'గంగ'ఎంట్రీతో థియేటర్స్ షేక్ అవుతాయా?.. ‘భోగీ' పై బజ్

టాలీవుడ్‌లో వైవిధ్యమైన కథలతో తనకంటూ ప్రత్యేక గుర్తింపు తెచ్చుకున్న హీరో శర్వానంద్, ఈసారి పూర్తిగా మాస్ యాక్షన్ అవతారమెత్తడానికి సిద్ధమయ్యాడు. మాస్ సినిమాలను తెరకెక్కించడంలో ప్రత్యేక శైలి ఉన్న సంపత్ నంది దర్శకత్వంలో శర్వానంద్ నటిస్తున్న తాజా పాన్-ఇండియా పీరియడ్ యాక్షన్ డ్రామా ‘భోగి’. తాజాగా మేకర్స్ ప్రకటించిన టీజర్ అప్‌డేట్ తో ఈ సినిమాపై అంచనాలు ఒక్కసారిగా తారాస్థాయికి చేరాయి. ఆ విశేషాలు ఏంటో ఇప్పుడు చూద్దాం..

‘శర్వాసంపత్ బ్లడ్ ఫెస్ట్’తో మాస్ ట్రీట్:

తెలంగాణ-మహారాష్ట్ర సరిహద్దులోని 1960ల నాటి ఒక కల్పిత గ్రామం నేపథ్యంలో ఈ సినిమా రూపుదిద్దుకుంటోంది. ఇందులో శర్వానంద్ ఐదుగురు సోదరీమణులున్న 'గంగ' అనే పవర్‌ఫుల్ పాత్రలో నటిస్తుండగా, అనుపమ పరమేశ్వరన్, డింపుల్ హయాతి హీరోయిన్లుగా నటిస్తున్నారు. ఇక ‘శర్వాసంపత్ బ్లడ్ ఫెస్ట్’ అనే హ్యాష్‌ట్యాగ్‌తో మేకర్స్ విడుదల చేసిన పోస్టర్ సినిమాలో భారీ రక్తపాతం, హై-వోల్టేజ్ యాక్షన్ ఉండబోతున్నట్లు స్పష్టం చేస్తోంది.

అక్టోబర్ 4న గ్రాండ్‌గా 'భోగి' టీజర్:

ఈ సినిమాపై మేకర్స్ తాజాగా ఆసక్తికరమైన అప్డేట్‌ను ప్రకటించారు. అక్టోబర్ 4న ఉదయం 10 గంటలకు ప్రసాద్ మల్టీప్లెక్స్‌లో ‘భోగి’ టీజర్‌ను విడుదల చేయనున్నట్లు అధికారికంగా ప్రకటించారు. శ్రీ సత్యసాయి ఆర్ట్స్ నిర్మిస్తున్న ఈ చిత్రానికి భీమ్స్ సిసిరోలియో సంగీతం అందిస్తున్నారు. ఇక విజువల్స్, యాక్షన్ ఎలిమెంట్స్ సినిమాపై హైప్‌ను విపరీతంగా పెంచేస్తున్నాయి.

క్లాస్ హీరో నుంచి మాస్ యాక్షన్ అవతారంలోకి..:

ఇప్పటివరకు ఎక్కువగా క్లాస్, లవ్, ఫ్యామిలీ స్టోరీస్‌లో కనిపించి మెప్పించిన శర్వానంద్, ఈ చిత్రంలో పూర్తిగా రఫ్ అండ్ టఫ్ మాస్ లుక్‌లో కనిపించబోతున్నాడు. దర్శకుడు సంపత్ నంది ఈ సారి శర్వాను ఏ రేంజ్‌లో చూపించబోతున్నారనేది అభిమానుల్లో తీవ్ర ఆసక్తిని రేకెత్తిస్తోంది. ఇక వింటేజ్ బ్యాక్‌డ్రాప్‌లో సాగే ఈ మాస్ యాక్షన్ ట్రీట్ ప్రేక్షకులకు సరికొత్త అనుభూతిని పంచడం ఖాయం.

వరుస క్రేజీ ప్రాజెక్ట్:

శర్వానంద్, ఎంటర్‌టైనర్ల స్పెషలిస్ట్ దర్శకుడు శ్రీను వైట్ల కాంబినేషన్‌లో వస్తున్న క్రేజీ ప్రాజెక్ట్ ‘జార్జ్ క్రిష్’. ఈ సినిమాతో బాక్సాఫీస్ వద్ద హ్యాట్రిక్ విజయాన్ని అందుకోవడానికి శర్వా సిద్ధమవుతుండగా, ఏకే ఎంటర్‌టైన్‌మెంట్స్ బ్యానర్‌పై రామబ్రహ్మం సుంకర ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు. అనిల్ సుంకర సమర్పిస్తున్న ఈ చిత్రంలో మిస్ ఇండియా మానస వారణాసి కథానాయికగా నటిస్తుండగా, ప్రస్తుతం హైదరాబాద్‌ వేదికగా ఈ సినిమా షూటింగ్ శరవేగంగా జరుగుతోంది.

గంగ పాత్రలో శర్వానంద్ ఎంట్రీ ఇస్తే థియేటర్లు షేక్ కావడం ఖాయమనేలా ఈ సినిమాపై బజ్ క్రియేట్ అయింది. త్వరలో రాబోతున్న టీజర్‌తో ఈ చిత్రంపై ఉన్న అంచనాలు మరింత పెరుగుతాయనడంలో సందేహం లేదు. శర్వానంద్ కెరీర్‌లో ఇదొక బిగ్గెస్ట్ మాస్ యాక్షన్ బ్లాక్‌బస్టర్‌గా నిలుస్తుందో లేదో వేచి చూడాలి.