అఖండ 2.. ప్రీమియర్స్ లో సడన్ ట్విస్ట్

నందమూరి బాలకృష్ణ, బోయపాటి శ్రీను కాంబినేషన్ లో వస్తున్న 'అఖండ 2: తాండవం' రిలీజ్ కోసం అభిమానులు ఆసక్తిగా ఎదురుచూస్తున్న విషయం తెలిసిందే. టికెట్ రేట్లు, బెనిఫిట్ షోల అనుమతులతో జోష్ లో ఉన్న ఫ్యాన్స్ కు ఇప్పుడు ఒక చేదు వార్త వినాల్సి వచ్చింది. అనుకున్న ప్లాన్ ప్రకారం జరగాల్సిన ప్రీమియర్ షోస్ విషయంలో ఒక చిన్న ఆటంకం ఎదురైంది. సాంకేతిక కారణాల వల్ల ఈ షోస్ నిలిచిపోయినట్లు మేకర్స్ ప్రకటించారు.

డిసెంబర్ 4వ తేదీ సాయంత్రం వేయాలనుకున్న ప్రీమియర్ షోస్ కోసం ఆంధ్రప్రదేశ్, తెలంగాణ ప్రభుత్వాల నుంచి అనుమతి వచ్చింది. టికెట్ ధర రూ. 600 అయినా సరే, ఎలాగైనా సినిమాను ముందుగా చూడాలని ఫ్యాన్స్ ఆత్రుతగా ఉన్నారు. అయితే చివరి నిమిషంలో టెక్నికల్ ఇష్యూస్ కారణంగా ఇండియాలో జరగాల్సిన ఈ ప్రీమియర్ షోస్ ను క్యాన్సిల్ చేస్తున్నట్లు 14 రీల్స్ ప్లస్ సంస్థ అధికారికంగా తెలిపింది.

"మేము మా వంతు ప్రయత్నం చేశాం, కానీ కొన్ని విషయాలు మా చేతుల్లో లేవు. అసౌకర్యానికి చింతిస్తున్నాం" అని నిర్మాతలు క్లారిటీ ఇచ్చారు. దీంతో టికెట్లు బుక్ చేసుకున్న అభిమానులు నిరాశకు గురయ్యారు. అయితే ఈ క్యాన్సిలేషన్ కేవలం ఇండియాలోని ప్రీమియర్స్ కు మాత్రమే వర్తిస్తుందని, ఓవర్సీస్ ప్రీమియర్స్ యథావిధిగా షెడ్యూల్ ప్రకారం జరుగుతాయని వెల్లడించారు.

ఇలాంటి సాంకేతిక సమస్యలు పెద్ద సినిమాలకు కొత్తేమీ కాదు. కంటెంట్ డెలివరీలో ఆలస్యం, లేదా క్యూబ్ సర్వర్స్ లో సమస్యల వల్ల ఇలా జరుగుతుంటుంది. అయినప్పటికీ, రెగ్యులర్ షోస్, ఎర్లీ మార్నింగ్ షోస్ కు ఎలాంటి ఇబ్బంది ఉండదని భావిస్తున్నారు. డిసెంబర్ 5న ఉదయం నుంచే యథావిధిగా సినిమా ప్రదర్శనలు మొదలవుతాయి.

అఖండ మొదటి పార్ట్ క్రియేట్ చేసిన ఇంపాక్ట్ వల్ల సీక్వెల్ పై అంచనాలు ఉన్నాయి. తమన్ మ్యూజిక్, బాలయ్య లుక్, బోయపాటి యాక్షన్ ఎలిమెంట్స్ కోసం జనాలు వెయిట్ చేస్తున్నారు. ప్రీమియర్స్ మిస్ అయినా, రేపు థియేటర్లలో పండగ వాతావరణం ఉండటం ఖాయం. ఒక చిన్న అవాంతరం ఫ్యాన్స్ ఉత్సాహాన్ని తగ్గించలేదు.

మొత్తానికి ప్రీమియర్స్ క్యాన్సిల్ అవ్వడం చిన్న డిజప్పాయింట్మెంట్ అయినా, సినిమాపై ఉన్న క్రేజ్ ఏమాత్రం తగ్గలేదు. రేపు ప్రపంచవ్యాప్తంగా థియేటర్లలో 'జై బాలయ్య' నినాదాలు మార్మోగడం ఖాయం అని ఫ్యాన్స్ సోషల్ మీడియాలో కామెంట్స్ చేస్తున్నారు. ఇక ఓవర్సీస్ టాక్ కోసం ఫ్యాన్స్ ఇప్పుడు ఆసక్తిగా ఎదురుచూస్తున్నారు.