మహానటి @26 ఇంకా స్ట్రాంగ్

విడుదల ముందు వరకు పెద్దగా అంచనాలు లేకుండా సావిత్రి గారి కథను ఎలా తీసుంటారా అనే అనుమానాల మధ్య విడుదలయిన మహానటికి ప్రేక్షకులు కనకాభిషేఖం చేసారు. బాక్స్ ఆఫీస్ దగ్గర ఈ ఏడాది వచ్చిన ఇండస్ట్రీ హిట్స్ లో ఇది కూడా స్థానం దక్కించుకోవడం సావిత్రి గారి అభిమానులనే కాదు సినిమా ప్రేమికులను సైతం ఆనందానికి గురి చేసింది. ఇప్పటికే 26 రోజుల రన్ పూర్తి చేసుకున్న మహానటి ఇప్పటి దాకా 26 కోట్ల షేర్ రాబట్టుకోవడం విశేషం. కొత్త సినిమాలు వరస బెట్టి వస్తున్నా అన్ని కేంద్రాల్లో స్టడీగా ఉండటం వసూళ్ల పరిస్థితిని చెప్పకనే చెబుతోంది. కథ విషయంలో చిన్న చిన్న కామెంట్స్ ఉన్నప్పటికీ నాగ అశ్విన్ సావిత్రి గారి జీవితాన్ని  ఆవిష్కరించిన తీరుకు ఏకగ్రీవంగా పట్టం దక్కింది. ఇంకో రెండు వారాలు రన్ బాగానే ఉంటుందని ట్రేడ్ అంచనా వేస్తోంది. బలంగా పోటీ ఇచ్చే సినిమా మహానటి తర్వాత ఏది రాకపోవడం కూడా ప్లస్ గా మారింది.

సమ్మర్ ముగింపుకి వచ్చేసింది. చాలా ప్రాంతాల్లో వర్షాలు కురవడంతో పాటు వాతావరణం కొంత చల్లబడింది. తెలుగు స్ట్రెయిట్ సినిమాల్లో వచ్చే వారం రానున్న కళ్యాణ్ రామ్ నా నువ్వే ఒక్కటే రేస్ లో ఉంటుంది. కాలా డబ్బింగ్ సినిమా కనక పరిగణనలోకి తీసుకోలేం కానీ అంతకు ముందు వచ్చినవన్నీ రెండు వారాలకే టపా కట్టినవే. శాటిలైట్ హక్కుల రూపంలో సైతం 15 కోట్ల దాకా రాబట్టిన మహానటి వైజయంతి బ్యానర్ కు గత పదేళ్లలో దక్కని పెద్ద హిట్ గా నిలిచింది. తమిళ్ వెర్షన్ తో పాటు మలయాళంలో కూడా మంచి ఆదరణ దక్కిన మహానటికి వచ్చిన స్పందన చూసాకే మరిన్ని బయోపిక్స్ కు అడుగులు పడుతున్నాయి. మహానటి దెబ్బకు  కీర్తి సురేష్ ఇమేజ్ అమాంతం ఆకాశాన్ని అందుకుంది. దీంతో  తన రాబోయే సినిమాలు  స్వామి స్క్వేర్ పందెం కోడి 2 మీద ఇప్పటి నుంచే అంచనాలు పెరుగుతున్నాయి .  మహానటి వసూళ్ల పరంగా కూడా  భరోసా ఇవ్వడంతో మరిన్ని బయోపిక్ లు వచ్చేలా ఉన్నాయి.