జక్కన్న మెచ్చిన గామి.. ఏమన్నారంటే..

దర్శకధీరుడు రాజమౌళి మంచి సినిమాలు వచ్చినప్పుడు ప్రశంసించడంలో ఎల్లప్పుడూ కూడా ముందుంటారు. ప్రస్తుతం మహేష్ బాబుతో సినిమాను సెట్స్ పైకి తీసుకువచ్చే ప్రణాళికలో బిజీగా ఉన్న జక్కన్న మంచి కంటెంట్ ఉన్న సినిమాలు వస్తే ప్రత్యేకంగా థియేటర్లోకి వెళ్లి మరీ చూస్తున్నారు. ఇక ఎవరైనా డిఫరెంట్ గా హార్డ్ వర్క్ చేస్తే కూడా సోషల్ మీడియా ద్వారా ప్రశంసలు కురిపిస్తున్నారు.

ఇంకా బాగా మెప్పిస్తే ప్రత్యేకంగా చిత్ర యూనిట్ ని పిలిపించుకొని మరి వారు చేసిన పనుల గురించి అడిగి తెలుసుకుంటున్నారు. ఇక చాలాకాలంగా గామి సినిమా కోసం కష్టపడిన మేకర్స్ ను కూడా కలిసిన రాజమౌళి వారి పనితనాన్ని మెచ్చుకున్నారు. ప్రత్యేకంగా సోషల్ మీడియాలో గామి టీం గురించి ఆయన ప్రస్తావించడం ఇప్పుడు వైరల్ గా మారింది. అంతేకాకుండా వారి కష్టానికి తగ్గ ఫలితం దక్కాలని కూడా ఆయన కోరుకున్నారు

"అసాధ్యమైన కలలు...కానీ వాటిని సాకారం చేయడానికి వారు కష్టపడుతున్నారు... ఆకట్టుకునే విజువల్స్ అంధించడం కోసం 4 సంవత్సరాలుగా వారు చేసిన కృషి గురించి నిర్మాత కార్తీక్ మరియు దర్శకుడు విద్యాధర్ నాతో మాట్లాడినప్పుడు గొప్ప ఫీలింగ్ అనిపించింది. మార్చి 8న విడుదల కానున్న గామి టీమ్ మొత్తానికి శుభాకాంక్షలు" అని రాజమౌళి అన్నారు.

రాజమౌళి ఈ విధంగా చెప్పడంతో గామి సినిమా ఇండస్ట్రీలో మరింత వైరల్ గా మారుతుంది. ఇప్పటికే ఈ సినిమా టీజర్ ట్రైలర్ తో మంచి పాజిటివ్ వైబ్రేషన్స్ క్రియేట్ చేసింది. ఈ సినిమాలో హీరో విశ్వక్ అఘోరా పాత్రలో కనిపించబోతున్నాడు. మానవ స్పర్శ అతనికి అతి పెద్ద శాపం అనే సరికొత్త కాన్సెప్ట్ తో ఈ సినిమా రూపొందింది. ఇక ఆ సమస్య నుంచి బయటపడడానికి అతను హిమాలయాలకు వెళ్లాల్సి వస్తుంది.

అక్కడ అతనికి ఎలాంటి సమాధానం దొరికింది అనేది సినిమాలో మేజర్ ప్లస్ పాయింట్ గా నిలవబోతున్నట్లు తెలుస్తోంది. ఇక సినిమాలోని విజువల్స్ అద్భుతంగా ఉండబోతున్నట్లు ట్రైలర్ చూస్తేనే అర్థమయింది. విశ్వక్ కూడా ఈ సినిమా కోసం చాలా హార్డ్ వర్క్ చేసినట్లు అతని క్యారెక్టర్ డిజైనింగ్ చూస్తేనే క్లారిటీ వచ్చేసింది. ఈనెల 8న థియేటర్లోకి రాబోతున్న గామి సినిమా తప్పకుండా బాక్సాఫీస్ వద్ద సాలిడ్ ఓపెనింగ్స్ అందుకునే అవకాశం ఉన్నట్లు ట్రేడ్ వర్గాలు చెబుతున్నాయి.