‘ఇరుముడి’కి కొత్త ఇబ్బంది.. ఆ సీన్లు తొలగించాలంటూ..

బాక్సాఫీస్ దగ్గర మంచి రన్ కొనసాగిస్తున్న ‘ఇరుముడి’కి ఇప్పుడు మరో వైపు నుంచి అభ్యంతరం వచ్చింది. సినిమాలో ప్రభుత్వ స్కూళ్లు, టీచర్లను చూపించిన విధానం సరిగా లేదంటూ ఏపీ టీచర్స్ ఫెడరేషన్ స్పందించింది. సినిమాలోని కొన్ని సీన్స్ తమను కించపరిచేలా ఉన్నాయని చెబుతూ, వాటిని వెంటనే తొలగించాలని డిమాండ్ చేసింది.

ముఖ్యంగా సినిమాలో ఒక టీచర్ పాత్రను నెగటివ్‌గా చూపించడంపైనే అభ్యంతరం వ్యక్తం చేస్తున్నారు. ఆ పాత్ర కనిపించే సీన్‌లో స్కూల్‌కు సంబంధించిన ఘటనను చూపించిన విధానం కూడా ప్రభుత్వ పాఠశాలలపై తప్పు అభిప్రాయం వచ్చేలా ఉందని ఫెడరేషన్ నాయకులు చెబుతున్నారు. ఆ సీన్‌లో కనిపించే విద్యార్థి ప్రస్తుతం ప్రభుత్వ స్కూళ్లలో వాడుతున్న యూనిఫామ్ తరహాలోనే ఉండటం వల్ల విషయం మరింత సీరియస్‌గా తీసుకున్నారు.

సినిమాలో ఒక పాత్ర నెగటివ్‌గా ఉండటం కొత్తేమీ కాదు. పోలీస్, డాక్టర్, టీచర్, రాజకీయ నాయకుడు.. కథకు అవసరమైతే ఏ వృత్తిలో ఉన్న వ్యక్తినైనా దర్శకులు వేరే షేడ్స్‌లో చూపిస్తుంటారు. కానీ ఒక వ్యక్తి పాత్రను చూపించడం, మొత్తం వృత్తిపైనే తప్పు అభిప్రాయం వచ్చేలా చూపించడం మధ్య తేడా ఉంటుందని టీచర్స్ సంఘం వాదిస్తోంది.

‘ఇరుముడి’లో ఫ్యామిలీ ఎమోషన్‌కు మంచి ప్రాధాన్యం ఉంది. చిన్నారులు, స్కూల్ నేపథ్యం కూడా కథలో భాగం కావడంతో ఇలాంటి సీన్స్ మీద అభ్యంతరం త్వరగా బయటకు వచ్చింది. పైగా ప్రస్తుతం సినిమా ఎక్కువ మంది ప్రేక్షకులకు చేరుతున్న సమయంలో ఈ అంశం బయటకు రావడంతో మేకర్స్ ఎలా స్పందిస్తారన్నది చూడాలి.

సినిమాలకు ఇలాంటి అభ్యంతరాలు వచ్చినప్పుడు మేకర్స్ సాధారణంగా వివరణ ఇవ్వడం, అవసరమైతే కొన్ని షాట్స్ మార్చడం లేదా డిస్క్లెయిమర్ పెట్టడం చేస్తుంటారు. కానీ ఇప్పటికే థియేటర్లలో సినిమా నడుస్తున్న సమయంలో ఒక సీన్ తొలగించాలనే డిమాండ్ రావడం మాత్రం టీమ్‌కు కొత్త సమస్యే. ఇక ఈ విషయంలో చిత్ర బృందం నుంచి ఎలాంటి రెస్పాన్స్ వస్తుందనేది చూడాలి.

ఎందుకంటే సినిమా హిట్ రన్ ఒక వైపు సాగుతుండగా, మరోవైపు ప్రభుత్వ పాఠశాలలు, టీచర్ల ప్రతిష్టకు సంబంధించిన అంశం కావడంతో దీనిని పూర్తిగా పట్టించుకోకుండా వదిలేయడం కూడా కష్టం. మేకర్స్ వివరణ ఇస్తారా, లేక సినిమాలో ఏమైనా మార్పు చేస్తారా అన్నది చూడాలి. మైత్రి మూవీ మేకర్స్ నిర్మించిన ఈ సినిమాను డైరెక్టర్ శివ నిర్వాణ చాలా సీన్స్ ను ఆడియెన్స్ కి కనెక్ట్ అయ్యేలా తీశాడు. ఇక బాక్సాఫీస్ వద్ద ఇప్పటికే 100 కోట్లకు చేరుకుంది. వీకెండ్ తర్వాత కూడా బుకింగ్స్ సాలిడ్ గానే ఉన్నాయి.