తలైవర్ 173కి బిగ్ షాక్.. కెప్టెన్ ఔట్!

ఇండియన్ సినిమా ఫ్యాన్స్ ఎంతో ఆసక్తిగా ఎదురుచూస్తున్న 'తలైవర్ 173' ప్రాజెక్ట్ గురించి అందరికీ తెలిసిందే. సూపర్ స్టార్ రజినీకాంత్ హీరోగా, లోకనాయకుడు కమల్ హాసన్ నిర్మాతగా ఈ సినిమాను ప్రకటించిన క్షణం నుంచి అంచనాలు హై రేంజ్ కు వెళ్లాయి. ఎందుకంటే దశాబ్దాల తర్వాత ఈ ఇద్దరు లెజెండ్స్ ఒక సినిమా కోసం కలవడం, దానికి 'అరుణాచలం' లాంటి ఆల్‌టైమ్ బ్లాక్‌బస్టర్ ఇచ్చిన సుందర్ సి. డైరెక్టర్‌గా ఫిక్స్ అవడం ఫ్యాన్స్‌కు పూనకాలు తెప్పించింది.

కానీ, ఈ క్రేజీ కాంబోను చూసి మురిసిపోతున్న ఫ్యాన్స్‌కు ఊహించని షాక్ తగిలింది. ఈ మెగా ప్రాజెక్ట్‌ సెట్స్‌పైకి వెళ్లేందుకు సిద్ధమవుతున్న తరుణంలో, సినిమా యూనిట్ నుంచి ఒక సడన్ అప్‌డేట్ వచ్చింది. ఈ ప్రాజెక్ట్ నుంచి ఒక కీలక వ్యక్తి తప్పుకున్నట్లు వచ్చిన వార్త సోషల్ మీడియాను కుదిపేస్తోంది. సినిమాకు కెప్టెన్‌గా ఉండాల్సిన వ్యక్తే తప్పుకోవడంతో, ఇప్పుడు ఈ సినిమా భవిష్యత్తు ఏంటి, అసలు ఎందుకిలా జరిగిందనే చర్చ మొదలైంది.

డైరెక్టర్ సుందర్ సి. స్వయంగా ఒక ఎమోషనల్ లెటర్ రిలీజ్ చేశారు. "కొన్ని అనుకోని పరిస్థితుల కారణంగా" తాను 'తలైవర్ 173' లాంటి ప్రతిష్టాత్మక ప్రాజెక్ట్ నుంచి తప్పుకుంటున్నట్లు ఆయన ప్రకటించారు. ఈ నిర్ణయం తీసుకోవడం తన హృదయానికి చాలా భారంగా ఉందని ఆయన ఆవేదన వ్యక్తం చేశారు. రజినీకాంత్, కమల్ హాసన్ లాంటి ఇద్దరు లెజెండ్స్‌తో పనిచేయడం తన కల అని, ఆ అవకాశం రావడం అదృష్టంగా భావిస్తున్నానని సుందర్ సి. తెలిపారు.

వాళ్లతో గడిపిన కొద్ది రోజులైనా తనకు ఎన్నో మధుర జ్ఞాపకాలను ఇచ్చాయని, వారి నుంచి ఎంతో నేర్చుకున్నానని లెటర్‌లో పేర్కొన్నారు. కొన్నిసార్లు కలల కంటే, మన దారిలో వచ్చే అడ్డంకులను అనుసరించాల్సి వస్తుందని, అందుకే ఈ కఠిన నిర్ణయం తీసుకున్నానని వివరించారు. ఈ వార్తతో నిరాశ చెందిన అభిమానులందరికీ ఆయన మనస్ఫూర్తిగా క్షమాపణలు చెప్పారు. ఈ ప్రాజెక్ట్ కోసం ఆతృతగా ఎదురుచూస్తున్న వారి ఫీలింగ్స్‌ను తాను అర్థం చేసుకోగలనని అన్నారు. భవిష్యత్తులో తన సినిమాల ద్వారా వారందరినీ తప్పకుండా ఎంటర్‌టైన్ చేస్తూనే ఉంటానని హామీ ఇచ్చారు.

సుందర్ సి. తప్పుకోవడంతో 'అరుణాచలం' కాంబో రిపీట్ అవుతుందనుకున్న ఫ్యాన్స్ ఒక్కసారిగా అప్సెట్ అయ్యారు. ఇప్పుడు రాజ్ కమల్ ఫిల్మ్స్ సంస్థ, ఈ ఇద్దరు లెజెండ్స్ ఇమేజ్‌ను హ్యాండిల్ చేయగల మరో డైరెక్టర్‌ను వెతకాల్సిన పెద్ద బాధ్యత పడింది. ఇంతకీ 'తలైవర్ 173'కి ఆ కొత్త సారథి ఎవరనేది ఇప్పుడు ఇండస్ట్రీలో హాట్ టాపిక్‌గా మారింది.