అత్యాచారాలకు పాల్పడే వారి అంతం నా చేతిలో.. పూనమ్ కౌర్ ఎమోష‌న‌ల్
ఇటీవలి కాలంలో పురుషాధిక్య ప్ర‌పంచంపై పూనమ్ కౌర్ తనదైన శైలిలో విరుచుకు ప‌డుతున్నారు.
ఇటీవలి కాలంలో పురుషాధిక్య ప్ర‌పంచంపై పూనమ్ కౌర్ తనదైన శైలిలో విరుచుకు ప‌డుతున్నారు. మ‌హిళ‌ల‌పై అఘాయిత్యాల‌ను తీవ్రంగా నిర‌సిస్తున్నారు. అలాగే ఆధ్యాత్మిక చింత‌న గురించి త‌న ఇన్ స్టాగ్ర‌మ్ పోస్టుల‌లో ఎక్కువ‌గా ప్ర‌స్థావిస్తున్నారు. పూర్తి వివ‌రాల్లోకి వెళితే..
దేశంలో మహిళలు, చిన్నారులపై జరుగుతున్న దారుణాలు, అత్యాచారాలపై ప్రముఖ నటి పూనమ్ కౌర్ సోషల్ మీడియా వేదికగా తీవ్ర ఆగ్రహం వ్యక్తం చేశారు. ఇటీవలి కాలంలో సామాజిక అంశాలు, పురుషాధిక్య ధోరణులపై తనదైన శైలిలో గళమెత్తుతున్న పూనమ్ కౌర్ వ్యవస్థ పనితీరుపై తీవ్ర విమర్శలు గుప్పించారు. అలాగే ఆధ్యాత్మిక విషయాలతో పాటు సమాజంలోని లోపాలపై స్పందిస్తూ పూనమ్ పెడుతున్న పోస్టులు ప్రస్తుతం నెట్టింట తీవ్ర చర్చనీయాంశమవుతున్నాయి.
భారతదేశంలో జరుగుతున్న అత్యాచారాలపై కేవలం నిరసనలు, ధర్నాలు తెలపడానికే ప్రాధాన్యత ఇస్తున్నారని.. అదే స్థాయిలో నేరస్థులపై కఠిన చర్యలు తీసుకోవడంలో సీరియస్‌నెస్ చూపించడం లేదని పూనమ్ ఆవేద‌న వ్యక్తం చేశారు. ఒకవేళ నేరస్థులపై చర్యలు కూడా నిరసనలు చేస్తున్నంత సీరియస్‌గా ఉంటే ఈ పాటికే ఇలాంటి అరాచకాలు పూర్తిగా ఆగిపోయేవని అభిప్రాయపడ్డారు. రాజస్థాన్‌లో ఏకంగా 32 మంది చేతిలో అత్యాచారానికి గురైన ఒక బాలిక ఘటనను ఉదాహరణగా ప్రస్తావిస్తూ.. నిరసనల సమయంలో కనిపించినంత భారీ పోలీసు బలగాలు ఆ బాలికకు రక్షణ కల్పించడంలో లేదా నిందితులను పట్టుకోవడంలో కనిపించలేదని తీవ్రస్థాయిలో విమర్శించారు.
వ్యవస్థలో మార్పు రావాలంటూ తీవ్ర భావోద్వేగానికి గురైన పూనమ్ కౌర్, ``అత్యాచారాలకు పాల్పడే వారిని అంతం చేసే బాధ్యతను కనీసం నాకు అప్పగించండి.. ఆ తర్వాత ఏం జరుగుతుందో నేను చూపిస్తాను`` అంటూ ఆవేదనతో కూడిన హెచ్చరికను జారీ చేశారు. మహిళల భద్రత విషయంలో కంటితుడుపు చర్యలు కాకుండా కఠినమైన శిక్షలు అమలు చేయాలంటూ ఒక సెలబ్రిటీగా పూనమ్ చేసిన ఈ వ్యాఖ్యలు సోషల్ మీడియాలో భారీగా వైరల్ అవుతుండటంతో నెటిజన్ల నుంచి గొప్ప స్పందన లభిస్తోంది.
ఇక పూనమ్ కౌర్ టాలీవుడ్ కెరీర్ విషయానికి వస్తే.. 2006లో దర్శకుడు తేజ తెరకెక్కించిన `ఒక విచిత్రం` సినిమా ద్వారా తెలుగు చిత్ర పరిశ్రమలోకి అడుగుపెట్టారు. ఆ తర్వాత శ్రీకాంత్ సరసన మాయాజాలం, గోపీచంద్ సరసన సౌర్యం వంటి విజయవంతమైన చిత్రాల్లో నటించి మంచి గుర్తింపు తెచ్చుకున్నారు. ముఖ్యంగా `సౌర్యం` సినిమాలో గోపీచంద్ చెల్లెలిగా త‌న నటన ప్రేక్షకులను ఎంతగానో ఆకట్టుకుంది. ఆపై గణేష్, ఈనాడు, నాగవల్లి, గ‌గ‌నం వంటి పలు క్రేజీ ప్రాజెక్ట్‌లలో నటించి తనకంటూ ఒక ప్రత్యేకమైన గుర్తింపును సొంతం చేసుకున్నారు.
కేవలం నటనకే పరిమితం కాకుండా అందాల పోటీల్లోనూ మెరిసిన పూనమ్ కౌర్, `మిస్ ఆంధ్రప్రదేశ్` కిరీటాన్ని కూడా గెలుచుకున్నారు. తెలుగుతో పాటు తమిళ, కన్నడ చిత్రాలలో కూడా నటించిన ఈ బ్యూటీ క్యారెక్టర్ ఆర్టిస్ట్‌గా, కథానాయికగా విభిన్న పాత్రలు పోషించారు. కొంతకాలంగా వెండితెరకు కాస్త దూరంగా ఉంటున్నా.. చేనేత వస్త్రాల ప్రచారకర్తగా సామాజిక సేవా కార్యక్రమాలలో చురుగ్గా పాల్గొంటూ, సోషల్ మీడియా వేదికగా సామాజిక సమకాలీన అంశాలపై ధైర్యంగా స్పందిస్తూ నిరంతరం వార్తల్లో నిలుస్తున్నారు. ఇటీవ‌ల ఆధ్యాత్మిక కార్య‌క్ర‌మాల‌పైనా పూనమ్ ఫోక‌స్ చేయ‌డం ఆస‌క్తిక‌రం.