సభల్లో సీఎం నినాదాలు.. హీరోల రియాక్షన్ ఎందుకు సైలెంట్?

తమిళనాడు రాజకీయాల్లో సినిమా హీరోలకు ఉండే క్రేజ్ గురించి ప్రత్యేకంగా చెప్పనక్కర్లేదు. ఎంజీఆర్, జయలలిత నుంచి మొన్నటి విజయ్ వరకు సినిమా రంగం నుంచి రాజకీయాల్లోకి వెళ్లిన చరిత్ర అక్కడ ఉంది. ఇప్పుడు అదే బాటలో మరికొందరు కోలీవుడ్ స్టార్ హీరోలు కూడా నడుస్తున్నారనే చర్చ తీవ్రంగా జరుగుతోంది. అభిమానుల సమావేశాల్లో "ఫ్యూచర్ సీఎం" అంటూ నినాదాలు వస్తున్నప్పుడు, హీరోలు వాటిని ఖండించకుండా మౌనంగా ఉండటం వెనుక అసలు వ్యూహం ఏమైనా వుందా ? ఆ విశేషాలు చూద్దాం..

విజయ్ బాటలో పయనిస్తున్న ఇతర హీరోలు:

కోలీవుడ్‌లో విజయ్ తన రాజకీయ పార్టీ ప్రకటన తర్వాత పూర్తిస్థాయిలో రాజకీయాలపై దృష్టి పెట్టారు. ఆయనను చూసే మిగతా హీరోలు కూడా తమ అభిమాన సంఘాలను క్రమశిక్షణతో కూడిన రాజకీయ కేడర్‌లా మారుస్తున్నారనే అనుమానాలు వ్యక్తమవుతున్నాయి. ఇక తాజాగా శివకార్తికేయన్ వంటి హీరోల ఫ్యాన్స్ మీట్స్‌లో జరిగిన పరిణామాలు, తెల్లటి దుస్తుల్లో అభిమానులు హాజరుకావడం చూస్తుంటే ఇదొక పెద్ద ప్లానింగ్ ప్రకారమే జరుగుతోందనే సంకేతాలు స్పష్టంగా కనిపిస్తున్నాయి.

సీఎం నినాదాలపై హీరోల వ్యూహాత్మక మౌనం:

సభల్లో అభిమానులు "రాబోయే ముఖ్యమంత్రి మీరే" అంటూ నినాదాలు హోరెత్తిస్తున్నప్పుడు, హీరోలు వాటిని వెంటనే వారించాల్సింది పోయి చిరునవ్వుతో దాటవేయడం లేదా సైలెంట్‌గా ఉండటం చూస్తుంటాం. ఇలాంటి విషయాల్లో నేరుగా నోరు విప్పకపోవడం ద్వారా, అభిమానుల్లో ఆశలను సజీవంగా ఉంచడమే కాకుండా భవిష్యత్తు రాజకీయాల కోసం గ్రౌండ్ లెవెల్ రెస్పాన్స్ ఎలా ఉందో బేరీజు వేసుకునేందుకు వారు ప్రయత్నిస్తున్నారనేది రాజకీయ విశ్లేషకుల మాట.

అభిమాన బలంతో రాజకీయ అడుగులు:

సినిమాల ద్వారా సంపాదించుకున్న మాస్ ఇమేజ్‌ను, లక్షలాది మంది అభిమానుల నెట్‌వర్క్‌ను రాజకీయ శక్తిగా మలచుకోవడం తమిళనాట ఎప్పటి నుంచో ఉన్నదే. ఇక కేవలం వెండితెర వినోదానికే పరిమితం కాకుండా, సమాజంలో తమకంటూ ఒక రాజకీయ ప్రత్యామ్నాయాన్ని సృష్టించుకోవడానికి హీరోలు ఇప్పుడే పునాదులు వేస్తున్నారు. ఫ్యాన్స్ అసోసియేషన్లను సామాజిక సేవా కార్యక్రమాల పేరుతో అందరిని ఏకం చేయడం ఈ వ్యూహంలో భాగమే అంటున్నారు విశ్లేషకులు.

స్పష్టత ఇవ్వాల్సిన బాధ్యత హీరోలపైనే ఉంది:

అభిమానుల సమావేశాలను రాజకీయ వేదికలుగా మారుస్తున్నారనే చర్చ జోరుగా సాగుతున్న తరుణంలో, నటీనటులు దీనిపై ఓపెన్‌గా మాట్లాడాల్సిన అవసరం ఎంతైనా ఉంది. తాము కేవలం సినిమాల వరకే పరిమితం అవుతామా లేక భవిష్యత్తులో రాజకీయాల్లోకి వస్తామా అనేదానిపై స్పష్టత ఇస్తేనే గందరగోళానికి తెరపడుతుంద. లేదంటే ఇలాంటి ఊహాగానాలు నిత్యం కొనసాగుతూనే ఉంటాయి.

తెరవెనుక సాగుతున్న అసలు రాజకీయం:

సినిమా గ్లామర్‌ను రాజకీయ పదవులుగా మలచుకునే ట్రెండ్ తమిళనాట కొత్తేం కాదు. అయితే ప్రస్తుత తరం హీరోలు మరింత వ్యూహాత్మకంగా, నిశ్శబ్దంగా తమ భవిష్యత్తు అడుగులను వేస్తున్నారు. ఇక సభల్లోని సైలెన్స్ ద్వారా వారు ఇస్తున్న సంకేతాలు రాబోయే రోజుల్లో తమిళ రాజకీయాల్లో ఎలాంటి పెనుమార్పులకు దారితీస్తాయో వేచి చూడాలి..