పరిశ్రమలో బ్యాక్ గ్రౌండ్ లేని వాడికి ట్యాలెంటే బ్యాక్ గ్రౌండ్!
| సినీ నేపథ్యం లేకుండా ఇండస్ట్రీలో అడుగుపెట్టి స్టార్లుగా ఎదిగిన నటులు ఎందరో ఉన్నారు. చిరంజీవి, రవితేజ, నాని, విజయ్ దేవరకొండ, నవీన్ పోలిశెట్టి, సిద్ధు జొన్నలగడ్డ వంటి వారు స్వయంకృషితో గుర్తింపు తెచ్చుకున్నారు. దర్శకులు, రచయితలు, సాంకేతిక నిపుణుల్లోనూ ఇలాంటి ప్రతిభావంతులు ఉన్నారు. అవకాశాల కోసం ఎదురైన అవమానాలు, తిరస్కరణలను అధిగమించి నిలదొక్కుకోవడంలో టాలెంటే వారికి అసలైన బ్యాక్గ్రౌండ్గా మారింది.
సినీ రంగం అంటే రంగుల ప్రపంచం. బయటి నుంచి చూసేవారికి ఇది వారసుల అడ్డాగానో? పెద్ద పెద్ద ఫ్యామిలీల కనుసన్నల్లో నడిచే వ్యవస్థగానో కనిపించొచ్చు. కానీ చరిత్రను ఒకసారి తెరచి చూస్తే.. ఎలాంటి సినీ నేపథ్యం లేకుండా ప్రతిభనే నమ్ముకుని సామాన్యులుగా అడుగుపెట్టి నేడు ఇండస్ట్రీని శాసిస్తున్న స్టార్లు ఎందరో ఉన్నారు. బ్యాక్గ్రౌండ్ లేని వాడికి టాలెంటే బ్యాక్గ్రౌండ్ అనే మాట అక్షరాలా నిజమని నిరూపించిన స్వయంకృషి వీరుల ప్రయాణం నేటి తరానికి గొప్ప స్ఫూర్తి పాఠం.
నిజానికి సినీ వారసత్వం అనేది కేవలం మొదటి సినిమాకు గ్రాండ్ ఎంట్రీని.. మీడియా అటెన్షన్ను మాత్రమే ఇస్తుంది. కానీ థియేటర్కు వచ్చే ప్రేక్షకుడిని సీట్లో కూర్చోబెట్టాలన్నా? బాక్సాఫీస్ వద్ద కలెక్షన్ల వర్షం కురిపించాలన్నా? అక్కడ పనిచేసేది నటన.. కథపై ఉన్న పట్టు మాత్రమే. అందుకే మెగాస్టార్ చిరంజీవి నుంచి రవితేజ, నాని, విజయ్ దేవరకొండ, నవీన్ పోలిశెట్టి, సిద్ధు జొన్నలగడ్డ వరకు ఎందరో నటులు ఎలాంటి గాడ్ ఫాదర్ లేకుండానే తమకంటూ పరిశ్రమలో ఒక సామ్రాజ్యాన్ని నిర్మించుకున్నారు. ఆడిషన్ల కోసం స్టూడియోల చుట్టూ తిరిగిన రోజుల నుంచి.. నేడు కోట్లాది మంది అభిమానులను సంపాదించుకునే స్థాయికి ఎదగడం వెనుక ఉన్నది వారి కష్టం ఆత్మవిశ్వాసమే.
హీరోల విషయంలోనే కాదు. దర్శక, రచయితలు, సాంకేతిక నిపుణుల విషయంలోనూ ఇదే సూత్రం వర్తిస్తుంది. షార్ట్ ఫిల్మ్స్ తీసుకుంటూ అసిస్టెంట్ డైరెక్టర్లుగా చిన్న చిన్న పనులు చేసుకుంటూ వచ్చిన ఎందరో యువకులు నేడు పాన్-ఇండియా స్థాయి సినిమాలను తెరకెక్కిస్తున్నారు. కొత్త ఆలోచనలు.. ప్రేక్షకుల నాడిని పట్టే నేర్పు ఉంటే చాలు అగ్ర నిర్మాణ సంస్థలే పిలిచి అవకాశాలు ఇస్తున్నాయి. కంటెంట్ బాగుంటే చిన్న సినిమా కూడా వందల కోట్లు కొల్లగొడుతున్న ఈ రోజుల్లో సిఫార్సుల కంటే సొంత సత్తాకే ఎక్కువ విలువ ఉంటోంది.
అయితే బ్యాక్గ్రౌండ్ లేకుండా ఇండస్ట్రీలో నిలదొక్కుకోవడం అంత సులభమైన విషయం కాదు. అడుగడుగునా అవమానాలు.. తిరస్కరణలు.. ఆర్థిక ఇబ్బందులు ఎదురవుతూనే ఉంటాయి. ఒక సినిమా ఫ్లాప్ అయితే మళ్లీ అవకాశం రావడానికి ఏళ్ల తరబడి వేచి చూడాల్సిన పరిస్థితులుంటాయి. కానీ ఈ కష్టాలే వారిని మరింత రాటుదేలేలా చేస్తాయి. ప్రేక్షకుల అభిరుచిని అర్థం చేసుకుంటూ ప్రతి సినిమాకు తమను తాము కొత్తగా ఆవిష్కరించుకోవడం వల్లే అవుట్సైడర్స్ ఇండస్ట్రీలో సుదీర్ఘ కాలం కొనసాగగలుగుతున్నారు.
వెండితెరపై వెలగడానికి కావాల్సింది ఇంటి పేరు కాదు. గుండె నిండా కసి.. నటనపై పిచ్చి మాత్రమే. ప్రేక్షకులు ఎప్పుడూ ప్రతిభను ఆదరించడంలో ముందుంటారు. అందుకే ఎలాంటి సినీ పునాది లేకుండా అడుగుపెట్టే ప్రతి ఒక్కరికీ వారి కష్టమే పునాదిగా.. వారి టాలెంటే అసలైన బ్యాక్గ్రౌండ్గా మారి విజయతీరాలకు చేరుస్తుందన్నది పచ్చి నిజం.