విశ్వక్ సేన్ కాస్ట్లీ గిఫ్ట్.. తరుణ్ భాస్కర్ ఊహించని రిప్లై!

ఇండస్ట్రీలో హీరోలకు, దర్శకులకు మధ్య గొడవలు రావడం కామన్. కానీ విశ్వక్ సేన్, తరుణ్ భాస్కర్‌ల స్నేహం మాత్రం చాలా ప్రత్యేకం. ‘కల్ట్’ టీజర్ లాంచ్ ఈవెంట్‌లో మ్యూజిక్ డైరెక్టర్ రవి బస్రూర్‌కు విశ్వక్ ఖరీదైన రోలెక్స్ వాచ్ గిఫ్ట్ ఇవ్వడంతో అందరి కళ్లు తరుణ్ భాస్కర్ పై పడ్డాయి. మరి నీకు విశ్వక్ ఏ గిఫ్ట్ ఇచ్చాడు? అని అడిగిన ప్రశ్నలకు తరుణ్ ఇచ్చిన సమాధానం ఇప్పుడు సోషల్ మీడియాలో వైరల్ అవుతోంది. వారిద్దరి మధ్య ఉన్నది కేవలం స్నేహం మాత్రమే కాదు, అంతకు మించి అని నిరూపించారు.

వాచ్ కంటే విలువైంది ఇచ్చాడు - తరుణ్ భాస్కర్:

టీజర్ లాంచ్ ఈవెంట్‌లో స్టేజీపై ఉన్న తరుణ్ భాస్కర్‌ను సరదాగా ఒక ప్రశ్న అడిగారు.. "విశ్వక్ రవి బస్రూర్‌కు రోలెక్స్ వాచ్ ఇచ్చాడు కదా, మరి మీకు ఎప్పుడైనా ఇలాంటి గిఫ్ట్ ఇచ్చాడా?" అని. దానికి తరుణ్ ఎంతో మెచ్యూర్డ్‌గా స్పందిస్తూ.. "నాకు ఆయన ఇచ్చిన గిఫ్ట్ మీకు కనపడదు. ఇప్పుడు నేను కట్టుకుంటున్న ఇల్లు ఆయన ఇచ్చిందే" అని చెప్పి అందరినీ ఆశ్చర్యపరిచారు. ఒక తమ్ముడు అన్నకు ఇచ్చే విషయంలో లెక్కలు చూసుకోమని, తన ఫ్యామిలీ పర్సన్ అయిన విశ్వక్ ఇలా ఎదగడం చూస్తుంటే గిఫ్ట్‌ల కంటే ఎక్కువ సంతోషంగా ఉందని తెలిపారు.

ఎక్కువ పొగిడితే ఎక్కువ అనుకుంటారు:

అలాగే విశ్వక్ సేన్ మాట్లాడుతూ.. తనదైన శైలిలో స్పందించారు. "తరుణ్ గురించి నేను ఎక్కువ పొగిడితే మమ్మల్ని బాయ్‌ఫ్రెండ్, గర్ల్‌ఫ్రెండ్ అనుకుంటారు" అని జోక్ చేస్తూనే.. తరుణ్ తనపై చూపించిన నమ్మకాన్ని గుర్తు చేసుకున్నారు. ‘ఫలక్‌నుమా దాస్’ సమయంలో డైరెక్షన్ చేయమని ధైర్యం ఇచ్చింది తరుణ్ భాస్కరేనని, ఇప్పుడు ఈ ‘కల్ట్’ సినిమా కూడా కచ్చితంగా వర్కవుట్ అవుతుందని తరుణ్ భరోసా ఇచ్చారని విశ్వక్ చెప్పారు. తరుణ్ తనకు కేవలం స్నేహితుడు మాత్రమే కాదు, తన సొంత బ్లడ్ బ్రదర్ అని విశ్వక్ ప్రకటించారు.

‘కల్ట్’ సపోర్ట్.. కాలేజీలు రీఓపెన్ అయ్యేసరికి రిలీజ్:

ఈ ‘కల్ట్’ సినిమా విషయంలో తరుణ్ భాస్కర్ అందించిన సపోర్ట్ మర్చిపోలేనని విశ్వక్ కృతజ్ఞతలు తెలిపారు. ఈ సినిమాను చాలా ఇంటెన్స్‌గా తీశామని, యూత్ కు బాగా కనెక్ట్ అవుతుందని ధీమా వ్యక్తం చేశారు. ఇక ఫ్యాన్స్ ఎదురుచూస్తున్న రిలీజ్ డేట్ గురించి చెబుతూ.. కాలేజీలు రీఓపెన్ అయ్యే సమయానికి ఈ సినిమాను ప్రేక్షకుల ముందుకు తీసుకొస్తామని హామీ ఇచ్చారు. గిఫ్ట్‌లు, వాచ్‌ల కంటే వారి మధ్య ఉన్న ఈ బంధం చూసి నెటిజన్లు "బెస్ట్ ఫ్రెండ్స్ అంటే ఇలా ఉండాలి" అని కామెంట్స్ చేస్తున్నారు.

సినిమా రంగంలో పోటీ ఉన్నా, తరుణ్ భాస్కర్ - విశ్వక్ సేన్ లాంటి వారు తమ స్నేహంతో అందరికీ ఆదర్శంగా నిలుస్తున్నారు. రోలెక్స్ వాచ్ కంటే ఒకరిపై ఒకరు పెట్టుకున్న నమ్మకమే గొప్పదని ఫాన్స్ కామెంట్స్ చేస్తున్నారు.