సినిమా చూస్తేనే ఆ పాయింట్ అర్థమవుతుంది.. సస్పెన్స్ పెంచిన టీం!

నేటి కాలంలో ప్రేక్షకులు కేవలం రొటీన్ ప్రేమకథలను మాత్రమే కోరుకోవడం లేదు, కథలో కొత్తదనం, ఊహించని మలుపులు ఉంటేనే థియేటర్లకు క్యూ కడుతున్నారు. 'కపుల్ ఫ్రెండ్లీ' ప్రెస్ మీట్‌లో చిత్ర యూనిట్ చెప్పిన మాటలు వింటుంటే, ఈ సినిమా కూడా అదే కోవలోకి చేరుతుందనిపిస్తోంది. ముఖ్యంగా "సినిమా చూస్తేనే ఆ పాయింట్ అర్థమవుతుంది" అంటూ హీరో సంతోష్ శోభన్ సృష్టించిన సస్పెన్స్, ఇప్పుడు సినీ ప్రియుల్లో ఆసక్తిని రేకెత్తిస్తోంది. అసలు ఈ సినిమాలో దాగి ఉన్న ఆ రహస్యం ఏమై ఉంటుంది? అని సినీ ప్రేమికులు ఆసక్తిగాఎదురుచూస్తున్నారు..

యూత్ ఫుల్ సినిమాల ట్రెండ్:

ప్రస్తుతం టాలీవుడ్‌లో చిన్న సినిమాలు పెద్ద విజయాలను అందుకుంటున్నాయి. 8 వసంతాలు నుంచి మొదలై ఇటీవల వచ్చిన జూనియర్,లిటిల్ హార్ట్స్,సింగిల్ వంటి చిత్రాల వరకు గమనిస్తే, యువతకు కనెక్ట్ అయ్యే ఎమోషన్స్ మరియు సహజమైన పాత్రలు ఉన్న సినిమాలే బాక్సాఫీస్ వద్ద విజేతలుగా నిలుస్తున్నాయి. 'కపుల్ ఫ్రెండ్లీ' కూడా సరిగ్గా ఇదే బాటలో నడుస్తోంది. నేటి తరం జంటల మధ్య ఉండే స్వతంత్ర భావాలు, అపార్థాలు మరియు గాఢమైన అనుబంధాన్ని దర్శకుడు ఈ సినిమాలో ఆవిష్కరించినట్లు తెలుస్తోంది. ప్రేక్షకులు ముందే కథను ఊహించకుండా, థియేటర్‌లో కూర్చున్నప్పుడు మాత్రమే రివీల్ అయ్యే ఒక కీలకమైన 'కోర్ పాయింట్' ఈ సినిమా సక్సెస్‌కు ప్రధాన బలం కానుంది.

శివ-మిత్రల సస్పెన్స్.. సంతోష్ మరియు మానస మ్యాజిక్:

ఈ సినిమా ప్రెస్ మీట్‌లో సంతోష్ శోభన్ మాట్లాడుతూ, కథలోని అసలు ట్విస్ట్‌ను దాచిపెట్టి ఆసక్తిని పెంచారు. "మిత్ర లేనిదే శివ లేడు.. కానీ అసలు శివ ఏం చేశాడు అనేది సినిమా చూసి తెలుసుకోవాల్సిందే" అని ఆయన చెప్పిన మాటలు ఒక బలమైన ఎమోషనల్ సస్పెన్స్‌ను సూచిస్తున్నాయి. అటు మిస్ ఇండియా మానస వారణాసి కూడా తన పాత్రలోని 'ఇండిపెండెన్స్' గురించి చెబుతూ, అది కథను ఎలా మలుపు తిప్పుతుందో హింట్ ఇచ్చారు. సాధారణంగా యూత్ ఫుల్ సినిమాల్లో హీరో హీరోయిన్ల మధ్య గొడవలు కామన్‌గా ఉంటాయి, కానీ ఈ చిత్రంలో వారిద్దరి మధ్య ఉండే ఒక సీక్రెట్ బాండింగ్ లేదా ఒక కీలక నిర్ణయం సినిమాను క్లైమాక్స్ వరకు నడిపిస్తుందని అర్థమవుతోంది. మూవీ ఫిబ్రవరి 14 న రిలీజ్ అయ్యి ఎటువంటి సెన్సేషన్ క్రెయేట్ చేస్తుందో చూడాలి ..