మహీంద్రా స్పెష‌ల్ గిఫ్ట్ .. ఇదంతా 'తళా' అజిత్‌పై ప్రేమేనా!

కోలీవుడ్ సూపర్ స్టార్ `తళా` అజిత్ కుమార్‌కు కేవలం సినిమాలంటేనే కాదు రేసింగ్ అన్నా.. వేగమన్నా ప్రాణం. ఆయ‌న ఎంతో దూకుడుగా `వేగం` అనే సినిమాలో కూడా న‌టించారు. ఆయనకున్న ఈ రేసింగ్ ప్యాషన్‌ను గౌరవిస్తూ ప్రముఖ వాహన తయారీ సంస్థ `మహీంద్రా` ఒక అద్భుతమైన కానుకను అందించింది. తమ ప్రతిష్టాత్మక ఎలక్ట్రిక్ వెహికల్ సిరీస్‌లో భాగంగా బిఇ6 ఫార్ములా ఈ- థీమ్ ఎస్.యు.విని అజిత్‌కు బహుమతిగా ఇచ్చింది. చెన్నైలో జరిగిన ఒక ప్రత్యేక కార్యక్రమంలో మహీంద్రా ప్రతినిధులు ఈ కారును అజిత్‌కు అందజేశారు. అయితే ఈ గిఫ్ట్ వెనుక మహీంద్రా వేసిన తెలివైన వ్యాపార వ్యూహం ఇప్పుడు సోషల్ మీడియాలో హాట్ టాపిక్ అయింది.

సాధారణంగా ఒక స్టార్ హీరోతో యాడ్ షూట్ చేయించాలంటే కోట్లాది రూపాయల రెమ్యునరేషన్ చెల్లించాల్సి ఉంటుంది. కానీ అజిత్ లాంటి `ప్రైవసీ`ని ఇష్టపడే హీరోలు బ్రాండ్ అంబాసిడర్లుగా ఉండటానికి పెద్దగా ఆసక్తి చూపరు. ఇలాంటి తరుణంలో ఆయనకు అత్యంత ఇష్టమైన రేసింగ్ థీమ్‌తో కూడిన కారును గిఫ్ట్‌గా ఇవ్వడం ద్వారా మహీంద్రా సంస్థ అజిత్ అభిమానుల మనసు గెలుచుకుంది. ఈ ఒక్క చర్యతో కోట్లాది మంది అజిత్ ఫ్యాన్స్‌కు మహీంద్రా బ్రాండ్ అత్యంత చేరువయ్యింది. ఒక్క రూపాయి కూడా అడ్వర్‌టైజ్‌మెంట్ కోసం ఖర్చు చేయకుండానే దేశవ్యాప్తంగా భారీ హైప్ సాధించింది.

అజిత్ కుమార్‌కు ఉన్న క్రేజ్ అంతా ఇంతా కాదు. ఆయన ఏం చేసినా ఏ కారు వాడినా అది క్షణాల్లో వైరల్ అవుతుంది. ఇప్పుడు అజిత్ గ్యారేజీలోకి మహీంద్రా బిఇ6 చేరడంతో ఆ కారు ఫీచర్లు , దాని లుక్ గురించి నెటిజన్లు తెగ వెతికేస్తున్నారు. రేసింగ్ ట్రాక్‌పై అజిత్ ఉన్న ఫొటోలు.. ఈ కొత్త ఎస్‌.యు.వితో ఆయన దిగిన ఫొటోలు సోషల్ మీడియాలో ట్రెండింగ్‌లో ఉన్నాయి. ఇది మహీంద్రా సంస్థకు ఒక రకమైన `ఆర్గానిక్ ప్రమోషన్`గా మారిపోయింది. తెలివైన వ్యాపారవేత్తగా ఆనంద్ మహీంద్రా టీమ్ వేసిన ఈ అడుగు ఇప్పుడు మార్కెటింగ్ వర్గాల్లో చర్చనీయాంశమైంది.

ఈ ప్రత్యేకమైన SUV విషయానికి వస్తే.. ఇది కేవలం సాధారణ కారు కాదు. ఇది ఫార్ములా-ఇ రేసింగ్ స్ఫూర్తితో రూపొందించిన‌ ఎలక్ట్రిక్ వెహికల్. అజిత్ ప్రస్తుతం యూరోపియన్ రేసింగ్ సర్క్యూట్‌లో బిజీగా ఉన్న నేపథ్యంలో ఆయన ఇమేజ్‌కు సరిగ్గా సరిపోయేలా ఈ కారును డిజైన్ చేశారు. పర్యావరణహితమైన ఎలక్ట్రిక్ కార్లను ప్రోత్సహించడంలో భాగంగా ఒక ప్యాషనేట్ రేసర్ అయిన అజిత్ చేతుల మీదుగా ఈ ప్రమోషన్ జరగడం మహీంద్రాకు దొరికిన అతిపెద్ద అడ్వాంటేజ్. భవిష్యత్తులో ఎలక్ట్రిక్ కార్ మార్కెట్‌లో అగ్రస్థానంలో నిలవాలన్న మహీంద్రా లక్ష్యానికి ఇది గట్టి పునాది వేసింది.

మరోవైపు అజిత్ అభిమానులు తమ హీరోకు దక్కిన ఈ గౌరవాన్ని చూసి మురిసిపోతున్నారు. అజిత్ క్రమశిక్షణ, రేసింగ్ పై ఆయనకున్న అంకితభావానికి మహీంద్రా ఇచ్చిన గుర్తింపుగా దీనిని భావిస్తున్నారు. కోలీవుడ్ నుంచి బాలీవుడ్ వరకు ఈ వార్త పాకడంతో మహీంద్రా బిఇ6 మోడల్‌కు అనుకోకుండానే భారీ డిమాండ్ ఏర్పడే అవకాశం ఉంది. ఒక రకంగా చెప్పాలంటే మహీంద్రా సంస్థ అజిత్‌కు కారును గిఫ్ట్ ఇవ్వడం ద్వారా ఒక రాయికి రెండు పిట్టలు అన్నట్టుగా.. అటు గౌరవాన్ని.. ఇటు అద్భుతమైన బ్రాండ్ వ్యాల్యూను సంపాదించుకుంది.

చివరగా ఈ పరిణామం సినిమా సెలబ్రిటీలు- కార్పొరేట్ బ్రాండ్‌ల మధ్య ఉండాల్సిన సంబంధానికి ఒక కొత్త నిర్వచనాన్ని ఇచ్చింది. కేవలం డబ్బు ఇచ్చి యాడ్స్ చేయించుకోవడం కంటే వారి వ్యక్తిత్వానికి, ప్యాషన్‌కు తగిన గుర్తింపు ఇవ్వడం ద్వారా బ్రాండ్‌ను ఎలా ప్రమోట్ చేసుకోవచ్చో మహీంద్రా నిరూపించింది. అజిత్ లాంటి మాస్ ఫాలోయింగ్ ఉన్న హీరో గ్యారేజీలో మహీంద్రా కారు ఉండటం అనేది ఆ కంపెనీకి దక్కిన గొప్ప సర్టిఫికేట్. మొత్తానికి `తళా` అజిత్ -`మహీంద్రా`ల బంధం ఇప్పుడు ఇండస్ట్రీలో ఒక సెన్సేషన్‌గా నిలిచిపోయింది. బ‌హుశా `మ‌హీంద్రా` ఐడియాను ఇక‌మీద‌ట ఇత‌ర ల‌గ్జ‌రీ కార్ బ్రాండ్లు కూడా స‌ద్వినియోగం చేసుకుంటాయేమో చూడాలి.