సినిమా హిట్ అయినా థియేటర్లలోకి రానివ్వరు.. అసలు ఈ రూల్ ఏంటి?

ఒకప్పుడు సినిమా రిలీజ్ అంటే థియేటర్లలో రిలీజ్ కావడం, అక్కడ కొన్ని వారాలు స‌క్సెస్‌ఫుల్ గా ర‌న్ అయిన తర్వాతే టెలివిజన్ లేదా హోమ్ ఎంటర్‌టైన్‌మెంట్‌కు వెళ్లడం అనే క్లియ‌ర్ ప్రాసెస్ ఉండేది. కానీ డిజిటల్ యుగం ఆ లెక్కలను పూర్తిగా మార్చేసింది. ఇప్పుడు ఒక సినిమా థియేటర్‌కు వచ్చేలోపే దాని ఓటీటీ జ‌ర్నీ ఎప్పుడు మొదలవుతుందన్న ప్రశ్న కూడా బిజినెస్‌లో కీలకంగా మారింది.

తాజాగా మలయాళంలో భారీ స‌క్సెస్ ను అందుకున్న బెత్లెహెం కుటుంబ యూనిట్ తెలుగు వెర్షన్ చుట్టూ ఏర్పడిన పరిస్థితి కూడా ఇదే కొత్త సమస్యకు ఎగ్జాంపుల్‌గా నిలుస్తోంది. సినిమా కంటెంట్‌కు ఆడియ‌న్స్ నుంచి మంచి రెస్పాన్స్ ఉన్నప్పటికీ, థియేట్రికల్ రిలీజ్‌కు సంబంధించిన రూల్స్, ముందుగానే కుదిరిన డిజిటల్ డీల్స్ కొన్ని సందర్భాల్లో పెద్ద అడ్డంకిగా మారుతున్నాయి. ముఖ్యంగా నేష‌న‌ల్ లెవెల్ మల్టీప్లెక్స్ చైన్స్ తమ థియేట్రికల్ విండో నిబంధనలను కచ్చితంగా ఫాలో అవ‌డంతో సినిమాల విస్తృత‌ విడుదలపై ప్రభావం పడుతోంది.

ఇక్కడ అసలు పోరాటం థియేటర్లకు, ఓటీటీల‌కు మధ్య కాదు. ఒక సినిమా ఆదాయాన్ని ఏ ప్లాట్‌ఫామ్ ఎప్పుడు పొందాలన్న బిజినెస్ టైమింగ్‌కు సంబంధించినది. నిర్మాతలకు డిజిటల్ డీల్స్ ముందుగానే ఆర్థిక భరోసా ఇస్తుంటే, ఎగ్జిబిటర్లకు మాత్రం థియేటర్లకు ప్రత్యేకమైన టైమ్ ఉండాలని భావిస్తున్నారు. ఆడియ‌న్స్ టికెట్ కొని సినిమా చూడటానికి థియేటర్‌కు రావాలంటే, అదే సినిమా వెంటనే ఓటీటీలో అందుబాటులో ఉండకూడదన్నది వారి ప్రధాన వాదన.

అయితే ప్రేక్షకుల ఆలోచనా విధానం కూడా మారిపోయింది. సినిమా థియేటర్‌లో అందుబాటులో లేకపోతే ఓటీటీ కోసం వెయిట్ చేయ‌డం ఇప్పుడు కామ‌న్ అయిపోయింది. దీంతో చిన్న, మధ్యస్థాయి సినిమాలు ఎక్కువ స్క్రీన్స్ పొందేందుకు థియేట్రికల్ విండో రూల్స్ కొన్నిసార్లు ఛాలెంజ్‌గా మారుతున్నాయి. బెత్లెహెం కుటుంబ యూనిట్ విషయంలో మొద‌ట్లో ఎదురైన రిలీజ్ లిమిటేష‌న్స్, తర్వాత పరిస్థితులు మారడంతో విస్తృతంగా బుకింగ్స్ అందుబాటులోకి రావడం ఈ మారుతున్న సినిమా బిజినెస్ కు స్పష్టమైన సంకేతంగా చెప్పొచ్చు. ఫ్యూచ‌ర్ లో అసలు ప్రశ్న ఒక్కటే… సినిమా ముందు థియేటర్‌లో ఎంతకాలం ఉండాలి? ఓటీటీకి ఎప్పుడు వెళ్లాలి? ఈ రెండింటి మధ్య సరైన సమతుల్యతను కనుగొనడమే ఇప్పుడు సినీ పరిశ్రమ ఎదుర్కొంటున్న అతిపెద్ద సవాలుగా మారుతోంది.