కథ రాయడం నేర్పిస్తే సినిమా చూసే కోణమే మారిపోతుంది!

నటన అనేది కేవ‌లం కంటికి కనిపించే హావభావాలకే పరిమితం కాదు. ఆ పాత్ర వెనుక ఉన్న కథను, దాని ఆత్మను లోతుగా అర్థం చేసుకున్నప్పుడే అసలైన నటుడు ఆవిర్భవిస్తాడు. ఈ సూత్రాన్ని నమ్మి కన్నడ చిత్రసీమలో తనకంటూ ప్రత్యేక గుర్తింపు తెచ్చుకున్న యువ హీరో నిరూప్ భండారి ఇప్పుడు నటుడి స్థానం నుంచి రచయిత పాత్రలోకి ఒదిగిపోతున్నారు. `రంగితరంగ` వంటి బ్లాక్‌బస్టర్ హిట్‌తో ఎంట్రీ ఇచ్చి సీరియస్ పాత్రలకు కేరాఫ్ అడ్రస్‌గా మారిన ఆయన ఇప్పుడు ఏకంగా స్క్రిప్ట్ పేపర్లు పట్టి సొంతంగా కథనాలను సిద్ధం చేస్తున్నారు. తెరపై కనిపించడమే కాకుండా తెర వెనుక కథను మలిచే ప్రక్రియలో భాగస్వామి కావడం వల్ల సినిమాను వీక్షించే కోణమే మారిపోతుందని నిరూప్ రుజువు చేస్తున్నారు.

సాఫ్ట్‌వేర్ రంగం నుండి వెండితెరకు పరిచయమైన నిరూప్ భండారి తొలినాళ్లలో విభిన్నమైన పనితీరును ఎంచుకున్నారు. ఒకే సమయంలో ఒకే సినిమాపై దృష్టి పెట్టడం.. ఆ పాత్ర కోసం శరీరాకృతిని మార్చుకోవడం వంటి కఠినమైన ప్రణాళికలను అనుసరించారు. అయితే చిత్ర పరిశ్రమలో చోటుచేసుకునే అనూహ్య ఆలస్యాలు నటుడి కెరీర్‌ను ఎలా ప్రభావితం చేస్తాయో? అనుభవపూర్వకంగా గ్రహించిన తర్వాత ఆయన వ్యూహాన్ని మార్చారు. `విక్రాంత్ రోణ` తర్వాత ఒకే సమయంలో బహుళ ప్రాజెక్ట్‌లను ఒప్పుకుంటున్నారు. ప్రేక్షకులకు ఎల్లప్పుడూ అందుబాటులో ఉండటమే నేటి డిజిటల్ యుగంలో మనుగడకు మార్గమని స్పష్టమైన అవగాహనకు వచ్చారు.

తనపై ఉన్న సీరియస్ పర్సన్ అనే ఇమేజ్ చట్రంలోనే ఉండిపోవడానికి నిరూప్ సిద్ధంగా లేరు. `రంగితరంగ` తెచ్చిపెట్టిన భావన నుంచి బయటపడి వైవిధ్యమైన, కలర్‌ఫుల్ పాత్రలను పోషించాలని భావిస్తున్నారు. ముఖ్యంగా కర్ణాటక రసవత్తర ప్రాంతీయ సంస్కృతిని ప్రతిబింబించే ఉత్తర కర్ణాటక మాండలికంతో కూడిన నిఖార్సయిన పల్లెటూరి యువకుడి పాత్రలో నటించడమే తదుపరి లక్ష్యమని తెలిపారు. ఆ యాసపై పట్టు సాధించేందుకు ప్రత్యేక కోచింగ్ తీసుకోవడానికి కూడా సిద్ధంగా ఉన్నారు.

తాజా చిత్రం `సత్య: సన్ ఆఫ్ హరీశ్చంద్ర` విషయానికి వస్తే ఈ చిత్రంలో నిరూప్ కథానాయకుడిగానే కాకుండా తొలిసారిగా పూర్తిస్థాయి స్క్రీన్ ప్లే, సంభాషణల రచయితగా వ్యవహరిస్తున్నారు. సాధారణంగా తెలుగు .. కన్నడ సినిమాల్లో హీరో ఎంట్రీ అంటే? భారీ ఫైట్‌ను డిజైన్ చేస్తారు. కానీ స్టోరీలో రీజ‌న్ లేకుండా సీన్ ఉండకూడదనే ఉద్దేశంతో డబ్బు కోసం కోర్టులో త‌ప్పుడు సాక్ష్యం చెప్పే క్యారెక్టర్ స్వభావానికి త‌గ్గ‌ట్లుగా హీరో పరిచయ సన్నివేశాన్ని డిజైన్ చేయడం నిరూప్ క‌థ‌లో పరిణతికి అద్దం పడుతోంది.

ఇందులో మ‌రో కన్నడ స్టార్ శివరాజ్‌కుమార్ విభిన్న పాత్రలో క‌నిపించ‌డం ప్రధాన ఆకర్షణగా మారింది. అలాంటి స్టార్‌డమ్ ఉన్న శివరాజ్‌కుమార్ సెట్‌లో చూపే ఉత్సాహం.. ఆయనలో ఉండే చిన్నపిల్లాడి లాంటి అంకితభావం తననెంతో ఆకట్టుకున్నాయన్నారు. ఎంతటి అనుభవం ఉన్నా? ప్రతి షాట్‌కు అంతే సమర్థవంతంగా సిద్ధమై వచ్చే శివన్న ఎనర్జీ నటనకు మరింత ఊతమిచ్చిందన్నారు.

అంతిమంగా నటుడిగా విభిన్న కోణాలను ఆవిష్కరించుకుంటూనే రచయితగా కథలకు జీవం పోస్తున్న నిరూప్ భండారి ప్రయాణం పరిశ్రమలో కొత్త ఆలోచనలకు దారి తీస్తుంది. నటనతో పాటు రచనపై పట్టు సాధిస్తున్న నిరూప్ భవిష్యత్తులో కన్నడ సినిమాకు మరిన్ని వినూత్న చిత్రాలను అందిస్తారనడంలో సందేహం లేదు.