యాత్ర-2 టీజర్.. నేను వైఎస్ రాజశేఖర్ రెడ్డి కొడుకుని..

ఆంధ్రప్రదేశ్ సీఎం, వైఎస్సార్సీపీ అధినేత వైఎస్ జగన్ మోహన్ రెడ్డి లైఫ్ స్టోరీ కథాంశంతో యాత్ర 2 సినిమా తెరకెక్కుతున్న సంగతి తెలిసిందే. తమిళ హీరో జీవా వైఎస్ జగన్ పాత్రను పోషిస్తున్నారు. ఇప్పటికే ఈ మూవీ నుంచి ఫస్ట్ లుక్ రిలీజ్ అయ్యి ఆడియన్స్ ను ఆకట్టుకుంది. తాజాగా ఈ మూవీ టీజర్ ను మేకర్స్ రిలీజ్ చేశారు.

టీజర్‌ ను పరిశీలిస్తే.. వైఎస్ రాజశేఖర్ రెడ్డి (మమ్ముట్టి) కొడుకుగా వైఎస్ జగన్ (జీవా) రాజకీయాల్లోకి రావటానికి కారణమేంటనే అంశాన్ని చిన్నహార్ట్ టచింగ్ సన్నివేశంతో చూపించారు. అదే సందర్భంలో తండ్రి లాంటి నాయకుడిని కోల్పోయినప్పుడు వారిని ఓదార్చడానికి ఓదార్పు యాత్ర చేద్దామంటే నాటి రాజకీయ నాయకులు ఎలాంటి అడ్డంకులు సృష్టించారనే విషయాన్ని కూడా చూపించే ప్రయత్నం చేశారు. అయితే ఆ అడ్డంకులను జగన్ ఎలా అధిగమించారు? తిరుగులేని ప్రజా నాయకుడిగా ఎలా ఎదిగారు? అనేది మిగతా సినిమా.

2009 నుంచి 2019 వరకు ఆంధ్ర‌ప్ర‌దేశ్‌లో జ‌రిగిన రాజకీయ పరిణామాల ఆధారంగా ఈ చిత్రాన్ని తెర‌కెక్కిస్తున్నారు డైరెక్టర్ మహి. ఇందులో నారా చంద్రబాబు నాయుడు పాత్రలో బాలీవుడ్ నటుడు మహేశ్ మంజ్రేకర్, కాంగ్రెస్ పార్టీ అధినేత్రి సోనియా గాంధీ పాత్రలో సుజానె బెర్నెర్ట్, వైఎస్ భారతి పాత్రలో కేతకి నారాయణన్ నటించారు.

వైఎస్ రాజశేఖర్ రెడ్డి పాదయాత్ర ఆధారంగా యాత్ర చిత్రాన్ని తెరకెక్కించారు మహి. అత్యంత ప్ర‌జాద‌ర‌ణను పొందిన ఈ చిత్రానికి సీక్వెల్ గా యాత్ర 2 ఇప్పుడు ప్రేక్షకుల ముందుకు రానుంది. యాత్ర సినిమాను 2019 ఫిబ్ర‌వ‌రి 8న విడుద‌ల చేసిన సంగ‌తి తెలిసిందే. అలాగే ఇప్పుడు యాత్ర 2ను కూడా అదే తేదీన ప్రేక్ష‌కుల ముందుకు తీసుకురానున్నారు. 2024 ఫిబ్రవరి 8న ఈ చిత్రం విడుద‌ల‌కు సిద్ధ‌మవుతోంది.

వైఎస్సార్ మరణించే ముందు పరిస్థితులతో పాటు మరణించాక జరిగిన రాజకీయాలు, జగన్ జైలు జీవితం, పాదయాత్ర, జగన్ సీఎం అవ్వడం.. కథాంశంతో రానుంది యాత్ర 2. ప్రస్తుతం శ‌ర‌వేగంగా తెరకెక్కుతోన్న ఈ చిత్రానికి సంతోశ్ నారాయణన్‌ సంగీతం అందిస్తున్నారు. ఈ మూవీని త్రీ ఆట‌మ్ లీవ్స్‌, వీ సెల్యూలాయిడ్, శివ మేక సంయుక్తంగా నిర్మిస్తున్నారు. ప్రస్తుతం ఈ టీజర్ యూట్యూబ్ లో ట్రెండింగ్ లో ఉంది.