1.26 ని.ల లిప్-లాక్ సీన్ క‌ట్.. థియేట‌ర్ కంటే ఓటీటీలే ముద్దు ఇందుకేనా?

ప్రస్తుత డిజిటల్ యుగంలో వెండితెరపై ముద్దు సన్నివేశాల్లో నటించేందుకు నేటితరం నటీనటులు ఎంతమాత్రం సంకోచించడం లేదు. కథా గమ్యానికి అవసరమైనప్పుడు హీరోలతో పోటీ పడి మరీ ఘాటైన రొమాంటిక్ సీన్లలో జీవిస్తున్నారు. సినిమాలలో ఇటువంటి లవ్ సీన్లు, బెడ్‌రూమ్ దృశ్యాలు కమర్షియల్‌గా చిత్ర విజయానికి దోహదం చేస్తాయనే నమ్మకం ఉండటంతో దర్శకుల సూచ‌న‌ల‌కు అనుగుణంగా నటించేందుకు వెనకాడటం లేదు. ఇప్పుడు బాలీవుడ్ యువ నటి అనన్యా పాండే సరిగ్గా ఇదే తరహాలో ఒక లవ్ స్టోరీ కోసం కెమెరా ముందు చెలరేగిపోయింది. అయితే అన‌న్య‌ నటించిన ఆ ఘాటైన ముద్దు సీన్లకే ఇప్పుడు సెన్సార్ బోర్డు బ్రేకులు వేసింది.

యువ నటుడు లక్ష్య, స్టార్ కిడ్ అనన్యా పాండే ప్రధాన పాత్రల్లో నటించిన రొమాంటిక్ డ్రామా `చంద్ మేరా దిల్` చిత్రం మరికొద్ది రోజుల్లో విడుదలకు సిద్ధమవుతోంది. ఇది డీప్ రొమాంటిక్ ఎంట‌ర్ టైన‌ర్.. ఘాఢ‌మైన ప్రేమ‌, విర‌హం నేప‌థ్యంలో ర‌క్తి కట్టించే యూత్ ఫుల్ కంటెంట్ తో వ‌స్తోంది. అయితే క‌థ‌తో సంబంధం లేకుండా.. ఈ సినిమా నుంచి తొలగించిన లిప్-లాక్ సీన్ల గురించి ఇప్పుడు చిత్ర పరిశ్రమలో ఒక ఆసక్తికరమైన చర్చ నడుస్తోంది. సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సీబీఎఫ్‌సీ) ఈ చిత్రంలోని శృంగారభరిత మైన‌.. అత్యంత సన్నిహిత దృశ్యాలపై తీవ్ర అభ్యంతరం వ్యక్తం చేసింది. సినిమాలో ఉన్న రొమాన్స్ డోస్ సమాజంలోని కొన్ని వర్గాలకు ఇబ్బందిగా మారకూడదనే ఉద్దేశంతో బోర్డు సభ్యులు పలు మార్పులను సూచించారు. ఆ ఎడిట్ల అనంతరం చిత్రానికి యుఏ 16+ సర్టిఫికేట్‌ను ఖరారు చేశారు.

బాలీవుడ్ హంగామా క‌థ‌నం ప్రకారం.. ఈ సినిమాలోని రొమాంటిక్ సన్నివేశాలకు సెన్సార్ బోర్డ్ చాలా పెద్ద కత్తెరే వేసింది. సినిమాలో కథా గమనంలో వచ్చే దాదాపు 96 సెకన్ల నిడివి గల ముద్దు సీన్లను పూర్తిగా తొలగించాలని ఆదేశించింది. ఇందులో భాగంగా ఒక 10 సెకన్ల సుదీర్ఘమైన ముద్దు సీక్వెన్స్‌ను పూర్తిగా తొల‌గించి.. దాని స్థానంలో వేరే ప్రత్యామ్నాయ విజువల్స్ ఉంచాల్సి వచ్చింది. వీటితో పాటు చిత్రంలో వేర్వేరు సందర్భాల్లో వచ్చే దాదాపు 1 నిమిషం 26 సెకన్ల నిడివి గల మరికొన్ని ఘాటైన లిప్-లాక్ సీన్లను కూడా సెన్సార్ ఎడిటర్లు కత్తిరించారు. కేవలం రొమాన్స్ మాత్రమే కాకుండా.. సినిమాలో నటించిన బాల నటులకు సంబంధించిన అధికారిక సమ్మతి పత్రాలను కూడా సమర్పించిన తర్వాతే బోర్డు దీనికి క్లియరెన్స్ ఇచ్చింది.

ఈ సెన్సార్ కట్స్ అనంత‌రం రన్‌టైమ్ మ‌రికొంత మేర త‌గ్గింది. వివేక్ సోని దర్శకత్వంలో తెరకెక్కిన ఈ చిత్రం మొత్తం 135.36 నిమిషాల (సుమారు 2 గంటల 15 నిమిషాల) నిడివితో థియేటర్లలోకి రానుంది. విరహం, హృదయ వేదనలతో కూడిన ఒక విభిన్నమైన ప్రేమకథగా రూపొందిన ఈ సినిమాలో లక్ష్య- అనన్యా పాండే మొదటిసారి జంటగా నటించారు. ఇటీవల విడుదలైన ట్రైలర్‌లో వీరిద్దరి కెమిస్ట్రీ యువతను ఎంతగానో ఆకట్టుకుంది. సినిమాపై ప్రేక్షకులలో మంచి అంచనాలు ఉన్నా.. ఈ జంట మాత్రం ఎందుకోగానీ మీడియా ప్రమోషన్లకు, ఇంటర్వ్యూలకు కాస్త దూరంగానే ఉండ‌టం ఆశ్చ‌ర్య‌ప‌రుస్తోంది.

మరోవైపు చిత్ర నిర్మాతలు థియేటర్లకు ప్రేక్షకులను భారీగా రప్పించడానికి ఒక సరికొత్త టికెట్ ధరల వ్యూహాన్ని అమలు చేస్తున్నారు. ఇందులో భాగంగా సాయంత్రం ఆటలతో పోలిస్తే.. పగటిపూట ప్రదర్శించే డే షోలకు టికెట్ ధరలను తక్కువగా నిర్ణయించి సామాన్య ప్రేక్షకులను ఆకట్టుకోవాలని చూస్తున్నారు. ఇప్పటికే అడ్వాన్స్ బుకింగ్స్ కూడా ప్రారంభం కావాల్సి ఉంది. ఇలా అన్ని రకాల సెన్సార్ అడ్డంకులను దాటుకుని.., భారీ కట్స్ తర్వాత సరికొత్త రూపంలో సిద్ధమైన `చంద్ మేరా దిల్` చిత్రం ఈ నెల మే 22న ప్రపంచవ్యాప్తంగా థియేటర్లలో విడుదల కానుంది.

థియేట‌ర్ ఆంక్ష‌ల కంటే ఓటీటీలే బెస్ట్:

డిజిటల్ విప్లవం తర్వాత చలనచిత్ర రంగాన్ని అత్యంత తీవ్రంగా వేధిస్తున్న సవాలు ఇది. నేటి జెన్-జెడ్ నటీనటులు.. ఆధునిక దర్శకులు పాశ్చాత్య సినిమాల స్థాయిలోనే పాత్రల భావోద్వేగాలను, రొమాన్స్‌ను సహజంగా తెరకెక్కించడానికి సిద్ధపడుతున్నారు. కానీ సాంప్రదాయ సెన్సార్ బోర్డులు (సీబీఎఫ్‌సీ) ఇప్పటికీ పాత నిబంధనల ప్రకారం కత్తెర వేయడం వల్ల థియేటర్ సినిమాల సృజనాత్మకతపై తీవ్ర ప్రభావం పడుతోంది. ఈ పరిణామం వల్ల ప్రేక్షకులు ఓటీటీల వైపు శాశ్వతంగా మళ్లే ప్రమాదం ఉందా అనే అంశాన్ని పరిశీలిస్తే కొన్ని ఆసక్తికరమైన కోణాలు కనిపిస్తాయి.

ఒక దర్శకుడు కథలోని పాత్రల మధ్య ఉన్న గాఢమైన ప్రేమను లేదా తీవ్రమైన విరహాన్ని ప్రతిబింబించడానికి రొమాంటిక్ సన్నివేశాలను నమ్ముకున్నప్పుడు సెన్సార్ బోర్డు నిమిషాల కొద్దీ సీన్లను కట్ చేయడం వల్ల కథా గమనం దెబ్బతింటుంది. సినిమా చూసే ప్రేక్షకుడికి ఆ పాత్రల పై అనుభూతి లోపిస్తుంది. దీనివల్ల థియేటర్ల కోసం కథలు రాసుకునే దర్శకులు ముందే తమ సృజనాత్మకతకు పరిమితులు విధించుకోవాల్సి వస్తోంది. ఫిల్మ్ మేకర్స్ తమకు నచ్చినట్లుగా కాకుండా... సెన్సార్ బోర్డుకు నచ్చేలా సినిమాలు తీయాల్సిన పరిస్థితి ఏర్పడుతోంది. అయితే ఓటీటీ లలో సెన్సార్ ఆంక్షలు లేకపోవడం వల్ల లవ్, క్రైమ్, డార్క్ థ్రిల్లర్ జోనర్లలో అత్యంత బోల్డ్ అండ్ రియలిస్టిక్ కంటెంట్ అందుబాటులోకి వస్తోంది.

థియేట‌ర్ల‌లో చంద్ మేరా దిల్, అర్జున్ రెడ్డి వంటి సినిమాల్లో 96 సెకన్ల ముద్దు సీన్లకే కత్తెర పడితే.. ఓటీటీలలోని వెబ్ సిరీస్‌లలో అంతకంటే ఘాటైన సన్నివేశాలు కథలో భాగమైపోతున్నాయి. నేటి యువత ఇళ్లలో ఒంటరిగా కూర్చుని హెడ్‌ఫోన్స్ పెట్టుకుని తమకు నచ్చిన బోల్డ్ కంటెంట్‌ను ఎలాంటి సెన్సార్ లేకుండా ఓటీటీలలో చూసేందుకు అలవాటు పడిపోతున్నారు. ఈ స్వేచ్ఛకు అలవాటైన ప్రేక్షకుడు.. థియేటర్లలో కత్తిరించిన అసంపూర్ణమైన సినిమాలను చూడటానికి డబ్బులు ఖర్చు పెట్టడానికి ఇష్టపడటం లేదు. ఇది థియేట్రిక‌ల్ రంగానికి పెద్ద దెబ్బ‌గా మారుతోంది.