కూతురు సెంటిమెంట్​తో సిద్ధార్థ్.. ఈ సారైనా గట్టెక్కుతారా

టాలీవుడ్​లో బాయ్స్, నువ్వొస్తానంటే నేనొద్దంటాన, బొమ్మరిల్లు, ఓయ్ వంటి సక్సెస్​ ఫుల్ మూవీస్​లో నటించి యూత్​లో ఫుల్ క్రేజ్ తెచ్చుకున్న హీరో సిద్ధార్థ్‌. ఆయన కథానాయకుడిగా నటించిన లేటెస్ట్ మూవీ చిత్తా. ఈ చిత్రంతో ఆయన నిర్మాతగా మారారు. సినిమాను రెడ్ జెయింట్ మూవీస్, ఈటాకీ ఎంట‌ర్‌టైన‌మెంట్స్ సంయుక్తంగా నిర్మించాయి.

ఈ సినిమా మరో రోజులో విడుదల కానుంది. దీంతో ప్రమోషన్స్​లో భాగంగా తాజాగా సిద్ధార్థ్ ఓ చైన్నెలో ఏర్పాటు చేసిన విలేకరుల సమావేశంలో పాల్గొన్నారు. తాను సహజత్వంతో కూడిన మంచి కథ చిత్రం చేయాలని అనుకున్నట్లు తెలిపారు. అందుకే ఈ సినిమాను నిర్మించినట్లు పేర్కొన్నారు.

నిర్మాతగా మారాలని నేను అనుకున్నప్పుడు ఎక్కడా రాజీ పడకుండా సహజత్వంతో కూడిన మంచి కథ ఉన్న చిత్రం చేయాలని అనుకున్నాను. అందుకే ప్రీ ప్రొడక్షన్‌ కోసమే దాదాపు రెండేళ్ల సమయం తీసుకున్నాను. సినిమాలోని చాలా సీన్స్​ను పళనిలో లైవ్‌గా షూట్ చేశాం. అని సిద్ధార్థ్ అన్నారు. ఈ చిత్రం తన నటనను చూసి ప్రశంసించిన సినీ ప్రముఖులకు, అభిమానులకు, సినీ ప్రియులకు కృతజ్ఞతలు కూడా తెలిపారు.

ఇకపోతే ఈ చిత్రంలో నిమిషా సజయన్‌, అంజలి నాయర్‌ తదితరులు ఇతర కీలక పాత్రల్లో నటించారు. నిర్మాణ కార్యక్రమాలు పూర్తిచేసుకున్న ఈ చిత్రం తెలుగు, తమిళ, మలయాళం, కన్నడలో సెప్టెంబర్ 28న రిలీజ్ కానుంది. ఇప్ప‌టికే రిలీజైన ఈ సినిమా ఫ‌స్ట్ లుక్, టీజ‌ర్, ట్రైల‌ర్​కు మంచి రెస్పాన్స్ వచ్చింది. చిత్రానికి ఎస్‌.యం అరుణ్‌ కుమార్‌ దర్శకుడిగా వ్యవహరించారు.

బాబాయికి.. చిన్నారికి మధ్య జరిగే ఓ ఎమోషనల్ డ్రామానే ఈ చిత్రం. అంతా సాఫీగా సాగే జీవితంలో త‌న కూతురు కిడ్నాప్​కు గురవ్వగా.. ఆమె కోసం సిద్ధార్థ్‌ చేసే పోరాటమే ఈ సినిమా కథ అని అర్థమవుతోంది. మరి ఈ కిడ్నాప్ ఎవరు చేశారు, ఎందుకు చేశారు అనేది తెలుసుకోవాలంటే సినిమాను తెరపై చూడాల్సిందే. కాగా, గత కొంతకాలంగా సిద్దార్థ్​కు సరైన హిట్ లేదు. రీసెంట్​గా వచ్చిన టక్కర్ కూడా అంతగా ఆడలేదు. మరి ఈ చిత్రంతోనైనా సిద్ధార్థ్​ సక్సెస్ ట్రాక్ ఎక్కుతడో లేదో చూడాలి.