు నాయుడును ఉద్దేశించి చేసిన ఒక అత్యంత వివాదాస్పద వ్యాఖ్య సోషల్ మీడియాలో వైరల్ అయ్యింది. తిరుమల లడ్డూ కల్తీ నెయ్యి అంశంపై గుంటూరులో టీడీపీ నాయకులు వైసీపీకి వ్యతిరేకంగా "మహాపాపం" పేరుతో ఫ్లెక్సీలు ఏర్పాటు చేశారు. దీనిని అంబటి రాంబాబు వ్యతిరేకించారు.ఆ ఫ్లెక్సీల వద్దకు అంబటి వచ్చిన సమయంలో టీడీపీ కార్యకర్తలు పెద్ద ఎత్తున ఆయనకు వ్యతిరేకంగా నినాదాలు చేశారు. దీంతో ఇరు వర్గాల మధ్య తోపులాట, వాగ్వాదం జరిగింది.తీవ్రమైన ఆగ్రహం, తోపులాట మధ్య ఉన్న సమయంలో అంబటి రాంబాబు ముఖ్యమంత్రిని ఉద్దేశించి "చంద్రబాబు నాయుడు ఒక దొంగ ముం..." (అభ్యంతరకర పదం) అని సంబోధించారు. ఈ మాట వీడియోలో స్పష్టంగా వినిపించడంతో తెలుగుదేశం శ్రేణులు భగ్గుమన్నాయి. అంబటి ఇంటిపై దాడికి ఇదే పురిగొల్పింది..

మాటల యుద్ధం.. సెగలు పుట్టించిన వ్యాఖ్యలు

రాజకీయాల్లో నాయకులు వాడే భాషపై సంయమనం కోల్పోవడం కొత్తేమీ కాకపోయినా, అది వ్యక్తిగత దూషణలకు దారితీసినప్పుడు పరిస్థితి అదుపు తప్పుతుంది. ముఖ్యమంత్రి చంద్రబాబు నాయుడును ఉద్దేశించి అంబటి రాంబాబు చేసిన వ్యాఖ్యలు తెలుగుదేశం పార్టీ శ్రేణుల్లో ఆగ్రహాన్ని నింపాయి. తన వ్యాఖ్యలు ఉద్దేశపూర్వకమైనవి కావని, సహనం కోల్పోయి అన్న మాటలని అంబటి వివరణ ఇచ్చినప్పటికీ అప్పటికే జరగాల్సిన నష్టం జరిగిపోయింది.

చట్టాన్ని చేతుల్లోకి తీసుకోవడం సమర్థనీయమా?

ఒక నాయకుడి వ్యాఖ్యలు అభ్యంతరకరంగా ఉంటే వాటిని రాజకీయంగా ఎదుర్కోవాలి లేదా చట్టపరమైన చర్యలు తీసుకోవాలి. కానీ, వందలాది మందితో ఇళ్లపైకి దూసుకెళ్లడం, కారును, ఫర్నీచర్‌ను ధ్వంసం చేయడం ఏ రకమైన నిరసన? ఎమ్మెల్యే స్థాయి వ్యక్తుల నేతృత్వంలోనే ఇలాంటి దాడులు జరగడం వ్యవస్థల వైఫల్యాన్ని సూచిస్తోంది.పోలీసులు మోహరించినప్పటికీ దాడి జరగడం భద్రతా వైఫల్యంగానే భావించాల్సి ఉంటుంది. ఒక పార్టీ కార్యకర్తల దాడికి ప్రతిగా మరో పార్టీ శ్రేణులు కూడా రంగంలోకి దిగడం ఘర్షణ వాతావరణాన్ని మరింత పెంచుతుంది.

ఆధ్యాత్మిక అంశమైన 'లడ్డూ వివాదం' రాజకీయ రంగు పులుముకుని ఆస్తుల ధ్వంసానికి కారణం కావడం విచారకరం. అధికార, ప్రతిపక్షాలు రెండూ బాధ్యతాయుతంగా వ్యవహరించాల్సిన సమయం ఇది. రాజకీయ నాయకులు తమ భాషను అదుపులో ఉంచుకోవాలి, అలాగే కార్యకర్తలు ఉద్వేగాలకు లోనై చట్టాన్ని చేతుల్లోకి తీసుకోకుండా చూడాల్సిన బాధ్యత పార్టీ అధిష్టానాలపై ఉంది. హింస ఎప్పుడూ పరిష్కారం చూపదు, అది కేవలం మరిన్ని దాడులకు బీజం వేస్తుంది.