బ్రేకప్ అయిందని ఒప్పుకున్న అనుపమ

పేరుకు మలయాళ అమ్మాయే అయినా.. తెలుగు ప్రేక్షకులను అమితంగా ఆకట్టుకుని టాలీవుడ్లో స్టార్ హీరోయిన్ అనుపమ పరమేశ్వరన్. ఆమె మలయాళం, తమిళ భాషల్లోనూ నటించినప్పటికీ.. ఎక్కువ సినిమాలు చేసింది, ఎక్కువ ఫాలోయింగ్ తెచ్చుకున్నది తెలుగులోనే. ఆమెకు సంబంధించిన ఏ వార్త బయటికి వచ్చినా ఎంతో ఆసక్తిగా చూసేది కూడా తెలుగు వాళ్లే. సినీ కెరీర్లో ఇప్పటిదాకా అనుపమకు సంబంధించి ఏ వివాదాలూ, రూమర్లూ లేవు కానీ.. ఆమె భారత క్రికెట్ జట్టు ఫాస్ట్ బౌలర్ బుమ్రాతో ప్రేమలో ఉన్నట్లు అప్పట్లో జోరుగా ప్రచారం జరగడం తెలిసిందే. బుమ్రా, అనుపమ కలిసి ఎప్పుడూ కనిపించలేదు కానీ.. వీరి మధ్య ఏదో ఉన్నట్లు మాత్రం ఊహాగానాలు బలంగానే వినిపించాయి. కట్ చేస్తే.. కొన్ని నెలల కిందటే బుమ్రా.. సంజన అనే స్పోర్ట్స్ ప్రెజెంటర్‌ను పెళ్లాడేశాడు. దీంతో అనుపమతో అతడి ప్రేమాయణం గురించి వచ్చిన వార్తలన్నీ రూమర్లే అని ఫిక్సయిపోయారంతా.

కానీ ఇప్పుడు అనుపమ తన ‘ప్రేమ’ గురించి చేసిన వ్యాఖ్యలు ఆసక్తి రేకెత్తిస్తున్నాయి. తాను కూడా జీవితంలో ప్రేమ రుచి చూశానని.. కొంత కాలం ప్రేమలో ఉన్నానని అనుపమ తాజాగా ఓ ఇంటర్వ్యూలో చెప్పింది. నిజ జీవితంలో మీరెప్పుడైనా ప్రేమలో పడ్డారా అని ఆ ఇంటర్వ్యూలో అడిగితే.. ‘‘అవును.. ప్రేమలో పడ్డా.. కానీ అది తర్వాత బ్రేకప్ అయింది’’ అని బదులిచ్చింది అనుపమ. అంతకుమించిన తన ప్రేమ గురించి ఆమె వివరాల్లోకి వెళ్లలేదు. బుమ్రాతో లింకప్ మినహాయిస్తే.. అనుపమ ప్రేమాయణం గురించి మరే రకమైన వార్తలూ రాలేదు మీడియాలో. మరి అనుపమ ఇప్పుడు ప్రేమలో పడ్డా.. బ్రేకప్ అయింది అని అంటున్నది బుమ్రాతోనేనా.. ఆ వ్యక్తి ఇంకెవరైనానా అన్నది ఆమె సన్నిహితులకే తెలియాలి. ఇక కెరీర్ విషయానికి వస్తే.. తెలుగులో కొంచెం గ్యాప్ తర్వాత ఆమె నిఖిల్ సరసన ‘18 పేజెస్’ చేస్తోంది. అదే హీరోతో ‘కార్తికేయ-2’లోనూ నటిస్తోంది. ‘రౌడీ బాయ్స్’ పేరుతో ఆమె కథానాయికగా మరో సినిమా కూడా తెరకెక్కుతోంది.