తాగుబోతును కాదు.. ‘అర్జున్ రెడ్డి’ చేయలేను

2017లో ‘బాహుబలి’ తర్వాత టాలీవుడ్లో అంత చర్చనీయాంశమైన సినిమా ‘అర్జున్ రెడ్డి’. పొరుగు భాషల్లో కూడా ఈ సినిమా గురించి పెద్ద చర్చే నడిచింది. ఆల్రెడీ ఈ చిత్రాన్ని తమిళంలో విక్రమ్ తనయుడు ధ్రువ్ కథానాయకుడిగా బాల దర్శకత్వంలో రీమేక్ చేయడానికి సన్నాహాలు మొదలయ్యాయి. మరోవైపు హిందీలోకి కూడా ఈ చిత్రం వెళ్తోంది. ‘అర్జున్ రెడ్డి’ దర్శకుడు సందీప్ రెడ్డే ఈ చిత్రాన్ని హిందీలో రీమేక్ చేయబోతున్నాడు. షాహిద్ కపూర్ హిందీ అర్జున్ రెడ్డిగా కనిపించబోతున్నాడు. ఐతే ఈ చిత్రానికి బాలీవుడ్లో సరైన ఛాయిస్ ఎవరు అన్న చర్చ వచ్చినపుడు చాలామంది రణ్వీర్ సింగ్ ను చూపించిన మాట వాస్తవం.

సందీప్ ఆలోచనల్లో సైతం రణ్వీర్ సింగే ఉన్నాడట. అతను రణ్వీర్ ను సంప్రదించిన మాట కూడా వాస్తవమేనట. ఈ విషయాన్ని సూటిగా చెప్పలేదు కానీ.. పరోక్షంగా రణ్వీర్ సింగే వెల్లడించాడు. తన దగ్గరికి ఈ మధ్య ఒక కథ వచ్చిందని.. అది మంచి కథే అని.. ఐతే అందులో ఆల్కహాలిక్ గా కనిపించాల్సి రావడంతో తాను అంగీకరించలేదని రణ్వీర్ తెలిపాడు. తాను మెథడ్ యాక్టర్ అని.. ఏదైనా పాత్ర చేయాలంటే ఒరిజినల్ గా ఎలా ఉంటారో ప్రయత్నించి ఆ తర్వాత నటిస్తానని.. ఐతే తనకు మద్యం తాగే అలవాటు లేకపోవడంతో ఆల్కహాలిక్ క్యారెక్టర్ చేయలేనని చెప్పేశానని రణ్వీర్ ఒక ఇంటర్వ్యూలో వెల్లడించాడు. దీన్ని బట్టి అతను నో చెప్పింది ‘అర్జున్ రెడ్డి’ రీమేకే అన్న విషయం స్పష్టమవుతోంది. నిజంగా రణ్వీర్ ఈ పాత్ర చేస్తే భలేగా ఉండేదన్నది బాలీవుడ్ వర్గాల అభిప్రాయం.