కోవిడ్ టైంలో కూడా జెట్ స్పీడ్ తో సినిమాలు చేస్తున్న యూత్ స్టార్..!

టాలీవుడ్ యూత్ స్టార్ నితిన్ 'జయం' సినిమాతో ఇండస్ట్రీలో అడుగుపెట్టి తనకంటూ ప్రత్యేకమైన గుర్తింపు తెచ్చుకున్నాడు. 'దిల్' 'సై' 'ఇష్క్‌' 'గుండెజారి గ‌ల్లంత‌య్యిందే' 'హార్ట్ అటాక్' 'అ ఆ' సినిమాలతో బాక్సాఫీస్ వద్ద తన స్టామినా చూపించాడు. ఈ ఏడాది ప్రారంభంలో ‘భీష్మ’ సినిమాతో బ్లాక్ బస్టర్ హిట్ అందుకున్నాడు. ఈ సక్సెస్ ఇచ్చిన జోష్ లో వరుస ప్రాజెక్ట్స్ అనౌన్స్ చేస్తూ దూకుడు చూపిస్తున్నాడు. ప్రస్తుతం మహానటి కీర్తి సురేష్ తో ''రంగ్ దే'' అనే రొమాంటిక్ ఫ్యామిలీ ఎంటర్టైనర్ లో నటిస్తున్నాడు. వెంకీ అట్లూరి దర్శకత్వం వహిస్తున్న ఈ చిత్రాన్ని పీడీవీ ప్రసాద్ సమర్పణలో సితార ఎంటర్టైమెంట్స్ బ్యాన‌ర్‌ పై సూర్య‌దేవ‌ర నాగ‌వంశీ నిర్మిస్తున్నారు. అలానే చంద్రశేఖర్ ఏలేటి దర్శకత్వంలో 'చెక్' అనే సినిమా చేస్తున్నాడు నితిన్. కరోనా కారణంగా నిలిచిపోయిన ఈ సినిమాల చిత్రీకరణ ఇటీవలే తిరిగి ప్రారంభమయ్యాయి.

కోవిడ్ సంక్షోభంలో కూడా పక్కా ప్లానింగ్ తో షూటింగ్స్ చేస్తూ అందర్నీ ఆశ్చర్యపరుస్తున్నాడు. ఇప్పటికే మెజారిటీ భాగం షూటింగ్ పూర్తి చేసుకున్న 'రంగ్ దే' షూటింగ్ ప్రస్తుతం దుబాయ్ లో జరుగుతోంది. ఈ చిత్రాన్ని వచ్చే ఏడాది సంక్రాంతికి రిలీజ్ చేయాలని మేకర్స్ ప్లాన్ చేస్తున్నారు. 'చెక్' సినిమా కూడా ఓ సాంగ్ మినహా షూటింగ్ మొత్తం పూర్తయిందని తెలుస్తోంది. దీని తర్వాత బాలీవుడ్ లో మంచి విజయం సాధించిన ''అంధాదున్'' మూవీని తెలుగులో రీమేక్ చేయనున్నాడు. మేర్లపాక గాంధీ దర్శకత్వం వహించనున్న ఈ చిత్రాన్ని హోమ్ ప్రొడక్షన్ శ్రేష్ఠ మూవీస్ బ్యానర్ పై సుధాకర్ రెడ్డి - నికిత రెడ్డిలు నిర్మించనున్నారు.

అలానే 'చల్ మోహన్ రంగా' ఫేమ్ కృష్ణ చైతన్య దర్శకత్వంలో 'పవర్ పేట' అనే సినిమా చేయడానికి సన్నాహాలు జరుగుతున్నాయి. ఇక అందరికి 2020 ఏడాది గుర్తుండి పోయినట్లే నితిన్ కి కూడా మరపురాయి ఏడాదిగా నిలిచిపోనుంది. ఈ ఏడాదిలోనే నితిన్ తన ప్రియసఖి షాలిని ని వివాహం చేసుకొని ఓ ఇంటివాడు అయ్యాడు. అలానే ఫస్ట్ కమర్షియల్ బ్రాండ్ ఎండార్స్‌మెంట్ కి అగ్రిమెంట్ చేసుకున్నాడని తెలుస్తోంది. ఏదేమైనా కోవిడ్ సమయంలో కూడా నితిన్ కెరీర్ ని పక్కా ప్లానింగ్ తో జెట్ స్పీడ్ తో పరుగులు పెట్టిస్తున్నాడని చెప్పవచ్చు.