శ్రీ విష్ణు సేఫ్ గేమ్ వెనుక అసలు లెక్క ఇదే!
| 2027 సంక్రాంతి బరిలోకి శ్రీవిష్ణు ‘ఫ్యామిలీ ప్యాక్’ దిగుతోంది. వెంకటేశ్, కళ్యాణ్ రామ్ నటిస్తున్న అనిల్ రావిపూడి సినిమా, చిరంజీవి చిత్రం కూడా పోటీలో ఉండటంతో ఆసక్తి నెలకొంది. ‘సామజవరగమన’ దర్శకుడు రామ్ అబ్బరాజుతో శ్రీవిష్ణు చేస్తున్న ఈ సినిమాకు మైత్రీ మూవీ మేకర్స్ నిర్మాణం బలంగా నిలుస్తోంది. రేపు విడుదల కానున్న టీజర్తో సినిమాపై బజ్ పెరుగుతుందా అనేది చూడాలి.
సంక్రాంతి సీజన్ లో పెద్ద హీరోల సినిమాల మధ్య పోటీ పడాలంటే మిడ్ రేంజ్ హీరోలు కాస్త ఆలోచిస్తారు. కానీ శ్రీ విష్ణు మాత్రం తన కొత్త సినిమా 'ఫ్యామిలీ ప్యాక్' తో 2027 పొంగల్ బరిలోకి దిగేందుకు రెడీ అయిపోయారు. రేపు ఈ సినిమా టీజర్ కూడా రిలీజ్ కాబోతోంది. అయితే ఇదే పండుగకు విక్టరీ వెంకటేశ్, అనిల్ రావిపూడి కాంబో కూడా వస్తుండటంతో ఈ బాక్సాఫీస్ పోటీ ఇప్పుడు ఇండస్ట్రీలో హాట్ టాపిక్ గా మారింది.
వెంకటేశ్, కళ్యాణ్ రామ్ కలిసి నటిస్తున్న 'జనవరి 12 విడుదల' సినిమాను అనిల్ రావిపూడి డైరెక్ట్ చేస్తున్నారు. సంక్రాంతికి ఈ కాంబోకు ఉన్న క్రేజ్ వేరు. గతంలో 'ఎఫ్ 2', 'ఎఫ్ 3' చిత్రాలతో పాటు 'సంక్రాంతికి వస్తున్నాం' సినిమా కూడా భారీ వసూళ్లు రాబట్టింది. హిట్ కాంబినేషన్ కావడంతో థియేటర్ల కేటాయింపులో వెంకీ సినిమాకే ఫస్ట్ ప్రియారిటీ దక్కడం ఖాయం.
మరోవైపు చిరంజీవి కాకా కూడా రానుంది.
ఇంత గట్టి పోటీ ఉన్నా శ్రీ విష్ణు వెనక్కి తగ్గకపోవడానికి బలమైన కారణమే ఉంది. గతంలో 'సామజవరగమన' లాంటి సూపర్ హిట్ ఇచ్చిన దర్శకుడు రామ్ అబ్బరాజుతోనే ఆయన మళ్లీ 'ఫ్యామిలీ ప్యాక్' చేస్తున్నారు. దీనికి తోడు భాను భోగవరపు, నందు సవిరిగన రైటింగ్ కూడా తోడైంది. ఫ్యామిలీ ఆడియన్స్ కు నచ్చే క్లీన్ కామెడీ ఉంటే పండుగ రోజుల్లో థియేటర్లు నిండటం పెద్ద కష్టమేమీ కాదు.
బిజినెస్ లెక్కల పరంగా చూసినా శ్రీ విష్ణు సినిమాకు సేఫ్ జోన్ కనిపిస్తోంది. వెంకటేశ్, చిరు సినిమాలకు ఉండే భారీ బడ్జెట్, స్టార్ రెమ్యునరేషన్ల ఒత్తిడి 'ఫ్యామిలీ ప్యాక్' మీద ఉండదు. ఖర్చు అదుపులో ఉంటే, పరిమిత స్క్రీన్లలో రిలీజైనా సరే మంచి ఆక్యుపెన్సీతో సులభంగా లాభాల్లోకి రావొచ్చు. అయితే ఈ సినిమా బడ్జెట్, థియేట్రికల్ బిజినెస్ వివరాలు ఇంకా బయటకు రాలేదు.
సంక్రాంతి సెలవుల్లో ఫ్యామిలీ ఆడియన్స్ కేవలం ఒక్క సినిమాకే పరిమితం కారు. కంటెంట్ లో వినోదం ఉంటే ఒకేసారి రెండు మూడు సినిమాలను ఆదరించిన సందర్భాలు గతంలో చాలానే ఉన్నాయి. పైగా మైత్రీ మూవీ మేకర్స్ లాంటి పెద్ద బ్యానర్ నిర్మిస్తుండటం 'ఫ్యామిలీ ప్యాక్' థియేట్రికల్ రిలీజ్ కు అదనపు బలంగా మారనుంది. ఇందులో సాక్షి మడోల్కర్ హీరోయిన్ గా నటిస్తుండగా, ఇప్పటికే వచ్చిన పోస్టర్లకు మంచి రెస్పాన్స్ దక్కింది.
ప్రస్తుతానికి 2027 సంక్రాంతి సీజన్ అని ప్రకటించినా, 'ఫ్యామిలీ ప్యాక్' కచ్చితమైన రిలీజ్ డేట్ ను ఇంకా లాక్ చేయలేదు. రేపు రాబోతున్న టీజర్ లో కామెడీ టైమింగ్ ఏ రేంజ్ లో పేలుతుందన్న దాన్ని బట్టే సినిమాపై అసలు బజ్ ఆధారపడి ఉంటుంది. వెంకీ చిరు హంగామా మధ్య శ్రీ విష్ణు తన మార్క్ ఎంటర్ టైన్ మెంట్ తో బాక్సాఫీస్ దగ్గర ఎలాంటి ఫలితాన్ని అందుకుంటారో చూడాలి.