డిస్క్లైమర్ ఉన్నా.. ఇరుముడి గొడవ ఎందుకు పెరుగుతోంది?

సినిమా మొదలయ్యే ముందు కథ, పాత్రలు కల్పితం అంటూ డిస్క్లైమర్ వేయడం కామన్. ‘ఇరుముడి’లో కూడా అదే ఉంది. కానీ ఇప్పుడు సినిమా చుట్టూ మొదలైన వివాదం చూస్తే డిస్క్లైమర్ ఒక్కటే అన్ని సందర్భాల్లో సరిపోదేమో అనిపిస్తోంది. ఎందుకంటే ఇక్కడ అభ్యంతరం ఒక నెగెటివ్ క్యారెక్టర్ మీద మాత్రమే కాదు. ప్రభుత్వ స్కూల్‌ను ఎలా చూపించారు అన్నదానిపైనా ఉంది.

సినిమాలో ప్రభుత్వ పాఠశాల బోర్డు, విద్యార్థుల యూనిఫాం కనిపించడం, అదే సెటప్‌లో ప్రధానోపాధ్యాయురాలి పాత్రను నెగెటివ్‌గా చూపించడంపై టీచర్స్ సంఘాలు అభ్యంతరం చెబుతున్నాయి. కథ కల్పితమే అయినా బయట కనిపించే గుర్తులు రియల్ సిస్టమ్‌కు దగ్గరగా ఉన్నప్పుడు ప్రేక్షకుడు దాన్ని పూర్తిగా ఫిక్షన్‌గా మాత్రమే తీసుకుంటాడా అన్నదే ఇప్పుడు వచ్చిన సమస్య.

ఈ వివాదం ఇప్పుడు విద్యాశాఖ మంత్రి నారా లోకేష్ వరకు వెళ్లింది. టీచర్స్ ఎమ్మెల్సీ బొర్రా గోపి మూర్తి కూడా ప్రభుత్వం జోక్యం చేసుకోవాలని కోరారు. అభ్యంతరం ఉన్న సీన్లను తొలగించాలని టీచర్స్ సంఘాలు డిమాండ్ చేస్తున్నాయి. దీంతో మొదట ఒక వర్గం నుంచి వచ్చిన వ్యతిరేకత ఇప్పుడు సినిమా టీమ్ స్పందించాల్సిన స్థాయికి చేరింది.

నిజానికి ఇలాంటి కథలో మేకర్స్‌కు మరో ఆప్షన్ కూడా ఉంటుంది. స్కూల్ పేరు, యూనిఫాం, ప్రాంతం అన్నీ పూర్తిగా కల్పితంగా మార్చేయొచ్చు. అప్పుడు ఒక పాత్ర చేసే తప్పును మొత్తం ప్రభుత్వ విద్యా వ్యవస్థకు లింక్ చేసే అవకాశం తగ్గుతుంది. కానీ రియల్‌గా కనిపించే డీటెయిల్స్ వాడినప్పుడు కథకు నమ్మకం పెరుగుతుంది. అదే సమయంలో ఇలాంటి అభ్యంతరాలు వచ్చే రిస్క్ కూడా ఉంటుంది.

మరోవైపు సినిమా చూసిన కొందరు మాత్రం ప్రతి నెగెటివ్ పాత్రను ఆ వృత్తిలో ఉన్న అందరికీ వర్తింపజేయడం కరెక్ట్ కాదంటున్నారు. సినిమా కథలో ఒక టీచర్ తప్పు చేస్తే టీచర్లందరినీ అలా చూపించినట్టు ఎలా అవుతుందనే వాదన కూడా ఉంది. పైగా డిస్క్లైమర్ ముందే వేస్తున్నప్పుడు దాన్ని కూడా పరిగణనలోకి తీసుకోవాలని చెబుతున్నారు. ఇప్పుడు అసలు చూడాల్సింది మేకర్స్ ఈ వివాదంపై ఎలా స్పందిస్తారన్నదే. సీన్లు అలాగే ఉంచుతారా, ఏమైనా మార్పులు చేస్తారా, లేక డిస్క్లైమర్‌తోనే తమ వైపు క్లియర్ చేస్తారా అన్నది చూడాలి.

ఇక ఈ వివాదం ఒకవైపు నడుస్తున్నా బాక్సాఫీస్ దగ్గర మాత్రం ‘ఇరుముడి’ తన పని తాను చేసుకుంటూ వెళ్తోంది. మొదటి వారం ముగిసేసరికి సినిమా ప్రపంచవ్యాప్తంగా దాదాపు రూ.124 కోట్లకు పైగా గ్రాస్ అందుకుంది. ‘టాక్సిక్’ రావడంతో కొన్ని థియేటర్లలో షోలు తగ్గినా, ఇప్పుడు రెండో వీకెండ్‌లో మళ్లీ కొన్ని చోట్ల ‘ఇరుముడి’కి స్పేస్ పెరుగుతోంది. ఫ్యామిలీ ఆడియన్స్ కూడా ఇంకా సినిమాకు వస్తుండటంతో ఈ వివాదం కలెక్షన్స్ మీద ఎంతవరకు ప్రభావం చూపుతుందన్నది ఈ వీకెండ్ తర్వాత మరింత క్లియర్ అవుతుంది.