ఆర్తి అగ‌ర్వాల్ త‌ర‌హాలో మ‌రో న‌టి మృతి

తెలుగు సినీవినీలాకాశంలో ధృవ‌తార‌గా వెలిగిపోయింది ఆర్తీ అగర్వాల్. టాలీవుడ్ అగ్ర హీరోల స‌ర‌స‌న న‌టించిన ఆర్తి అగ‌ర్వాల్ ప‌లు విజ‌య‌వంత‌మైన చిత్రాల్లో న‌టించారు. ప్ర‌తిభావ‌ని ఆర్తి అనూహ్యంగా అంత‌ర్థాన‌మైంది. ఆర్తి అగ‌ర్వాల్ కెరీర్ జ‌ర్నీ, ల‌వ్ లైఫ్, ఆక‌స్మిక మ‌ర‌ణం ఇవ‌న్నీ అభిమానుల్లో ఇప్ప‌టికీ చ‌ర్చ‌నీయాంశం. 5 మార్చి 1984న న్యూజెర్సీలో గుజరాతీ తల్లిదండ్రులకు 1 జన్మించిన ఆర్తి 6 జూన్ 2015న అట్లాంటిక్ సిటీ, న్యూజెర్సీ, యునైటెడ్ స్టేట్స్‌లో మరణించింది. మ‌ర‌ణించేప్ప‌టికి ఆర్తి వ‌య‌సు 31. ఆర్తి మేనేజర్ వివ‌రాల‌ ప్రకారం.. ఆర్తి ఊబకాయం - ఊపిరితిత్తుల అనారోగ్యంతో పోరాడింది. ఆమె మరణానికి ఆరు వారాల ముందు లైపోసక్షన్ సర్జరీ చేయించుకుంది. మరణానికి ముందు తీవ్రమైన శ్వాస సమస్యలు ఉన్నాయి. చివ‌రికి కార్డియాక్ అరెస్ట్ (గుండెనొప్పి)తో మ‌ర‌ణించిందని మేనేజర్ తెలిపారు.

ఇప్పుడు ఇంచుమించు అలాంటి స‌మ‌స్య‌తోనే 29 ఏళ్ల బ్రెజిలియన్ మోడల్ కం న‌టి మ‌ర‌ణించ‌డం సంచ‌ల‌నమైంది. లైపో స‌క్ష‌న్ సర్జరీ విక‌టించి స‌ద‌రు మోడ‌ల్ గుండెపోటుతో మరణించింది. బ్రెజిలియన్ ఇన్‌ఫ్లుయెన్సర్ - రియాలిటీ టీవీ స్టార్ లుయానా ఆండ్రేడ్ తన మోకాలి నుండి కొవ్వును తొలగించే ఆపరేషన్ కోసం ప్ర‌య‌త్నించింది. లుయానా ఆండ్రేడ్ సోమవారం సావో పాలోలోని హాస్పిటల్ సావో లూయిజ్‌కి వెళ్లి మోకాలి లైపోసక్షన్ ఆపరేషన్‌ని ఒక ప్రైవేట్ సర్జన్ - కుటుంబం నియమించిన అనస్థీషియాలజిస్ట్ చేత చేయించుకున్నారు. అయితే అప్ప‌టికే శ్వాసకోశ సమస్యతో బాధపడుతున్న ఆమె శస్త్రచికిత్స జరిగిన రెండు గంటల తర్వాత గుండె పోటుతో మ‌ర‌ణించింది. సర్జన్లు ఆ ప్రక్రియను అకస్మాత్తుగా నిలిపివేశారు. ఆమె భారీ థ్రోంబోసిస్‌తో బాధపడుతున్నట్లు గుర్తించారు. ఆమెను ఐసీయూకి తరలించినప్పటికీ మంగళవారం ఉదయం 5:30 గంటలకు తుదిశ్వాస విడిచారు.

ఈ మరణానికి కారణం పల్మోనరీ ఎంబోలిజం, ఆకస్మిక ధమనుల అడ్డంకిగా గుర్తించిన‌ట్టు తెలిసింది. స‌ద‌రు న‌టీమ‌ణికి ఇన్‌స్టాగ్రామ్‌లో 5.6ల‌క్ష‌ల‌కు పైగా ఫాలోవర్లు ఉన్నారు. అభిమానులు ఆమె కుటుంబానికి తమ సంతాపాన్ని తెలియ‌జేస్తున్నారు. ఇలాంటి మ‌ర‌ణం త‌గ‌దంటూ మోడ‌ల్స్, న‌టీమ‌ణుల‌కు అభిమానులు సూచిస్తున్నారు.