మహేష్ AMBకి షాక్ తగిలిందా? అసలు నిజమేంటో తెలుసా?

సూపర్ స్టార్ మహేష్ బాబుకు చెందిన AMB సినిమాస్‌ పై ఫైన్ పడిందంటూ సోషల్ మీడియాలో, కొన్ని వెబ్‌సైట్లలో వార్తలు వైరల్ అవుతున్నాయి. దీంతో నిజంగానే తాజాగా ఏఎంబీ సినిమాస్‌ కు షాక్ తగిలిందా? అనే డౌట్ అభిమానుల్లో నెలకొంది. అయితే ఆ వ్యవహారంలో అసలు నిజం ఏమిటో చూస్తే.. వైరల్ అవుతున్న వార్తలకు భిన్నమైన విషయం బయటపడుతోంది.

కొన్ని వార్తల ప్రకారం, సినిమా టికెట్లపై కేంద్ర ప్రభుత్వం గతంలో జీఎస్టీ రేట్లు తగ్గించిన తర్వాత కూడా ఆ బెనిఫిట్ ను ప్రేక్షకులకు పూర్తిగా అందించలేదనే కారణంతో గూడ్స్ అండ్ సర్వీసెస్ ట్యాక్స్ అప్పీలేట్ ట్రిబ్యునల్ (GSTAT) ఏఎంబీ సినిమాస్‌ తో పాటు తెలంగాణలోని మరో ఐదు థియేటర్లపై ఆదేశాలు జారీ చేసింది. ఆ కేసులో ఏఎంబీ సినిమాస్ వినియోగదారుల సంక్షేమ నిధికి మొత్తాన్ని జమ చేయాలని ట్రిబ్యునల్ పేర్కొన్నట్లు వార్తలు వెలువడ్డాయి.

ఆ వ్యవహారం 2019 జనవరి 1 నుంచి అమల్లోకి వచ్చిన జీఎస్టీ రేట్ల తగ్గింపుకు సంబంధించినదే. అప్పట్లో టికెట్ ధరలు తగ్గించాల్సిన చోట కొన్ని థియేటర్లు బేస్ టికెట్ ధరలను పెంచడం ద్వారా జీఎస్టీ తగ్గింపు వల్ల వచ్చిన బెనిఫిట్ ను వినియోగదారులకు ఇవ్వలేదని ట్రిబ్యునల్ అభిప్రాయపడింది. అదే కారణంగా ఏఎంబీ సినిమాస్‌ తో పాటు మరికొన్ని థియేటర్లకు కూడా సంబంధిత మొత్తాలను కేంద్ర, రాష్ట్ర వినియోగదారుల సంక్షేమ నిధుల్లో జమ చేయాలని ఆదేశాలు ఇచ్చినట్లు అప్పట్లో వెల్లడైంది.

అయితే ప్రస్తుతం సోషల్ మీడియాలో ప్రచారం జరుగుతున్నట్లు ఇది కొత్తగా వెలువడిన తీర్పు కాదని ఏఎంబీ సినిమాస్ యాజమాన్యం స్పష్టం చేసింది. వైరల్ అవుతున్న వార్తలు పాత కేసుకు సంబంధించినవేనని తెలిపింది. ఆ వ్యవహారంలో అవసరమైన న్యాయపరమైన ప్రక్రియలు ఇప్పటికే పూర్తయ్యాయని, ప్రస్తుతం దీనిపై కొత్తగా ఎలాంటి చర్యలు తీసుకోలేదని వివరణ ఇచ్చింది.

అంతేకాదు, పాత విషయాన్ని కొత్త వార్తలా ప్రచారం చేయడం సరికాదని కూడా అభిప్రాయపడింది. నిజమేంటో తెలుసుకోకుండా పాత సమాచారాన్ని తాజాగా జరిగిన పరిణామంలా చూడొద్దని మీడియాను కోరింది. ఆ క్లారిటీతో ప్రస్తుతం సోషల్ మీడియాలో వస్తున్న "మహేష్ బాబు ఏఎంబీ సినిమాస్‌ కు తాజాగా భారీ జరిమానా విధించారు", "కొత్తగా షాక్ తగిలింది" అనే ప్రచారంలో నిజం లేదని స్పష్టమవుతోంది. ఆ కేసు గతంలోనే విచారణకు వచ్చి, దానికి సంబంధించిన ప్రక్రియ కూడా పూర్తయిందని ఏఎంబీ యాజమాన్యం చెబుతోంది.

దీంతో ప్రస్తుతం వైరల్ అవుతున్న వార్తలను చూసి అభిమానులు ఆందోళన చెందాల్సిన అవసరం లేదని చెప్పొచ్చు. పాత కేసుకు సంబంధించిన సమాచారమే మరోసారి నెట్టింట చక్కర్లు కొడుతుండటంతో గందరగోళం ఏర్పడింది. అందుకే ఇలాంటి వార్తలు చూసినప్పుడు అధికారిక ప్రకటనలు పరిశీలించడం అవసరం. అలా మహేష్ బాబు ఏఎంబీ సినిమాస్‌ కు తాజాగా కొత్త షాక్ తగిలిందనే ప్రచారం మాత్రం అసలు నిజానికి దూరంగానే ఉందని యాజమాన్యం క్లారిటీ ఇచ్చింది.