స్త్రీల విష‌యంలో సమాజం డ‌బుల్ స్టాండార్డ్‌ని నిల‌దీసిన‌ సమంత

నేటి సమాజ తీరుతెన్నులను, పురుషాధిక్యతను ప్రశ్నించడానికి ప్రముఖ నటి సమంత రూత్ ప్రభు ఎప్పుడూ వెనుకాడరు. తాజాగా లింగ వివక్ష గురించి, ఒక వైపే ఒరిగి ఉండే సమాజం గురించి ఆమె తీవ్ర విమర్శలను గుప్పించారు. తన ఇన్‌స్టాగ్రామ్ స్టోరీలో షేర్ చేసిన‌ ఒక ఆలోచనాత్మకమైన పోస్ట్ ద్వారా సమాజంలోని అనేక వైరుధ్యాలను సామ్ కళ్లకు కట్టారు. ``మనం ఇప్పటికీ మార్పు తీసుకురావచ్చు`` అనే శక్తివంతమైన వాక్యంతో ఈ పోస్ట్ ప్రారంభమవుతుంది.

సమాజంలో మహిళలపై జరుగుతున్న వివక్షను, అనాదిగా పురుషాధిక్య ప్ర‌పంచంలో చూస్తున్న తప్పుడు పద్ధతులను వివరిస్తూ సమంత షేర్ చేసిన పోస్ట్ ఇంట‌ర్నెట్ లో వైర‌ల్ గా మారుతోంది. సెక్స్ వర్కర్లను మాత్రమే తప్పుపడతారు కానీ, వారి వద్దకు వెళ్లే క్లయింట్‌లను ఎవరూ ప్రశ్నించరని స‌మంత‌ నిల‌దీసారు. అలాగే ఒంటరి తల్లులను నిందిస్తారు కానీ.. పిల్లలను పట్టించుకోకుండా దూరంగా ఉండే తండ్రులను ఏమీ అనరని పేర్కొన్నారు. సమాజం ఇప్పటికీ ఏ కోణంలో ఆలోచిస్తోందో ఈ ఉదాహరణలు స్పష్టం చేస్తున్నాయి.

నిందించే ధోరణిపై నిలదీత..

ఇదే పోస్ట్‌లో మరింత లోతైన సామాజిక రుగ్మతలను సమంత ప్రస్తావించారు. అత్యాచార బాధితురాళ్లను నిందిస్తారే తప్ప, అసలు తప్పు చేసిన కామాంధుల(రేపిస్టులు)ను మాత్రం నిలదీయని నైజాన్ని సామ్ ప్రశ్నించారు. అంతేకాకుండా తప్పులను కప్పిపుచ్చుకునే వారిని వదిలేసి.. ఆ నిజాలను నిర్భయంగా బయటపెట్టి మాట్లాడేవారినే తప్పుపట్టే ప్రపంచంలో మనం జీవిస్తున్నామని ఆవేదన వ్యక్తం చేశారు. ఈ వ్యాఖ్యలు ప్రస్తుతం నెట్టింట పెద్ద ఎత్తున చర్చకు దారితీశాయి.

భారతీయ చలనచిత్ర పరిశ్రమలో గళం వినిపిస్తున్న నాయికలు

సమంత తరహాలోనే భారతీయ చిత్ర పరిశ్రమలో స్త్రీల విష‌యంలో అన్యాయాలను, దుర్మార్గాలను నిలదీసే ధైర్యశీల నాయికలు చాలామందే ఉన్నారు. బాలీవుడ్‌లో దీపికా పదుకొనే, ప్రియాంక చోప్రా వంటి నటులు వేతన అసమానతలు.. మహిళా భద్రతపై బహిరంగంగా గళం విప్పుతుంటారు. అలాగే టాలీవుడ్‌లో సమంతతో పాటు అడవి శేష్ వంటి హీరోలతో పాటు మహిళా వేదికలపై స్పందించే నటీమణులు కూడా లింగ సమానత్వం కోసం నిలబడుతున్నారు. కోలీవుడ్‌లో నయనతార, పార్వతి తిరువోతు వంటి స్టార్ హీరోయిన్లు సైతం మహిళలపై జరిగే వివక్షను.. సినిమా రంగంలోని సమస్యలను నిర్భయంగా ప్రశ్నిస్తూ వస్తున్నారు.

నిజమైన మార్పు కోసం నాయికల సామాజిక స్పృహ

కేవలం సినిమాల్లో గ్లామర్ పాత్రలకు పరిమితం కాకుండా.. సమాజంలో జరుగుతున్న పరిణామాలపై అగ్ర నటీమణులు ఇలా స్పందించడం ఎంతో ముఖ్యం. సమంత లాంటి స్టార్ సెలబ్రిటీలు తమ సోషల్ మీడియా వేదికల ద్వారా ఇలాంటి సెన్సిటివ్ అంశాలను లేవనెత్తడం వల్ల యువతలో ఆలోచనా దృక్పథం మారుతుంది. పురుషాధిక్య సమాజంలో నెలకొన్న డబుల్ స్టాండర్డ్స్‌ను ప్రశ్నిస్తూ.. మహిళల కోసం, సమానత్వం కోసం అగ్ర నాయికలు బాధ్యతగా ముందుకు వస్తుండటం సమాజంలో మార్పునకు తొలి అడుగుగా భావించవచ్చు.