సూప‌ర్‌స్టార్ అద్దె చెల్లిస్తున్నాడా ఎగ్గొడుతున్నాడా? ల్యాండ్ లార్డ్ ఏమంటున్నాడు?

బాలీవుడ్ బాద్షా షారుఖ్ ఖాన్ తన విలాసవంతమైన నివాసం `మన్నత్` మరమ్మతుల కారణంగా పాలి హిల్‌లోని నటుడు-నిర్మాత జాకీ భగ్నానీకి చెందిన ప్రాపర్టీలో అద్దెకు దిగిన సంగ‌తి తెలిసిందే. ఇది ప్రైమ్ లొకేష‌న్ లో ఉండ‌టంతో ఖాన్ భారీ అద్దెను చెల్లిస్తున్నార‌ని ప్ర‌చారం ఉంది. సాధారణంగా సెలబ్రిటీల వ్యక్తిగత విషయాలపై రకరకాల ఊహాగానాలు వస్తుంటాయి.. అయితే షారుఖ్ అద్దె ఎగ్గొడుతున్నార‌ని వస్తున్న పుకార్లకు యజమాని జాకీ భగ్నానీ స్వయంగా చెక్ పెట్టారు. ఒక కిరాయిదారుగా షారుఖ్ ఖాన్ ప్రవర్తన అత్యంత అద్భుతమని కొనియాడుతూ ఆయనకు 10కి 11 మార్కులు ఇస్తున్నట్లు జాకీ ఎంతో గర్వంగా ప్రకటించారు.

షారుఖ్ ఖాన్ అద్దె చెల్లింపుల విషయంలో చూపిస్తున్న క్రమశిక్షణ ఇప్పుడు బాలీవుడ్ వర్గాల్లో హాట్ టాపిక్‌గా మారింది. ఆయన అద్దె ఎగ్గొడుతున్నారనే రూమర్లను కొట్టిపారేస్తూ, ఒక్క రోజు కూడా ఆలస్యం చేయకుండా అత్యంత పారదర్శకంగా పేమెంట్స్ చేస్తున్నారని జాకీ స్పష్టం చేశారు. ఒక గ్లోబల్ స్టార్ అయి ఉండి కూడా.. ఆర్థిక లావాదేవీల విషయంలో ఇంతటి నిజాయితీని ప్రదర్శించడం ఆయన హుందాతనాన్ని చాటిచెబుతోంది. యజమానితో వ్యవహరించేటప్పుడు కూడా అత‌డు ఎంతో మర్యాదగా.. వృత్తిపరమైన గౌరవంతో మెలుగుతున్నారని జాకీ పేర్కొన్నారు.

బాంద్రాలోని ఖరీదైన పాలి హిల్‌లో ఉన్న ఈ నివాసంలో షారుఖ్ ఉండటం అనేది యజమానిగా తనకు దక్కిన గౌరవంగా జాకీ భావిస్తున్నారు. ఎంతటి ఎత్తుకు ఎదిగినా సామాన్యమైన బాధ్యతలను నెరవేర్చడంలో షారుఖ్ చూపిస్తున్న నిబద్ధత అందరికీ ఆదర్శంగా నిలుస్తోంది. ఒక నటుడి ఇంట్లో మరో సూపర్‌స్టార్ అద్దెకు ఉండటం అనేది సినీ పరిశ్రమలో ఒక అరుదైన, ఆరోగ్యకరమైన సంబంధానికి నిదర్శనం. ప్రస్తుతం ఈ వార్త సోషల్ మీడియాలో వైరల్ అవుతుండటంతో నెటిజన్లు షారుఖ్ ఖాన్ డిగ్నిటీని చూసి ``అందుకే ఆయన కింగ్ ఖాన్ అయ్యారు`` అంటూ ప్రశంసలు కురిపిస్తున్నారు.

వీళ్లంతా రోల్ మోడ‌ల్స్:

ప్రభావవంతమైన వ్యక్తులు చిన్న పొరపాటు చేసినా ప్ర‌జ‌ల‌పై తీవ్రమైన ప్రతికూల ప్రభావాన్ని చూపే ప్రమాదం ఉంది. అభిమానులు.. ముఖ్యంగా యువత తమ రోల్ మోడల్స్‌ను గుడ్డిగా అనుకరిస్తారు కాబట్టి ఒక సెలబ్రిటీ నిబంధనలను ఉల్లంఘించినా .. అనుచితంగా ప్రవర్తించినా అది తప్పు కాదనే తప్పుడు సంకేతం ప్రజల్లోకి వెళ్తుంది. ఇది సామాజిక క్రమశిక్షణను దెబ్బతీయడమే కాకుండా.. చట్టంపై అగౌరవాన్ని పెంచుతుంది. ఒక సెలబ్రిటీ చేసే పొరపాటు వల్ల వారి వ్యక్తిగత ప్రతిష్టతో పాటు.. వారిని అనుసరించే లక్షలాది మంది ఆలోచనా ధోరణి కూడా పక్కదారి పట్టే అవకాశం ఉంటుంది.

అంతేకాకుండా.. సోషల్ మీడియా యుగంలో సెలబ్రిటీల ప్రతి కదలిక నిరంతరం పర్యవేక్ష‌ణ‌లో ఉంటుంది. వారు చేసే చిన్న పొరపాట్లు కూడా వైరల్ అయ్యి.. సామాజిక విలువల పతనాన్ని వేగవంతం చేస్తాయి. ఉదాహరణకు ఒక సెలబ్రిటీ పన్నులు ఎగ్గొట్టడం లేదా తప్పుదారి పట్టించే ప్రకటనల్లో నటించడం వంటివి చేస్తే.. అది ప్రజల్లో వ్యవస్థపై నమ్మకాన్ని తగ్గిస్తుంది. అందుకే సమాజంలో గుర్తింపు ఉన్న వ్యక్తులు తమ వ్యక్తిగత జీవితంలో ఎంత స్వేచ్ఛను కోరుకున్నా ప్ర‌జ‌ల్ని ప్ర‌భావితం చేసే విష‌యాల‌లో అత్యంత జాగ్రత్తగా ఉండాలి. వారి బాధ్యతారాహిత్యం ఒక తరంపైనే ప్రతికూల ముద్ర వేసే అవకాశం ఉంది. షారూఖ్ అద్దెను స‌కాలంలో చెల్లించినా కానీ, అత‌డు ప్ర‌జారోగ్యాన్ని కిల్ చేసే ప్ర‌మాద‌క‌ర పాన్- ఖైనీ ప్ర‌క‌ట‌న‌ల్లో న‌టించడం తీవ్ర విమ‌ర్శ‌ల‌కు దారి తీసిన సంగ‌తిని మ‌రువ‌కూడ‌దు. సూప‌ర్‌స్టార్ అద్దె చెల్లించ‌డంలో ఆద‌ర్శ‌మే కానీ..! పాన్ గుట్కాల‌కు ప్ర‌చారం చేయడం ఆపేస్తే మ‌రింత మేలు అని కూడా నెటిజ‌నులు సూచిస్తున్నారు.