'కల్కి' కోసం సెంటిమెంట్ డేట్?

ప్రభాస్ కొత్త చిత్రం 'కల్కి 2898 ఏడీ'ని ముందు వచ్చే సంక్రాంతికే రిలీజ్ చేద్దామని అనుకున్నారు. కానీ ఈ భారీ చిత్రాన్ని ఆ సమయానికి రెడీ చేయడం అసాధ్యమనే అంటున్నారు. ఇంకా ఈ సినిమా షూటింగే పూర్తి కాలేదు. భారీగా విజువల్ ఎఫెక్ట్స్‌తో ముడిపడ్డ ఈ సినిమాను సంక్రాంతి కల్లా సిద్ధం చేసి బహు భాషల్లో రిలీజ్ చేయడం అంటే శక్తికి మించిన పనే. ఈ విషయంలో చిత్ర బృందం కూడా ఒక క్లారిటీకి వచ్చేసినట్లు కనిపిస్తోంది.

సినిమాను సంక్రాంతి నుంచి వాయిదా వేస్తున్నట్లు అధికారికంగా ప్రకటించలేదన్న మాటే కానీ.. ఇండస్ట్రీ వర్గాలకు అయితే ఈ మేరకు క్లారిటీ వచ్చేసింది. అందుకే వేరే సినిమాలు రేసులోకి వచ్చాయి. సంక్రాంతి కాదంటే 'కల్కి' ఇంకెప్పుడు వస్తుందనే ఉత్కంఠ ప్రభాస్ అభిమానులను వెంటాడుతోంది. షూట్ పూర్తయ్యాక ఒక క్లారిటీ తెచ్చుకుని డేట్ ప్రకటిస్తామంటూ ఇటీవల దర్శకుడు నాగ్ అశ్విన్ ఓ ఇంటర్వ్యూలో చెప్పాడు.

ఐతే సినిమా ఎప్పటికి రెడీ అవుతుందనే అంచనాను బట్టి ఒక స్పెషల్ డేట్‌ను 'కల్కి' కోసం చిత్ర వర్గాలు పరిశీలిస్తున్నట్లు సమాచారం. ఆ డేట్ మే 9 కావడం విశేషం. ఈ తేదీ వైజయంతీ సంస్థకు చాలా ప్రత్యేకం. ఇదే రోజు ఆ సంస్థ నుంచి 'జగదేక వీరుడు అతిలోక సుందరి' లాంటి ఆల్ టైం హిట్ వచ్చింది. ఇక వైజయంతీ వారి ప్రతిష్టను మళ్లీ నిలబెట్టిన 'మహానటి' సైతం అదే రోజు విడుదలైంది.

వైజయంతీ సంస్థతో పాటు నాగ్ అశ్విన్‌కు సెంటిమెంటుగా బాగా కలిసొచ్చిన ఈ తేదీనే 'కల్కి'ని రిలీజ్ చేస్తే అన్ని రకాలుగా బాగుంటుందని భావిస్తున్నారట. ఇలాంటి భారీ చిత్రానికి సంక్రాంతి మిస్సయిందంటే తర్వాత కనిపించే బెస్ట్ ఆప్షన్ సమ్మరే. సినిమా అప్పటికి రెడీ అయ్యేట్లుంటే మాత్రం ఈ డేట్ ఫిక్స్ కావచ్చు. లేదంటే 2024 దసరా వైపు చూడొచ్చు. ప్రభాస్ సరసన దీపికా పదుకొనే నటిస్తున్న ఈ చిత్రంలో అమితాబ్ బచ్చన్, కమల్ హాసన్ కీలక పాత్రలు పోషిస్తున్న సంగతి తెలిసిందే.